Yesu badi mukite bintu bibungi mu mudimo waye ukata mu Ngalileya. Kadi, pabakwile shi: “Abituungu ndungule mukandu wi buwa wa Bufumu bw’Efile Mukulu ku bingi bibundji,” Yesu badi esambila bwa bingi bibundji kushi nka penda Ngalileya. Nyi bwakinyi bayile “na balungulanga [mukandu wi buwa] kwi bantu mu bitumbwilo bia mu [Yudeya].” (Luka 4:43, 44, Kilombeeno kipya 2014) Bino mbilombane, mwanda kipungo kya printemps kibalombana na nsaa ya musangeelo wa mu Yelusaleme ikwete kwifubwila peepi.

P’atupwandjikisha na byatubadika pabitale mudimo wa Yesu mu Ngalileya, atusangana shi ma Evanjile aakwila wawa mudimo ngofu kukila mudimo wa mu Yudeya. Sunga byekala shi bantu be bungi ba mu Yudeya ta mbamutambule kalolo, tabibadi biimikye Yesu bwa kulambukisha na kisumi kyooso na kukita bilengyeleshi mbalo yaadi nya.

Mu kapindji kapeela, Yesu bende ku Yelusaleme mu kibundji kikata kya Yudeya bwa Kidibwa kya lukilo kya mu kipwa kya 31 B.B. Mu mbalo i bantu bebungi peepi na kitwelelo kya mikooko, pabadi na kishiba kimune kibabadi abetamine bu Betesata. Basha mikumbo be bungi, ba mpofu, na balemane abafikile ku kyakya kishiba. Bwakinyi? Mwanda abadi bakumiine booso shi bantu mbalombeene kupaashibwa su abeyinyi nka penda mwishiba su meema ababanga kwela mbunda-mbunda.

Dino nyi efuku dya Sabato, na Yesu nkumona muntu ku dyadya eshiba badi akumbu takudi bipwa 38. Yesu nkumwipusha shi: “Okyebe kupanda su?” Yawa muntu nkumwaluula shi: “Mwanana, ntshii na muntu a ku ngyela mwishiba, nguba abanga kwifuluula meema; dingi nguba a kwimwenda, ungi muntu ayiki kumpala kwande.”—Yowano 5:6, 7.

Yesu nkwakula kintu kibadi kikaanyishe yawa muntu mpa ka na ooso bamupushiishe shi: “Ebwe! Ata kisala kyobe wende.” (Yowano 5:8) Na yawa muntu bakitshine nka byabya. Musango umune badi mupande, aye nkwata kisala kyaye, nkubanga kutambuka!

Pamutwe pa kusangala bwa mwanda wibuwa ubakitshika, beena Yuuda abamo yawa muntu abakula shi: “Lelo [efuku] dia Sabato; tankukupebwe matalwa a kusemuna kalusala kwobe nya.” Yawa muntu nkwibaluula shi: “Yawa bampaasha, aye yawa bangamba shi: ‘Ata kalusala kwobe, na tambuka.’” (Yowano 5:10, 11, Kilombeeno kipya 2014) Baba beena Yuuda abakulanga bi bubi bwa muntu apaasha mwifuku dya Sabato.

“Mmuntu kinyi yawa bakulungula shi: ‘Ata kisala kyoobe, wende’?” Abadi bakyebe kuuka. Bwakinyi abayipusha yawa muntu byabya? Mwanda Yesu badi “mwitoole kula na kisaka,” na muntu abapashiishe tabadi auku eshina dya Yesu. (Yowano 5:12, 13) Kadi uno muntu akumiina kwimoneena dingi na Yesu. Kunyima, mu ntempelo, yawa muntu nkufumankana na Yesu na aye nkuuka bu muntu bwa yawa bamupashiishe ku kishiba.

Yawa muntu abapashiishe bayile mu kumona beena Yuuda abadi bamwipushe pabitale kupaashibwa kwaye. Aye nkwibalungula shi yawa muntu nyi Yesu. P’ababapusha nka byabya, beena Yuuda abende kwi Yesu. Omono shi abende bwa nkauka shi nku bukome kinyi kulombene Yesu kukita byabya bilengyeleshi? Nya. Abende mu kutombokyela Yesu mwanda wa shi bakitshi myanda ibuwa mwifuku dya Sabato. Na ababangile kumubingabinga!