Yesus badi mukidile mu Nazarete, nyi nkakibundji kapeela kashadile. Ke dya kunundu kwa Yudeya, mu myengye ya mu nsenga ya Ngalileya dya kupona nguba kwa kishiba kikata akiukibwa bu Kalunga ka Ngalileya.

Pangi Yesu badi na bipwa bibidi, abamutwadile kwi Maadiya na Yoosefe kukatukila ku Ejiipitu. Abimweneka shi mu yaya nsaa, badi mwana aabo umune eeleka. Kunyima kwa paapa, abatandjile bangi beena ba Yesu—Shaake, Yoosefe, Simone na Yuudase. Yoosefe na Maadiya abafikile mu kutanda bangi bena ba Yesu bakashi. Eyendo shi Yesu bapetele bangi bena balume na bakashi basamombo.

Mbinyibinyi shi Yesu mmutandwe na bangi bakwabo. Tubakatuka mu kwiuka pabitale Elizabete na mwan’aye, Yowano. Badi mushalele kula dya kuushi mu Yudeya. Ungi muntu ashalaa ki peepi na mu Ngalileya nyi Salomee, abimweka shi badi mwina a Maadiya, na nyinaye mukinga na Yesu. Mulume a Salomee nyi Zebedee. Bana baabo babidi mba Shaake na Yowano be bu bakwabo na Yesu ba kumpala. Tatwiuku su Yesu bakitshine nsaa ibungi na bano bakwabo balume pababadi abakulu nya, anka atuuku shi abekeele bakuuku baye ba p’eshimba na dingi Yesu bafubile nabo boso babidi bu batumiibwa.

Yoosefe badi na kya fuba bibukopo bwa kukusha kifuko kyaye. Badi asèe mabaya. Yoosefe bakushishe Yesu nka bu mwana aaye, nyi bwakinyi abamwitanyina bu “mwana a nsèèshi a mabaya.” (Mateo 13:55) Yoosefe badi mulongyeshe Yesu  bya kusèè mabaya, na balongyele kalolo. Mwenda mafuku bantu abadi babangye kwakula shi: “Naye winyi musèèshi a mabaya.”—Mako 6:3.

Lulangwilo lwa Yehowa lubadi pa mbalo ya kumpala bwa kifuko kya Yoosefe. Pa kulonda Miiya y’Efile Mukulu, Yoosefe na Maadiya abadi abalongyesha bana baabo myanda y’Efile Mukulu ‘pababadi bashale mu nshibo yabo na pababadi abatambuka mwishinda na pababadi a balaala mpa nka na pababadi ababuuku.’ (Miiya Ikituulwe 6:6-9) Mu Nazarete mubadi kitumbwilo. Twi kukumina shi Yoosefe beendanga misuusa yooso na kifuko kyaye bwa nkalangwila. Bibadi byakudibwe kunyima shi “batwelele mu kitumbwilo mwifuku dya Sabato muyile kipikwa kyaye.” (Luka 4:16) Kifuko kyoso kibadi na muloo pababadi abende misuusa na misuusa ku ntempelo a Yehowa ku Yelusaleme.