Beshikwanyi bena bipwilo abakutshilwe kukwata Yesu mu muteo sunga kumukwatshisha buufu bwa kumutwala kwi beena Looma. (Luka 20:20) Binobino pabadi kii mu ntempelo mwifuku dya 11 mweshi wa Nisane, Yesu badi mwibatweshe mu kafutakanyi pa kulesha bumuntu bwaye patoka. Batshile mpàngo ya kwibepusha shi: “Nkinangu kinyi kyanudi nakyo pabitale Mesiya? MMwana aa’nyi?” (Mateo 22:42) Abadi batushe lwalulo shi: Abiwukibwa kalolo shi Kidishitu sunga Mesiya badi na kya kwikala mu mulongo wa kifuko kya Daviide.—Mateo 9:27; 12:23; Yowano 7:42.

Yesu bebayipwishe shi: “Byaabya mbii-kunyi Daviide, ku bukwashi bwa kikudi, amwitaanyina buu Mwanaana pa kwamba shi: ‘Yehowa badi mulungule Nfumwami’shi: “Shikama ku mboko ilume yande, nyaa na pankatudila balwishi boobe muushi mwa ngwa yoobe”’? Byaabya su Daviide amwitanyina buu Mwanaana, mbi-kunyi byadi mwana aaye?”—Mateo 22:43-45.

Bafadisee abashadile baumiine, mwanda abakulupilanga muntu a mu kifuko kya Daviide badi na kya kwibakuula kwi beena Looma. P’aye kutemune mayi a Daviide e mu Misambo 110:1, 2, Yesu bashinkamishe shi Mesiya badi na kya kwikala mutabukile bukunkushi bwa muntu. Aye mmwikale Mwanaana a Daviide, na kunyima kwa kushikama ku mboko ilume y’Efile Mukulu, akyebe kufubisha matalwa aaye. Lwalulo lwa Yesu lubelele beshikwanyi naye meema mu kanwa.

Balongi na bangi bantu bebungi abadi abateemesha. Binobino Yesu balulukile kwabadi, aye nkwibadimusha pabitale bafundji na Bafadisee. Baba bantu abadi “beetuule pa mbalo ya Moyiise” bwa kulambukisha Miiya y’Efile Mukulu. Yesu bebalungwile shi: “Lamaayi kyooso kyabadi balombeene kwinulungula, anka tanukumanga kwambula bikitshiino byabo, mwanda abamba, anka taabakitshi nya.”—Mateo 23:2, 3.

Yesu batushishe bileshesho pabitale bu nsensa bwabo pa kwakula shi: “Abelesha pa kutamisha tu misheto mwi ma boose a bifundwe twabafwalaa mu mapala aabo na ku maboko aabo, na pa kwelanga malenda ala ku bikupa bya bilamba byabo bya kufwala.” Bangi beena Yuuda abadi abafwala mu mpala sunga ku maboko tu misheto tupeela tubadi na bifundwe biipi bya mu Miiya. Bafadisee abadi abatamisha twatwa tu misheto bwa kulesha shi be na kisumi bwa Miiya. Akupu, abadi abeele “malenda ala ku bikupa bya bilamba byabo bya kufwala.” Beena Isaleele abadi abeele malenda ku bilamba byabo, anka Bafadisee abadi abeele malenda akile bula. (Mbadiko 15:38-40) Abakitanga byabya byoso “mu kipaso kya’shi bantu bebamone.”—Mateo 23:5.

Sunga byekala shi balongi ba Yesu abakimbanga kwikala na mbalo ya kineemo, Yesu bebalangile shi: “Taanwiyitanyishanga bu Balambukishi, mwanda nwi’nka na Mulambukishi umune, dingi anwe booso nwi bana na bana. Taanwitanyinga muntu pa nsenga bu Nsheenu, mwada nwi na Nsheenu nka umune Yaaya e mwiyilu. Taabenwitanyinanga bu balambukishi mwanda nwi na mulambukishi umune, Kidishitu.” Binobino balongi abadya kwimona abo banabene naminyi na kukita kinyi? Yesu bebalungwile shi: “Mukile bukata munkatshi mwenu ayikale mufubi munkatshi mwenu. Ooso eekamisha ayishibwa, na ooso eeyisha akamishiibwa.”—Mateo 23:8-12.

Kunyima, Yesu belele bafundji bansesa na Bafadisee milwa pa kwakula shi: “Nwi ba-malwa anwe balambukishi ba bishila na Bafadisee ba-sha mpala ibidi, anushikiila bantu kitwelelo kya mu Bufumu bwa mwiyilu! Mwanda anwe banabeene taanwimutwele, taanukuminanga sunga shi bangi bantu abakyebe kwimutwela batwele nya.”—Mateo 23:13.

Yesu badi mutopekye Bafadisee mwanda wa kukutwa kwata na muulo myanda ayikumiina Yehowa bu kwelela bantu miiya ikile bukopo. Bu kileshesho abadi abakula shi: “Su muntu atshipila mwishina dya nshibo ya kishila, tabii na mwanda, anka su atshipila mwishina dya oolo a mu nshibo ya kishila byabya ngi bii na mwanda.” Byabya bibaleshanga byabadi bafwe meeso a mu kikudi, mwanda abadi abata na muulo oolo a mu ntempelo kukila kinemo  kya mbalo ya lulangwilo ya Yehowa. Akupu, abadi ‘abapungakanya kyakya kikile bukata mu Miiya: bululame, lusa na bulamate.’—Mateo 23:16, 23; Luka 11:42.

Yesu badi mwibetanyine bu ‘bakunkushi ba mpofu abakaakula kashiishiidi aku abaminyi kamelo!’ (Mateo 23:24) Abadi abakaakula lushiishiidi mu nfinyo yabo mwanda lubadi butete muyile miiya. Anka, bu bibabadi bakutwe kukookyela miiya mu myanda ikata abadi nka bu abatomena kamelo mu nfinyo yabo, ako kabadi nyema mukata ebutete muyile Miiya.—Beena-Levi 11:4, 21-24.