Takudi pangi kipwa kimune n’abo kwela Yowano Mubatshishi mu lukano. Sunga eekala mwamwa, kwete nka kupusha nkumo ya bilengyeleshi bya Yesu. Banda kunangushena bibadi Yowano mupushe p’abo kumulungula kwi mulongi aaye shi Yesu basangula mwana a mukashi kilele ku lufu mu Naine. Anka, Yowano akumina kupusha Yesu nabene amulungule akipatuula byabya byoso. Nyi bwakinyi Yowano batumu balongi baye babidi kwi Yesu. Bwakinyi? Abayile bwa kwipusha Yesu shi: “Nnoobe winyi aatutengyelanga’nyi twi naa kya kwindjila mungi?”​—Luka 7:19.

Luno lukonko lwi nkukemesha? Yowano mmuntu mwilambule, pabadi mubatshishe Yesu takudi binobino pangi bipwa bibidi kunyima, bamwene bibadi kikudi ky’Efile byakibadi kiikile Yesu na bibatukile eyi dy’Efile Mukulu dya kukumina Yesu. Tatwi na kabingilo ka kwamba shi lukumiino lwa Yowano lubabofula nya. Su mbyabya Yesu tabadya kukaanyisha Yowano nya, bu bibebikitshi uno musango. Kadi su Yowano tabadi na mpaka, bwakinyi badi mwipushe Yesu luno lukonko?

Yowano badi akumina penda kushinkamisha musango umune shi Yesu nyi winyi Mesiya. Bino bibadya kunyingisha Yowano nsaa y’akyengye mu lukano. Na abimweka shi lukonko lwa Yowano lubadi na kangi kabingilo. Badi auku shi matemuki a mu Bible abadi aalesha shi Yawa Mushingwe mwimu a Efile Mukulu badya na kya kwikala nfumu na mukuudi. Aku namu, myeshi ibungi kunyima kwa Yesu kubatshishibwa Yowano badi nka mu lukano. Nyi bwakinyi badi eyipusha su kwi ungi afiki, mpyanyi a Yesu, bu byabibadi, akalombasha byooso bibabadi besambile bwa shi Mesiya alombashe.

Pamutwe pa kulungula penda balongi ba Yowano shi: ‘Nami winyi yawa muntu,’ Yesu badi mutuushe bishinkamiisho abileesha shi nyi nkubukwashi bw’Efile Mukulu kubadi apaasha bantu ba mishindo yooso. Kunyima aye nkulungula balongi baye shi: “Ndaayi nulungule Yowano bibanupusha naa bibanumono. Ba mpofu abamono, balemane abatambuka balulame, [ba-sha-nsudi] abapaashibwa, ba-sha-kitwi abapusha, bafwe ababuuku, mukandu wi buwa aulungulwa balanda.”—Mateo 11:4, 5.

Pangi Yowano bayipusha byabya mwanda anangushena shi Yesu akakitshi myanda i bungi kukila ino ya kwete kukita binobino, na mulombeene pangi mpa na kumutuusha mu lukano. Kadi, Yesu, alungula Yowano shi takumanga kunangusheena shi akitshi bilengyeleshi kukila bino byakwete kukita binobino.

Nsaa ibakatukile balongi ba Yowano, Yesu badi mushinkamiishe kibumbu kya bantu shi Yowano mmukile mutemuki. Mmwikale “mukyendji” wa Yehowa ubadi Malaki 3:1 mutemukye. Mwikale dingi Eliya mutemuki nka bu byabadi bebyakule mu Malaki 4:5, 6. Yesu apatuula bino: “Binyibinyi nenulungula patooka shi, munkatshi mwa booso batandwe kwi bakashi, ta nkutuukye mukile Yowano Mubatshishi, kutala namu, mukile bupeela mu Bufumu bwa mwiyilu mmumukile kineemo.”—Mateo 11:11.

P’aye kwakula shi mukile bupeela mu Bufumu bwa mwiyilu mmumukile Yowano kineemo, Yesu badi aleesha shi Yowano t’akekala mu Bufumu bwa mwiyilu. Yowano badi mulumbuule eshinda bwa Yesu kadi bafwile kumpala kwa shi Kidishitu afungule eshinda dya mwiyilu. (Beena-Ebelu 10:19, 20) Yowano mwikale mutemuki sha kululama a Efile Mukulu na akekala mu Bufumu bw’Efile Mukulu pa nsenga.