Mu dingi efuku mu Sabato, Yesu bayile mu kitumbwilo, nkilombeene kwikala kya ku Ngalileya. Kwakwa aye nkusangana muntu e na eyasa dibalume dyume. (Luka 6:6) Balambukishi ba bishila na Bafadisee abaadi abatala nka Yesu. Bwakinyi? Abalesheshe bibaadi mu mashimba mwabo nsaa ibabamwipwishe shi: “Mbipeebwe matalwa a kupaasha [muntu], efuku dia Sabato su?”—Mateo 12:10, Kilombeeno kipya 2014.

Bakata ba bipwilo bya beena Yuuda abakumiinaa shi abitungu kupaasha muntu mwifuku dya Sabato anka su muwa waye wi mu masaku. Bu kileshesho, mu Sabato bi bubi kuludika muntu mufufwa sunga kwanya kilamba pa mbalo i kiulwa, mwanda yaaya myanda t’ayituulu muwa wa muntu mu masaku nya. Bibaadi bimwenekye patooka shi, balambukishi ba bishila na Bafadisee tababaadi abayipusha Yesu pa mwanda wa shi, bakwete kwituula pa mbalo ya yawa muntu akengye nya. Abaadi abakimbi kabingilo ka kutopeka nako Yesu.

Kadi, Yesu baadi ashinguula binangu byabo bi bubi. Aye nkushinkamisha shi abaadi na binangu bi bubi bukile, na bino binangu ta bipusheena na bifundwe pabitale kwipaa kwa mwiya utale kya kukita mwifuku dya Sabato. (Efilu 20:8-10) Yesu bapwile kufumankana na ino myanda ya twipu mu mifubo yaaye ibuwa. Binobino Yesu nkwakula mwanda ubaadi wibatakule bwashi babangye kwikakeena naye dingi ngofu p’aye kulungula yawa muntu baadi n’eyasa dyume shi: “Ebwe ofikye munkatshi muno.”—Maako 3:3.

Pabaadi mwifunye kwi balambukishi ba bishila na Bafadisee, Yesu bakwile shi: “A nanyi muntu a munkatshi mwenu, a kwikala na mukooko umune, su wapona mu bwina efuku dia Sabato, a kupela kwiukwata na kwiwabula paasha?” (Mateo 12:11, Kilombeeno kipya 2014 ) Bu byabadi balombeene kupaana wawa mukooko na kupeta makuta, ta mbalombeene kwiuleka mu bwina mpa na butookye; ngulombeene kufwa na bashimisha. Na dingi, Bifundwe abyamba shi: “Mululame awuku akitungiibwa bwa kimunwanga kyaaye.”—Nkindji 12:10.

Bwa kuleesha kwipusheena, Yesu atungunuka na kwakula shi: “A mmisuusa bungi kinyi yabadi bakile mukooko kwi muntu! Byabya mbakumiine kukita mwanda wibuuwa efuku dya [Sabato].” (Mateo 12:12) Byabya, Yesu tabadi mwipee mwiya pa kupasha muntu mwifuku dya Sabato nya. Bakata ba bipwilo abakutshilwe kya kwakula bwa kupela kino kikitshino kibuwa na akileesha lusa kwi bantu. Abo nkushala baumiine kushi kwakula.

Bwa kuleesha shi ta mmusangeele na bibamukalakasha ngofu pa mwanda wa yawa ngelelo abo a binangu e bubi, Yesu bebatadile booso. Akupu aye nkulungula yawa muntu shi: “Wola eyaasa.” (Mateo 12:13) Pabaadi yawa muntu moolole eyasa, adyo nkwalukiila mwadyo. Uno muntu nkupusha muloo wibungi, kadi bano abaadi batee Yesu kasele abapushishe naminyi?

Pa mutwe pa kwikala na muloo nka bi uno muntu sh’eyasa dibalukiila mwadyo, Bafadisee nkutuuka na nkubanga kudya kifufu musango umune “na beena-Erode, bwa kukimba kipaso kya kumushimisha.” (Maako 3:6) Bibamwekyele patooka shi mpa na bantu ba mu lulangwilo lwabetamina bu Baasaduseo abaadi mu lwalwa lukuku. Baasaduseo na Bafadisee tababaadi bepusheene nya, kadi binobino, abebungu kintu kimune bwa kubanga kukyengesha Yesu.