Kunyima kwa mafuku ekumi na Yesu kukamina mwiyilu, kupongoloka kwa kikudi kiselele mwifuku dya Pantekote kubadi kushinkamishe shi badi binyibinyi mufikye mwiyilu. Kukatusha byabya, kingi kishinkamisho kibadi na kya kumweneka. Kumpala kwa shi baase mulongi Stefane mabwe mwanda wa lulamato lwaye, bakwile shi: “Ngiiwu’mi kwete kubandjila eyilu dishitukye, na Mwan’a muntu mwimane ku mboko ilume y’Efile Mukulu.”—Bikitshino 7:56.

P’aye kwikala na Nshaye mwiyilu, Yesu badi na kya kutengyela bwa shi bamupe matalwa muyile byabadi batemukye mu Eyi dy’Efile Mukulu. Daviide bafundjile ku bukwashi bwa kikudi kiselele shi: “Yehowa batemukila Nfumwami [Yesu] shi: ‘Shikama ku ilume yande, [na pankatudila, NWT] balwishi boobe buu kyaashiino kya ngwa yoobe.’” Pabadi kipidji kya kutengyela kilombane, badi na kya kudya “bufumu munkatshi mwa beshikwanyi [naye].” (Misambo 110:1, 2) Kadi Yesu badi na kya kukita kinyi pabadi atengyela nsaa ya kudya bufumu kwi beshikwanyi naye?

Mu Pantekote a mu kipwa kya 33 B.B., kakongye ka bwina Kidishitu kababangile. Kubanga mwiyilu, Yesu babangile kukunkusha sunga kumunana kwi balongi baye bedibwe mwimu wa mu kikudi. (Beena-Kolose 1:13) Badi mwibakunkushe mu bulungudi bwabo na kwibalumbula bwa mudimo awibatengyela. Mudimo kinyi? Baba abadi na kya kwikala na lulamato mpa na ku lufu, abadi na kya kwikala basangukye bwa kufuba pamune na Yesu bu ba nfumu mu Bufumu bwaye.

Kileshesho kya kukanya kya umune badi na kya kwikala nfumu kibadi kya Saule, badi aukibwa mwishina dyaye dya bwina Looma bu Mpoolo. Badi mwina Yuuda e na kisumi bwa Miiya y’Efile Mukulu, anka abadi abamulubisha kwi bakata ba bipwilo ba bena Yuuda mu kipaso kibadi na mukumine bwabadya kwasa Stefane mabwe. Akupu, pabadi mwishinda bwa kwenda ku Damase, Saule “badi nka kwete kukana kwipayisha balongi ba Mwanaana.” Badi mupebwe matalwa kwi Tshite mwakwidi Mukata e panundu Kayifase bwa kukwata balongi ba Yesu na kwibalusha mu Yelusaleme. (Bikitshino 7:58; 9:1) Anka, pabadi Saule mwishinda, nsembwe ya nguba ibamumunyikile aye nkupona mu nsenga.

Eyi dishyadimweneka kwadifiki dibamulungwile shi: “Saule, Saule, ommwesha aa malwa bwa kinyi?” Aye namu bayipwishe shi: “Mwanaana,  nnoobe’nyi?” Bapetele lwalulo shi: “Nee Yesu, nnaami oomwesha malwa.”—Bikitshino 9:4, 5.

Yesu balungwile Saule bwa kutwela mu kibundji kya Damase, akupu atengyele byamulungula, anka abadi na kya kumukunkusha bwa kufika ku kibundji mwanda nsebwe ibadi imutunye meeso. Yesu badi mumwenekyele Ananii mu kimonwa, aye badi umune a ku balongi babadi mu Damase. Yesu balungwile Ananii bwa kwenda mu museese kampanda bwa nkamona Saule. Ananii bapushishe moo bwa kwenda, anka Yesu badi mumushinkamishe shi: “Muntu yaawa ee bu kyamo kya mufubo kyandji mwisangwile bwady’a kukalwil’eshina dyande kumpala kwa bisamba bya bashii bakumiine, kwa ba nfumu na kwa bena Isaleele.” Saule babangile dingi kumona, aye nkubanga “kulambukisha mu bilangwilo shi Yesu nyi mMwan’Efile Mukulu” kwakwa ku Damase.—Bikitshino 9:15, 20.

Ku bukwashi bwa Yesu, Mpoolo na bangi balungudi abalombeshe mudimo wa bulungudi ubadi Yesu mubangye. Yehowa bebakwashishe bwa kwiulombasha mu kipaso kya kukaanya. Kunyima kwa bipwa bifikye ku 25 na Yesu kumumwenekyela mwishinda ya ku Damase, Mpoolo bafundjile shi, mukandu wibuwa ubadi “uwukishwe bipangwa byooso bi kuushi kweyilu.”—Beena-Kolose 1:23.

Kunyima kwa bipwa, Yesu bapeele Yowano mutumibwa aaye abadi mufule bimonwa, abisanganyibwa mu mukanda wa mu Bible wa Kibafumbwilwe. Ku bukwashi bwa byabya bimonwa, Yowano bekeele na muwa bwa kumona Yesu kwalukiila mu matalwa a Bufumu bwaye. (Yowano 21:22) Nyi bwakinyi bafundjile shi: “Kikudi kibanyikiile [Yowano] mwifuku dya Mwanaana.” (Kibafumbwilwe 1:10) Byabya bibadya kwikala mu mafuku kinyi?

Kulonga na kishima matemuki a mu Bible akulesha shi ‘efuku dya Mwanaana’ ndibangye mu ano mafuku eetu. Mu kipwa kya 1914, Ngoshi ya kumpala ya Nsenga ishima ibabangile. Kubanga paapa kunyima kwa bipwa makumi, kubekeele ngoshi, bipupa, nsala, kutshinkakana kwa nsenga na bingi bishinkamisho abilesha mu bukata kulomabana kwa “kitundwilo” kibadi Yesu mupe batumibwa pabitale “kufika” kwaye na “nfudiilo.” (Mateo 24:3, 7, 8, 14) Mudimo wa kulungula mukandu wibuwa ukwete kukitshika, kushi penda mu maumbo a bena Looma, kadi mu nsenga ishima.

Yowano badi muyokyelwe bwa kufunda byabipatuula mu bino bishima shi: “Kino ngi kipungo kya kipandjilo, kya bukome na bulopwe bw’Efile Mukulu eetu, na kya matalwa a Kidishitu aaye.” (Kibafumbwilwe 12:10) Eyendo, Bufumu bw’Efile Mukulu bubadi Yesu mulungule bikata bwi mwiyilu, mbwikale mwanda wa binyibinyi!

Uno nyi mukandu wibuwa bwa balongi booso ba Yesu ba sha lulamato. Mbalombene kutula ku mashimba abo mayi a Yowano akula shi: “Ngi mwanda kinyi sepeelayi, anwe eyilu na anwe bee na kishaleelo kyenu mwanka! Malwa ngeenu, nsenga na mbuu, mwanda kafilefile bayiki kwanudi, mukwatshikye nsungu, mushinguule shi kubamushadila mafuku apeela.”—Kibafumbwilwe 12:12.

Byabya, Yesu takii mushale dingi ku mboko ibalume ya Nshaye bwa kutengyela nya. Kwete kumunana bu Nfumu, na akyebe kukatusha binobino beshikwanyi naye. (Beena-Ebelu 10:12, 13) Myanda kinyi ya muloo ayitutengyela kumpala?