Nsaa ibadi bangi beena Yuuda bafunde Yesu shi takwete kunemeka Sabato mwanda wa shi bapaasha muntu, Yesu balulwile shi: “Shami afubu mpaa na binobino, n’ami nanfubu.”—Yowano 5:17, Kilombeeno kipya 2014.

Mwiya w’Efile Mukulu tangutunyishe uno mwanda ubakitshi Yesu mwifuku dya Sabato nya. Mudimo waye wa kulambukisha na kupaasha basha maladi nyi nkwambula mifubo ibuwa y’Efile Mukulu. Nyi bwakinyi Yesu kwete nka kutungunuka na kukita bibuwa efuku dyoso. Mushindo ubadi aluula ku myanda ibabadi abamufundu, ubadi awibafiitshisha munda kukila kumpala, na ababangile kukimba bya kwipaa Yesu. Bwakinyi?

Kukatusha kilubilo kya mmweneno abo pabitale kupela kwa Yesu kwa kunemeka Sabato, abamono dingi shi, kwakula kwa Yesu kwashi mMwan’Efile Mukulu, kubadi kukutwa kwa kaneemo. Mu kwabo kumona, byabya abyamba Yesu shi Efile Mukulu Nshaye, bi nka bu kumusabuula, mwanda kwamba Yehowa shi Nshaye, bi nka bu bakula shi aye e kya mumune n’Efile Mukulu. Mpa na lwalulo lwaye alulesha ingi myanda itale kwipushena kukata kwi pankatshi p’aye n’Efile Mukulu. Bambile shi: “Yaaya mmufule Mwana, dingi amulesha bintu byooso byakitshi.”—Yowano 5:20.

Yaaya nyi Apeshenaa muwa, na badi mwibileshe pabadi mupe bantu bukome bwa kusangusha bafwe. Yesu atungunuka shi: “Mwanda nka bu bi Yaya abuusha bafwe na ebapa muwa, anka biabia namu Mwana apeeya baba bakumiina muwa.” (Yowano 5:21, Kilombeeno kipya 2014) Ano mayi ee na muulo ukata, aatusha lukulupilo bwa mafuku e kumpala! Sunga mbinobino, Mwana kwete kusangusha baba bafwe mu kikudi. Nyi bwakinyi, Yesu amba shi: “Eyendo, neenulungula shi ateemesha bishima byande, na kukumina Muntume, ee na muwa wa ikalayika, takiila ku kiimu, anka bakatuka ku lufu bwa kupeta muwa.”—Yowano 5:24.

Mpa na mu yaaya nsaa, tabadi mubande kusaangula muntu su ngumune mupwe kufwa nya; sunga mbyabya, balungwile baba bantu shi lusangukilo lwi kwanka. Bakwile shi: “Nsaa ayikafiki ayikapusha booso be mu manyembo eyi diaye; na abakatuuka.”—Yowano 5:28, 29, Kilombeeno kipya 2014.

Sunga mbibadi Yesu na mufubo ukata, baleesheshe patooka shi Efile Mukulu mmumukile, p’aye kwamba shi: “Ntshi mulombeene kukita kintu sunga nkimune, ami, mu’mi nabene nya. . . . Ntankimbi kikyebe ki’eshimba diande nya, anka kikyebe ki’eshimba dia yawa muntume.” (Yowano 5:30) Yesu baleesha bwa musango wa kumpala patoka mudimo wadi nao mu mpàngo y’Efile Mukulu. Kadi baba abadi abafundu Yesu abadi na bungi bukamonyi pabitale yaaya myanda. Yesu bebatentekyeshe shi: “Nubadi batume bantu kwi Yowano [Mubatshishi], aye nkukita bu kamonyi bwa binyibinyi.”—Yowano 5:33.

Pangi bano bantu bakwete kufunda Yesu abapwile kupusha takudi bipwa peepi bibidi, Yowano badi mulungule bakata ba bipwilo beena Yuuda pabitale kufika kwa ungi Muntu kunyima kwaye—badi mwakule pabitale “Mutemuki” na “Kidishitu.” (Yowano 1:20-25) Bwa kwibatentekyesha muulo ubabadi abata nao Yowano e binobino mu lukano, Yesu bambile shi: “Anwe, nubakuminyîne kubanda kusangala mwitâta dyê.” (Yowano 5:35, EEM) Batushishe bukamonyi bukata kukila Yowano Mubatshishi.

Bambile shi: “Mmifubo ibabadi bampe kwi Yaaya bwa kukumbasha, [byabya bibakatuka mu kupaasha muntu] n’eyikitshi, n’ayo ngi ayishinkamisha shi Yaya ngi muntume.” Kukaasha paapa, Yesu atungunuka shi: “Yaya mmutume, mmunkitshiine’ye nabeene bu kamonyi.” (Yowano 5:36, 37) Bu kileshesho, Efile Mukulu badi mutuushe bukamonyi pabitale Yesu pa kubatshishibwa kwaye.—Mateo 3:17.

Mbinyibinyi, baba abadi abafundu Yesu t’ababadi na kabingilo sunga nkamune ka kupela kukookyela mwadi. Bifundwe byabakwete kwisamuna bu’bo abauku, bikwete kutuusha bukamonyi pa mwanda waye. Yesu badi mufudiishe shi: “Mwanda, su nubadi bakumiine Moyiise, nubady’a kunkumiina, mwanda mpa mwanda wande pabadi mufunde. Su t’anukuumiina kyaadi mufunde, mbii-kunyi byanudi balombeene kukumiina kyangamba?”—Yowano 5:46, 47.