Yesu badi mwitanyine balongi bananka—Mpyeele, Andree, Shaake, na Yowano—bwabadya kwikala balobi ba bantu. Binobino, mwifuku dya Satabo, abo booso abende mu kitumbwilo kya mu Kapernaume kya mbalo yabadi. Yesu kwete kulongyesha mu kitumbwilo, na dingi bantu bakwete kukema mushindo wa kwete kulongyesha. Badi alongyesha bu muntu sha matalwa kushii bu bafundji.

Mu yaaya Sabato, mubadi muntu badi mukwatshibwe na kikudi kibi. Nka mwamwa mu kitumbwilo, yawa mwana mulume nkusama n’eyi di bukopo shi: “Pankatshi peetu n’obe pe mwanda kinyi, Yesu mwina Nazarete? Obe bofiki mu kwitubutula? Nankuuku’shi we muntu kinyi: We eEselele a Efile Mukulu!” Yesu nkusashila kikudi kibi kibadi munda mwa yawa muntu shi: “Umiina; na tuuka munda mwaye!”—Maako 1:24, 25, Kilombeeno kipya 2014.

Musango umune, kyakya kikudi kibi kibamuponeeshe mu nsenga, aye nkubanga kusunya, na kusama n’eyi di bukopo. Kadi kikudi kibi kibatuukile munda mwaye “kushii kumukita kintu kii bubi sunga nkimune.” (Luka 4:35) Bantu abadi bamwifunyishe mu kitumbwilo abakanyine ngofu! Abo nkwipusha shi: “A bino bishima bii naminyi? Atumina bikudi bibi eyi na matalwa, na bukome, abyo namu abituuku.” (Maako 1:27) Kushii mpaka, nkumo pabitale uno mwanda wa kukaanya ibadi ipalakane mu Ngalileya mushima.

P’abo kukatuka ku kitumbwilo, Yesu na balongi baye abayile kwa Simone, sunga Mpyeele. Kwakwa, muko mukashi a Mpyeele badi akumbu mbidi kaalo ibukopo. Abatekyele Yesu bwadya kumupasha. Yesu nkwenda kwadi, nkumukwata ku mboko, na nkumwibwesha. Badi mupande musango umune, aye kubanga kukwasha Yesu na balongi baye, pangi bwa kwibateekyela.

Ku kyoolwa, bantu abadi abafiki mpese yooso kwa Mpyeele na bantu babo abadi abakumbu. Mu kapindji kapeela, kubadi nka bu kibundji kishima kibadi kiibungye ku kiibi. Bwakinyi? Abakimbi bwashi Yesu ebapaashe. Mu binyibinyi, “booso abadi na basha mikumbo ya bipaso bilekeene abamutwadiile banka. Aye nkutenteka ooso a kwabadi maasa, nkwibapaasha booso.” (Luka 4:40) Eyendo, sunga byekala shi abadi na maladi a mushindo kinyi, Yesu badi mwibakwashe, anka bibabadi batemukye. (Yeeshaya 53:4) Badi mupaashe mpa na baba abadi bakwatshibwe na bikudi bibi. Nsaa ibadi ayituuku bikudi bibi bibadi abyele misaase shi: “We Mwan’Efile Mukulu.” (Luka 4:41) Kadi Yesu nkwibisaashila na tabadi mwibitadiile bwa shi byakule dimo nya. Bikudi bibi bibadi bishinkamishe shi Yesu nyi Kidishitu, na t’akumiina shi baleeshe bu’bo bakwete kufubila Efile a binyibinyi.