Yesu na balongi baye abafiki mu Betsaide. Bantu abatwala muntu mpofu kwi Yesu na kumuteka bwa shi amupaashe.

Yesu bakwatshile yawa muntu kwiyasa, aye nkutuuka naye paasha pa kibundji. Kunyima kwa’ye kumusampa mata mu meeso, Yesu bamwipwishe shi: “Omono kantu kinyi?” Yawa muntu nkumwalula shi: “Namono bantu, neebamono buu mitshi aitambuka.” (Maako 8:23, 24) Yesu nkutuula yawa muntu maasa ku meeso, aye nkubanga kumona. Akupu aye nkumwalusha ku nshibo kwete kumona kalolo, amulungula bwa kupela kutwela mu kibundji.

Kunyima Yesu na balongi baye abayile dya kuushi kwa kibalo kya Kezaree a Fidipe. Lubadi lwendo lwibula lwi kufika bilometre bifikye ku 40. Kibundji kibadi mu metre 350 kunundu kwa mwengye mu bula bwa kalunga, pa bwipi na Mwengye wa Ermone uwule na mulemba dya kunundu kwa kutunduka. Lwawa lwendo lubadya kwibata pangi mafuku abidi.

Pabadi mwishinda, Yesu badi mwikumbe ku lupese bwa kuteka. Pa kubashele myeshi ifikye ku kitema sunga ekumi kumpala kwa lufu lwaye, Yesu babangile kwikalakasha bwa balongi baye. Bebungi abapwile kuleka kumulonda anka bangi namu abadi mu kabuulubuulu sunga batshobolokye. Abadi pangi abeyipusha bwakinyi Yesu bapelele kwitatshisha kwa bantu bwa kumutuula bu nfumu sunga bwakinyi bapelele kukita kitundwilo bwabadya kumwiuka kalolo.

Pabafikile balongi mbalo ibadi atekye, Yesu bebayipwishe shi: “Mu kwisamba kwa bantu Mwan’a muntu nnanyi?” Abamwalulwile shi: “Bwa bangi Yowano Mubatshishi, bwa bamo Eliya; bwa bangi dimo Yeelemiya sunga umune a ku batemuki.” Eyendo, bantu abapwandjikishanga pangi shi Yesu ngumune a ku bano bantu basanguka ku lufu. Bwa kukaka binangu byabo, Yesu bebayipwishe shi: “Anwe namu anwamba shi neenyi?” Mpyeele bamwalulwile musango umune shi: “We Kidishitu, Mwan’Efile Mukulu atala.”—Mateo 16:13-16.”

Yesu bambile shi Mpyeele badi na kya kwikala na muloo bibamufumbwila Efile Mukulu pa kwakula shi: “Ami namu nakushikwila shi: We Ebwe, na pa dino ebwe nakaibaka kipwilo [kakongye] kyande, bukome bwa Lufu t’abukeekikambila nya.” Yesu akula shi aye nabeene akitshi kakongye kabashabakakambila sunga kwi bukome bwa Lufu su bantu be mwanka abashala na lulamato pano pa nsenga. Badi mulee Mpyeele shi: “Nakupa nfungula ya Bufumu bwa mwiyilu.”—Mateo 16:18, 19.

Yesu tatuulu Mpyeele pa mbalo ya kumpala munkatshi mwa batumibwa nya, sunga kumutuula bu kitako kya kokongye. Yesu aye nabene nyi mwikale Lubwebwe lwabebakila kakongye kaaye. (1 Beena-Kodinda 3:11; Beena-Efeso 2:20) Binobino Mpyeele apete nfungula isatu. Eekala na matalwa a kufungula, kwamba shi kupa bisaka bya bantu ngobesha ya kutwela mu Bufumu bwa mwiyilu.

Mpyeele badi na kya kufubisha lufungula lwa kumpala mu Pantekote a kipwa kya 33 B.B., pabadi muleeshe beena Yuuda na bantu ba bingi  bisamba abelanga kyabadya kukita bwa kupashibwa. Badya kufubisha lwa kabidi bwa kufungwila beena Samadiya abakumiina mushindo wa kutwela mu Bufumu bw’Efile Mukulu. Akupu mu kipwa kya 33 B.B., Mpyeele badi na kya kufubisha lufungula lwa kasatu bwa kupalakasha wawa mushindo kwi beena bingi bisamba bashii basadiibwe bu Korneye na bangi.—Bikitshino 2:37, 38; 8:14-17; 10:44-48.

Mu uno mwisambo, batumibwa abatapikile ku mashimba pabadi mwibalungule makyenga na lufu lwakyebe kupeta mu mafuku apeela mu Yelusaleme. Kushii kushinguula shi Yesu akyebe kusanguka na muwa wa mu kikudi, Mpyeele bamwatshile ku lupese amutopeka shi: “Efile Mukulu akukumbe kwanka Mwanana! Nya, kyakya taakikukitshikila!” Anka Yesu badi mwialuule amulungula shi: “Ekumbe! Kila kumongo kwande Kafilefile’be! We kikokoshi kyande, mwanda koobe kumona tankw’Efile Mukulu, nkwa bantu.”—Mateo 16:22, 23.”

Binobino Yesu nkwitamina bangi kukatusha batumibwa na kwibalugula shi taabikekala bibofule bwabadya kwikala balongi baye nya. Bambile shi: “Apakyebe muntu kundonda, eepele aye nabeene, asemune [mutshi waye wa makyenga] ngi andonde. Mwanda, akyebe kupaasha muuwa waye akeushimisha; anka ashimisha muuwa waye bwande’mi, naa bwa mukandu wibuwa, eeupaasha.”—Maako 8:34, 35.

Bino abilesha shi bwa kukuminyibwa na Yesu, abitungu balongi baye beekale banyingye mashimba na kwipaana bwa bangi. Yesu bambile shi: “Su muntu e na buufu pa mwanda wande na wa mukandu wande munkatshi mwa beena kino kipungo kya bantu beebubi na ba-sha milwisho, Mwana a muntu naamu akamupusha buufu nguba afiki mu ntumbo ya Nshaye na miikeyilu iselele.” (Maako 8:38) Eyendo, apakafiki Yesu, “akafutu muntu ooso muyile bikitshiino byaaye.”—Mateo 16:27.