Pabadi Yesu alongyesha bantu mu kibalo kya Kezaree a Fidipe kibadi mu bilometre bifikye ku 25 kukatuka ku Mwengye wa Hermone, Yesu balungwile batumiibwa baye mwanda wa kukanya shi: “Binyibinyi, neenulungula shi; munkatshi mwa bano bee pano, bangi taabakafu kumpala kwa kumona Mwan’a-muntu afiki bu nfumu-mukata.”—Mateo 16:28.

Balongi abadi na kya kwiyipusha kibadi akyekyebe kwakula Yesu. Kunyima kwa pangi lubingo, batshile Mpyeele, Shake na Yowano, basatu ba ku batumiibwa aye nkukamina nabo ku mwengye wibula. Bibadi pangi munkatshi mwa bufuku pabadi booso basatu balaale. Pabatekanga Yesu, badi mwilenguule kumpala kwabo. Batumiibwa nkumona mpala yaaye ayipenyapenya nka bu nguba na bilamba byaye nkubadima nka bu etaata, byoso nkufika nka selele.

Akupu, ako nkutuka mapala a bantu babidi “Moyiise na Eliya.” Abo nkubanga kwisamba na Yesu pabitale ‘lwendo lwaye lwa ku Yelusaleme.’ (Luka 9:30, 31) Luno lwendo lubadi pabitale lufu na lusangukilo lwa Yesu lubakatukile mu kwisamba. (Mateo 16:21) Uno mwisambo aushinkamisha shi, mu kwilekeena na bibamonanga Mpyeele, lufu lwa Yesu lwa kuyishibwa milongo talubadi mwanda wa kusuuka nya.

Binobino batumibwa basatu abapasuka, abatala na kupusha mwanda wa kukaanya. Kibadi kimonwa, kadi Mpyeele bamwene bu mwanda wa binyibinyi na kukimba kwisanga mu mwisambo pa kwakula shi: “Laabi, bibuwa atwe kushaala kuno. Na tukite tushibo twa mapema tusatu: kamune nkobe na kamo nka Moyiise, kamo namu nka Eliya.” (Maako 9:5, Esambi dipya) Mpyeele bakuminanga shi bebakye tushibo twa mapema bwa shi kimonwa kitungunukye su?

Pabadi Mpyeele kyakula, ekumbi adipenyapenya dibadi dibabwikile, eyi nkwimutuka shi: “Uno nyi Mwan’ande a kifulo kikata nee na muloo pa mwanda we. Muteemesheeyi.” P’abo kupusha eyi dy’Efile Mukulu, moo ubakwatshile batumibwa, abo nkupona kumpala kwabo, anka Yesu bebalungwile shi: “Ebweyi! Lekayi moo!” (Mateo 17:5-7) Pabababushishe meeso abadi bamone nka penda Yesu. Kimonwa nkupwa. Butookye p’ababadi abayiki ku mwengye, Yesu bebalungwile shi: “Tanulungulanga muntu sunga umune p’abitala bibeleesha kwanudi, nyaa naa apasangukila Mwan’a-muntu ku bafwe.”—Mateo 17:9.

Kumweneka kwa Eliya mu kimonwa kubatakwile batumiibwa mu kwipusha shi: “Bwakinyi namu bafundji ba mikanda abakula’shi, abikyebe Eliya afikye kumpala?” Yesu bebalulwile shi: “Eliya tapwile kufika, na tambamuwukye nya.” (Mateo 17:10-12, Kilombeeno kipya 2014) Yesu badi akwila bwa Yowano Mubatshishi badi mukumbashe mudimo wifwane na wa Eliya. Eliya balumbulwile eshinda bwa Elisha, Yowano namu balumbulwile eshinda bwa Kidishitu.

Kino kimonwa kibadi kikankamikye Yesu na batumibwa baye bikata! Kibalesheshe kapela ntumbo ya Bufumu bwa Kidishitu. Byabya batumibwa abamwene “Mwana a muntu afiki buu Nfumu-mukata,” bu bibabalayile Yesu. (Mateo 16:28) Pababadi bakii ku mwengye, abamwene ‘ntumbo yaye yooso na meeso aabo.’ Sunga byekala shi Bafadisee abatekanga kitundwilo akilesha shi Yesu nyi Nfumu abadi basangule nkwi Efile, tabadya kwibapa kyanka nya. Kadi batumibwa ba lulamato ba Yesu abadi bamone kwilenguula kwa Yesu, akushinkamisha matemuki a Bufumu. Nyi bwakinyi Mpyeele bafundjile kunyima shi: “Twi na eyi dia butemuki dishinkamishwe bikata.”—2 Mpyeele 1:16-19.