Keezare Oguste, badi mukata a Beena Loma badi mutume eyi bwa shi bantu boso be mu kibundji babadikibwe. Nyi bwakinyi Yoosefe na Maadiya abadi na kya kwenda ku Beteleme kibundji kyabo kya butandwa dya kuushi kwa Yelusaleme.

Mu Beteleme mubadi bantu bebungi bwa kubadikiibwa. Mbalo penda imune ibapetele Yoosefe na Maadiya bwa kushaala ibadi mu kikutu kya nyema. Mwamwa nyi mubadi mutandjikilwe Yesu. Maadiya badi mumupombeleshe kilamba aye nkumuladika mu luufwa, mbalo ibaabadi abeelela nyema bidiibwa.

Efile Mukulu nyi bakitshine bwa shi Keezare Oguste eele uno mwiya wa kubadikiibwa. Bwakinyi? Mwanda bibakwashishe bwashi Yesu atandjikwe mu Beteleme, kibundji kya nkambw’aye Daavide. Bifundwe bibapwile kwakula kumpala shi Beteleme badi na kya kwikala kibudji kibadi na kya kutandjikwa Nfumu badi mulayibwe.—Mika 5:2.

Bubadi bufuku bwi na muulo ukata! P’ababadi mu mafuba, etaata dibadi dimunyikye kisaka kya balami ba nyema. Dibadi ntumbo ya Yehowa! Mwikeyilu a Efile Mukulu nkulungula balami shi: “Tanwikalanga na moo, mwanda nafiki mu kwinuwukisha mukandu wibuwa aukasangasha bantu booso. Lelo uno, mu kibalo kya Daavide, babenutandjila mupaashi aye nyi Kidishitu Nfumu. Talayi kitundwilo kyanukamono: Anukasangana mwana abadi bapombeele mu tulamba, bamuladisha mu kidiilo kya nyema.” Kubatukile kingi kisaka kya bamikeyilu kibambile shi: “Ntumbo kw’Efile Mukulu amwa mwiyilu, na pa nsenga, butaale bwikale kwi bantu.”—Luka 2:10-14.

Pabadi bamiikeyilu bebalekye, balami abelungushene shi: “Byabya, twendeyi nyaa na ku Beteleme, tumone kikitshikye, kyakya kituwukishe Yehowa.” (Luka 2:15) Abayile kushii kunyengakana, abo nkapeta Yesu baapu kutandjikwa nka bibadi bibalungule mwikeyilu. Pabadi balami balonde bibaabadi bebalungule, bantu booso abadi bebapushe, abakanyine. Maadiya namu badi abekyela yaaya myanda yooso pa kwiyilama mwishimba dyaaye.

Bebungi lelo abakumina shi Yesu badi mutandjikwe mu 25/12. Aku namu mu kibundji kya Beteleme, mweshi w’Ekumi na wa kabidi ubadi mpeshi ebungi na mashika. Ingi nsaa kubadi mpa na milemba. Mu aa mafuku a ku kipwa, bibadi bukopo bwa balami kwenda mu mafuba bufuku bwa kudiisha nyema yaabo. Na dingi, tatwi kunangushena shi Keezare badi na kya kuteka bantu abadi abakimbi kumutombokyela bwabadya kutambuka lwendo lwi bula mu aa mashika bwa kubadikiibwa. Abimweneka shi Yesu badi mutandjikwe pangi mu mweshi w’Ekumi.