Tatudi mu printemps. Nsaa ibalombana ya’shi kifuko kya Yoosefe, bakuuku baabo na bakwabo bende bwa musango wa kumpala ku Yelusaleme. Abayile ku musangelo wa Kidiibwa kya lukilo, nka bu bibadi abyamba Mwiya. (Miiya Ikituulwe 16:16) Kukatuka ku Nazarete na ku Yelusaleme pe bula bwa bilometre bifikye ku 120. Abadi na bibungi bya kukita, anka ibadi nsaa ya muloo bwa bantu booso. Yesu baapu kulombasha bipwa 12 badi atengyela nka n’eshimba kwiyilu ino nsaa i pabwayo na kukimba dingi mushindo wa kwikala dimo kii pepi na ntempelo.

Bwa Yesu na kifuko kyaye, musangelo wa Kidiibwa kya lukilo taubadi penda bw’efuku dimune nya. Butokye, kunyima kwa Kidiibwa kya lukilo, dibadi mbangilo a musangelo wa Mukate ushii Kitatusho, ubakitanga mafuku musambo. (Maako 14:1) Abadi abekimono bu kipungo kya Kidiibwa kya lukilo. Lwendo lwa kukatuka kwabo ku Nazarete na nkashala ku Yelusaleme akupu nkwalukila dingi ku Nazarete bibadi abyata pangi mbingo ibidi. Kadi bwa kino kipwa, lwendo lubadi luyishe, mwanda wa shi kwi mwanda ubadi ufikile Yesu pa kwalukiila kwabo kwa ku Yelusaleme.

Pababadi abalukiila, Yoosefe na Maadiya abadi abapwandjikisha shi Yesu badi mu kisaka kibadi na bakwabo na bakuuku. Byabya, pababayimene mwanda wa bufuku bubayidile, tababadi bamone Yesu nya. Abo nkwenda mu kwikimbena naye munkatshi mwa bakwabo, anka tambamumone nya. Mwan’abo badi mushimine! Yoosefe na Maadiya abadi babangye dingi kwalukiila ku Yelusaleme mu nkamukimba.

Abadi bamukimbe munda mwefuku dishima kushii kumumona. Abo nkukimba mpa na mwifuku dya kabidi kushi kumupeta. Nfudiilo a byoso, mwifuku dya Kasatu, abasangene mwan’abo mu ntempelo mwi tudimbo twi bungi. Abamwene Yesu mushale munkatshi mwa bangi balongyeshi beena Yuuda. Badi ebatemesha na kwibela nkonko na kwibakanyisha bwa mpushisho aye.

Maadiya nkumwipusha shi: “Mwan’abe bwetukitshi byaabya bwa kinyi? Nshoobe n’ami, atukukiimbanga n’eshimba kwiyilu ngofu.”—Luka 2:48.

Yesu bebakanyishe p’abo kukutwa kuuka kubadi. Pa kwibepusha shi. “Byaabya anunkimbanga bwa kinyi? Tanwikalanga bawukye’shi nee naa kya kwikala mu [nshibo] ya Nshaami?”—Luka 2:49.

Binobino abepetena booso, Yesu balukila ku Nazarete pamune na Yoosefe na Maadiya, akupu batungunuka na kwibakokyela. Badi akulu mu kinangu na ku kishiisa. Kubanga pabadi ki mukinga badi mulongamine Efile Mukulu na bantu. Eyendo shi kubangila nka ku bukinga bwaye, Yesu balekyele kileshesho ki buwa, kushi penda kya kukisha myanda ya mu kikudi pa mbalo ya kumpala nya, kadi, na mu kunemeka kwa bamutande.