Mukandu wa kwalukila kwa Yesu ku Dekapole ubapalakana kwi beena Yuuda abadi bashale pankatshi pa kunundu na kutunduka nguba kwa efwa dya Kalunga ka Ngalileya. Abimweka shi bebungi babapushishe bwa kipapi na meema bibadi Yesu mubatamishe, bangi abadi bapushe shi bakatuka mu kupaasha muntu mukwatshibwe na mademo. Nka paapa, “kisaka kikata kya bantu” kibebungile peepi naye dya ku kalunga, pangi bibadi mu Kapernaume, bwa kukukila Yesu balukila. (Maako 5:21) Pabafikile na bwato kwifwa, bantu abadi na muloo abakimbi kumumona.

Yayiluse umune a kwabadi badi nfumu ku nshibo ya nteko, pangi ya mu Kapernaume, badi akumina naye namu kumona Yesu. Baponene ku ngwa yaaye abanga kumusendela ngofu shi: “Mwan’ande mukashi, e peepi na kufwa; nankutekye namu ofikye na omutentekye maasa bwa’shi apaashiibwe, n’ekale na muwa.” (Maako 5:23, Kilombeeno kipya 2014) Yesu balulwile naminyi ku bibamutekyele Yayiluse bwa kupaasha mwan’a ye eeleka badi penda na bipwa 12 abadi mufule ngofu?—Luka 8:42.

Pabadi Yesu kwete kwenda ku nshibo ya Yayiluse bafumakene na ungi mwanda awukwatshisha lusa. Bebungi abadi abende na Yesu abadi na muloo ukata, abeyipushanga su abapete dingi mwabi wa kumumona kwa kitshi kingi kilengyeleshi. Byabya, ungi mwana mukashi badi munkatshi mwa kibumbu badi ekalakasha bwa mukumbo waye ukata.

Munda mwa bipwa 12 uno mwana mukashi mwina Yuuda badi na mukumbo wa kushimisha mase. Badi mufwambukye bikata kwi ba minganga bebungi, dingi badi mupaane kooso kabadi nako. Kadi tabapetele bukwashi nya. Anka maladi “abadi aatama.”—Maako 5:26, Kilombeeno kipya 2014.

Anka bu byouku, kukatusha kumukookyesha, ano maladi abadi dingi aamukyengyesha bikata na kumukwatshisha buufu. Kebungi aa maladi aekalaa buufu kwialungula bantu. Bikishekishe mu Mwiya wa Moise, kushimisha kwa mase kubadi akwikasha mwana mukashi butete. Ooso muntu akumukuma sunga kukuma kilamba ki na mase aye, etumpu meema na ekala butete nyaa na kukyolwa.—Beena-Levi 15:25-27.

Uno mwana mukashi “bapushishe kubabadi abesamba pabitale Yesu,” binobino bamumono. Mwanda wa kukutwa kutoshibwa kwaye, bakidile dya kumongo mu kisaka kya bantu aye nkwiakwila shi: “Su nakakuma sunga bilamba byaye napanda.” Pabadi mukume lwembe lwa kilamba kya Yesu, musango umune, kushimisha kwaye kwa mase kubatshibikile! Aye nkupusha mu mbidi mwaye shi: “bapanda ku mukumbo waye.”—Maako 5:27-29.

Akupu Yesu bepwishe shi: “Nnanyi yawa bankumu?” Opwandjikisha shi yawa mwana mukashi bapushishe naminyi ku aa mayi a Yesu? Mpyeele beeleshe Yesu npaka aamba shi: “Bantu mbaba bakwele efina [na kukutakula].” Byabya mbwakinyi wepusha shi, “Nnanyi yawa bankumu?” Yesu nkupatula shi: “Muntu bankumu, napusha binyibibinyi shi bukome bubatuku munda mwande.” (Luka 8:45, 46) Eyendo, kupashibwa kwa uno mwana mukashi kubakitshika penda ku bukome bubatuku mwi Yesu.

Pabamwene shi takubadi kipaso kya kufwama, yawa mukashi bafikile na kusuusa na moo ku ngwa ya Yesu. Ku meeso kwa bantu booso badi mwakule bya binyibinyi pabitale maladi aye na bibapanda. Yesu badi mumunyingishe na kalolo kooso shi: “Mwan’ande mukashi, lukumino loobe lubakupaasha. Nda mu butaale, bopaanda ku busungu boobe.”—Maako 5:34.

Bibamweka patoka shi uno muntu abadi basangule kwi Efile bwa kumunana mmwikale muntu sha kalolo, n’eshimba dya lusa, mmuntu shi mufudiile penda mu kupasukila bantu nya, anka, e na bukome bwa kwibakwasha.