Eyimi dya Maadiya tadidi mu myeshi inanka. Tentekyesha shi ku mbangilo kw’eyimi dyaye badi mu kutembela mukwabo Elizabete mu myengye ya ku Yudeya dya kuushi. Binobino Maadiya balukiila ku Nazarete. Kwakwa, eyimi dyaye adikyebe kubanga kumweneka kwi bantu. Banda kunangushena byabibaadya kumukalakasha mu binangu!

Bibadi bya malwa mwanda Maadiya badi na mubangidi aaye Yoosefe badi asèe mabaaya mu kibundji kimune. Akupu Maadiya badi auku muyile Mwiya w’Efile Mukulu kwi Isaleele shi, su nsongwakashi kamame mmubangilwe kwi mulume, dingi su ungi mulume afumankana naye mu lupata na alaala naaye, abadi na kya kumwasa mabwe na ku lufu. (Miiya Ikituulwe 22:23, 24) Nyi bwakinyi, sunga byekala shi Maadiya tabadi mutambukye lusandji, badi pangi eyipusha mushindo wa kupatulwila Yoosefe pa bitale eyimi dyaye na bibadya kukitshika.

Dingi Maadiya badi mu lwendo munda mwa myeshi isatu, na Yoosefe badi na kisukusuku kya kumumona. Pababadi bemonene, abimweneka shi Maadiya bamulungwile mwanda waye pa kwitatshisha bwa kumupatulwila shi eyimi dyaye adifiki ku bukome bwa kikudi kiselele ky’Efile Mukulu. Nka bu byodi mulombeene kwibimona, uno mwanda wibukopo bwa shi Yoosefe eukumiine.

Yoosefe badi auku shi Maadiya mmukashi ebuwa shi na nkumo ibubi. Na badi mutome Maadiya kifulo. Anka, sunga byekala shi Maadiya bamulungwile byanka, Yoosefe beelanga binangu shi badi na kya kwikala mupete eyimi kwi ungi muntu. Yoosefe tabadi akumiina bwa shi bamwase mabwe na ku lufu sunga kumusabuula kumpala kwa bantu booso nya; nyi bwakinyi bapetele kinangu kya kwipeleena naye mu bufyefye. Mu aa mafuku, bantu abeyilena abadi abamweneka bu beyibakishene na kutshiba  eyibakishi kubadi akutungu kulonda abyamba miiya.

Kunyima pabadi Yoosefe kyanangushena pabitale uno mwanda, baponene mu tulo. Mwikeyilu a Yehowa badi mumumwekyele mu kilootwa amulungula shi: “Totshiinanga kwata Maadiya bu mukashi oobe, mwanda kyakya kifumbukye munda mwaye akifiki kwi kikudi kiselele. Atanda mwana mulume omuudikye eshina dya bu Yesu mwanda nnaye apaasha mwilo waye ku milwisho yawo.”—Mateo 1:20, 21.

Pabadi Yoosefe mubuukye ku tulo, badi na lutumbu lukata pa kuuka kalolo uno mwanda! Tabadi munyengakane bwa kukita bibadi mwikeyilu mumulungule nya. Badi mutuule Maadiya ku nshibo yaaye. Kino kibadi kitundwilo akileesha patooka kulombasha kwa myanda ya bulunda ayishinkamisha shi Yoosefe na Maadiya abeyibakishena. Sunga mbyabya, Yoosefe tabadi musangishe mbidi na Maadiya pabadi n’eyimi dya Yesu nya.

Kunyima kwa myeshi, Yoosefe na Maadya e na bushito bwa mwana e munda, abadi na kya kwilumbuula bwa lwendo lwa ku Nazarete. Nkunyi kubaabadi na kya kwenda mu nsaa ibadi Maadiya peepi na kutanda?