Yesu bakatuka mu kufuba efuku dishima. Kunyima kwa lwendo lwa kukatuka ku Dekapole, bapaashishe mukashi badi na mukumbo wa mase akupu asangula mwana a Yayiluse. Anka efuku tadyabandjile kukila nya. Yesu nka kyakatuka kwa Yayiluse, bampofu babidi abamulondo na kwela misaase shi: “Etufwile lusa Mwana aa Daviide.”​—Mateo 9:27.

P’abo kwitanyina Yesu bu “Mwana aa Daviide,” baba bantu abadi abakumiina shi Yesu mpyanyi a ku lupuna nsulu lwa Daviide na mwikale dingi Mesiya. Yesu bakitshine bu shi mupushe misaase yabo, pangi bwa kutala su abatungunuka na kwitanyina, abo nkutungunuka. Pabatwelele Yesu mu nshibo, bano bantu babidi abamulondele mwamwa. Yesu nkwibepusha shi: “Anukumiina shi ne mulombeene kukita byaabya’nyi?” Abo nkumwalula shi: “Oolo, Mwanaana.” Yesu bakumine meeso aabo aye nkwakula shi: “Biinukitshikile muyile lukumiino lwenu.”​—Mateo 9:28, 29.

Abamwene musango umune! Nka bu bibapwile kulungula bangi, Yesu bebatosheshe bwa kupela kupalakasha bibakitshine. Kadi bu byabadi na muloo ukata, abapalakeshe mukandu mbalo yoso.

Pabakatukile bano bantu babidi, bantu abatwadile mwana mulume shibadi akula mwanda badi na demo. Yesu babingile demo, yawa mwana nkubanga kwakula musango umune. Kibumbu kya bantu kibasangeele akyo nkwakula shi: “Kasha tabamwene kintu ki bino mu Isaleele.” Bafadisee abadi panka. Tababadi bya kupela kilengyeleshi nya, kadi mwanda wa mashimba apape abakimbile kwelesha mpaka pabitale akutukila bukome bwa Yesu pa kwakula shi: “Nyi nfumu a bikudi bibi amupa ano matalwe a kubinga nao bikudi bibi.”​—Mateo 9:33, 34.

Kunyima kwa kapindji, Yesu balukiile kwabo ku Nazarete pamune na balondji baye. Balongyeshe mu kitumbwilo takudi mafuku afikye ku kipwa. Bantu abadi basangale na bibakwile, anka abakimbile kunyima kutombokyela malongyesha aaye na kukimba kumwipaa. Binobino Yesu apimi dingi kukwasha bena mutumba naye.

Mwifuku dya Sabato, balukile mu kitumbwilo bwa kulongyesha. Bantu bebungi abakanya na kwiyipusha shi: “A kino kinangu naa bino bipaso mmwibisokwele kunyi? Ta mwana a nsèèshi a mabaya su? Nyinaaye tabamwitaanyinaa bu Maariya na bakwabo balume, ta mba Jaake, Yoosefe Simone na Yuudase su? Bakwabo bakashi booso ta be munkatshi mwetu su? Byabya, bino byoso mmwibipetele kunyi?”​—Mateo 13:54-56.

Bantu abamonga shi Yesu badi penda mwan’akibundji. Abadi abakula shi: ‘Twi bamumone kwakulu, nkipaso kinyi kyadi mulombene kwikala Mesiya?’ Sunga kwekala byabya bishinkamisho byoso—pamune na kinangu na mifubo ya kukaanya—abadi bamubepuule. Pa mwanda wa kipwano kyabo kya kifuko na Yesu, mpa na bakwabo abadi bamukokoshe bibamutwakwile na mu kwakula shi: “Mutemuki abamupeeshaa anka kwabo na mu kifuko kyaabo.”​—Mateo 13:57.

Kushi mpaka, Yesu bakanyine p’abo kukutwa lukumiino. Tabakitshine kilengyeleshi su nkimune, “anka bapaashile kasaka kapeela ka ba-sha-mikumbo, pa kwibatenteka maasa.”​—Maako 6:5, 6.