Bangi bana balume abafikile dya Kutunduka. Abadi ba sha binangu—bantu abalongaa bi nyenyenyi na kunangushena shi be kulungula bantu myanda ayikitshika mu nshalelo aabo p’abakitshi byabya. (Yeeshaya 47:13) Pababadi kwabo dya Kutunduka, abamwene “lwenyenye” abo nkutambuka bilometre nkama bwa kwilulonda ku Yelusaleme, kushii ku Beteleme nya.

Pabafikile ba sha binangu kwakwa, abayipwishe shi: “Nkunyi kwi mulopwe a bena Yuuda batandjikwa? Tubamono lwenyenye lwa Kutunduka-nguba, ngi byatudi bafikye mu kumulangwila.”—Mateo 2:1, 2.

Eroode, Nfumu a beena Yelusaleme bafitshile munda pabapushishe byabya. Aye nkwitanyina bakata ba batshite mwakwidi na bakata ba bipwilo bya beena Yuuda, aye nkwibepusha kubadi Kidishitu na kya kutandjikwa. Abo nkufubisha Bifundwe pa kumwalula shi: “Nku Beteleme.” (Mateo 2:5; Mika 5:2) Anka paapa, Eroode bayitanyiine ba sha binangu mu mayele aye nkwibalungula shi: “Endaayi nukayipushe kalolo p’abitala yawa mwana paanumusangana, ngukisheyi bwa shi ami namu nyende nkamulangwile.” (Mateo 2:8) Anka, Eroode badi akumina kupeta yawa mwana bwa kumwipaa.

Kunyima kwa basha binangu kukataku, kubadi kukitshikye mwanda wa kukaanya. “Lwenyenye” lubabadi bamone pababadi Kutunduka, lubatukile kumpala kwabo. Talubadi lwenyenye bisumanga nya, lubatukile penda bwa kwibaludika. Basha binangu nkutungunuka na kwilulonda mpa na bibaludi lwimane mu mutwe wa nshibo ibadi Yoosefe na Maadiya bashaale na mwan’abo.

Pabatwelele basha binangu mu nshibo, abapetele Maadiya na Yesu—kii mwana tooka. Basha binangu nkumukunamina. Abo nkumupa bya buntu bya oòlo, musengo wa kabanda na mwimu wa miile. Kunyima pababakimibile kwalukiila kwi Eroode, Efile Mukulu badi mwibadimushe mu kilootwa bwa kupela kwibikita. Abo nkwata dingi eshinda bwa kwalukiila kwabo.

Omono shi nnanyi batushile “lwenyenye” lubadi lukunkushe basha binangu? Tentekyesha shi, talubadi lwibatwale musango umune kwi Yesu mu Beteleme nya. Lubadi lwibatwale mu Yelusaleme mubabadi bakafumankane na Nfumu Eroode badi akimbi kwipaa Yesu. Badi na kya kwibikita su Efile Mukulu tabadi mudimushe basha binangu mu kilootwa bwa kupela kulungula Eroode kubadi Yesu. Kushi mpaka, Satana mwishikwanyi a Efile Mukulu badi akimbi bwa shi bayipee Yesu, aye nkufubisha luno lwenyenye bwa kupima kulombasha mpàngo yaaye.