Kubapu kukila bipwa bifikye 17 kubanga pabadi Yesu eele balambukishi nkonko mu ntempelo na bipwa 12. Binobino tatudi mu printemps a kipwa kya 29 B.B. Bantu bebungi abesambila bwa Yowano mukwabo na Yesu baadi alambukisha ku lupese looso lw’eumbo dya kupona nguba kwa Mwela wa Yoordano.

Yowano baadi akaka binangu bya bantu ku lukyebo lwaye sunga ku ngakwilo aaye. Bilamba byaye mbebipwe na bwaa bwa kamelo, na baadi afwala mukaba wa musokya wa nyema. Baadi adi mpasu na kulamba buuki bwa mu mapya. Mukandu waye ubaadi naminyi? Ubadi shi: “Alulukaayi: Bufumu bwa mwiyilu tabudi peepi.”—Mateo 3:2.

Mukandu wa Yowano ubasangashanga baaba abaadi abamutemesha. Bebungi nkumona shi abitungu belangye, bashintuule nshalelo aabo na kuleka mashinda aabo ebubi a kala. Booso abafikile kwadi abafikanga ku “Yelusaleme, Yudeya mushima na kipindji kishima kya nsenga yaa Yoordano.” (Mateo 3:5) Bebungi abafikile kwi Yowano abaadi belangye ku milwisho. Aye nkwibabatshisha pa kwibayina mu meema a Yoordano. Bwakinyi?

Baadi abatshisha bantu bu kitundwilo sunga kushinkamisha kwabo kwa kwilanga ku mashimba ku milwisho ya kilombeno kya Miiya y’Efile Mukulu. (Bikitshino 19:4) Anka, ta mbooso abaadi na kya kwibikita nya. Nsaa ibaadi bangi bakata ba bipwilo, Bafadisee na Basanduseo abafiki kwadi, Yowano baadi ebetanyina bu “efuko dya nyoka ya bulembe.” Bambile shi: “Paayi bikuba abileesha kwilanga kwenu. Dingi tanukelungulanga munda mwenu shi ‘Twi beekulu ba Abrahame.’ Mwanda nenulungula shi, na mabwe anumono ano, Efile Mukulu mulombeene kutushila Abrahame beekulu. Kabengyele nkapwe kulumbuulwa bwa kushuula mitshi mpa na mishi. Byabya, mutshi ooso ushyautuusha bikuba bibuwa awikala utshibiibwe, wediibwe mu kaalo.”—Mateo 3:7-10.

Bu bibaadi mukandu wa Yowano na bukome, bantu abaadi beuteemeshe na kishima, aye nkubatshisha bantu bebungi, ba tshiite mwakwidi na beena Leevi nkufika mu kumwipusha shi: “We’nyi?”

Yowano nkwibalungula kushii kufya shi: “Ntshi Kidishitu’mi.”

Abo nkumwipusha dingi shi: “We’nyi? We Eliya su?”

Aye nkwibaluula shi: “Ntshi Eliya nya.”

Abo nkumwipusha dingi shi: We “mutemuki su?” abaadi abanangushena mutemuki mukata bambile Moyiise shi baadi na kya kufika.—Miiya Ikituulwe 18:15, 18.

Yowano nkwaluula shi: “Nya!”

Abafikile bamushishikila shi: “We’nyi? Bwatudy’a kutwadila beetutume lwaluulo. Wamba kinyi p’abikutala obe nabeene?” Yowano nkwamba shi: “Nee eyi dya muntu eele musaase mu kabaaka shi: ‘Landakashaayi eshinda dya Yehowa,’ bu bibaadi byambe Yeeshaya mutemuki.”—Yowano 1:19-23.

Abaadi abakumina kuuka pa kumwipusha shi: “Bwakinyi obatshisha bantu su twe Kidishitu sunga Eliya, sunga Mutemuki”? Yowano nkwibaluula shi: “Ami nabatshisha mu meema. Anka munkatshi mwenu mwi anushyaanuwuku; afiki ku mongo kwande.”—Yowano 1:25-27.

Eyendo, Yowano baadi auku shi baadi alumbula eshinda bwa shi bantu balumbule mashimba aabo bwa kukumina Mesiya baadi mulayibwe e na kya kufika bu Nfumu. Yowano nabene bambile shi: “Afiki ku mungo kwande, mmukile matalwa, ntshi mulombeene sunga kwangula mooshi wa ku bilaato byaaye nya.” (Mateo 3:11) Yowano baadi mpa na mwakule shi: “Talayi anaady’esambil’ashi kunyima kwande akufiki muntabukile mwanda baadi kwanka kumpala kwande.”—Yowano 1:15.

Byabya, mukandu wa Yowano wa shi: “Alulukaayi: Bufumu bwa mwiyilu tabudi peepi,” ubaadi ulombanyine. (Mateo 3:2) Ubaadi utushe bukamonyi patooka shi mudimo wa Nfumu afiki kwi Yehowa, Yesu Kidishitu taudi peepi na kubanga.