Ngoshi ibaadi bukata, na mwibanda dya Ela ta mubaadi tuleo nya. Bu kishaleelo kya kutengyela basalayi bakookye na kaanya ka kunyima kwa midi, Nfumu Saule bakongwele bantu babaadi paapa na mwana aye mbedi Yoonatane, na nsongwalume mulami a nyema baadi na muloo wa kumulondela myanda yaye. Uno nsongwalume nyi Daavide, baadi na katshintshi na muloo. Saule bapushishe na kulondesha mayi ooso ababadi abakula kwi Daavide kalolo. Yoonatane ba pushiishe naminyi yaya nsaa? Baadi mutshokole mu mudimo waye ooso wa kulwila Yehowa ngoshi. Anka kutshokola kwi leelo uno ta nkwa Yoonatane nya anka nkwa ba nsongwa. Daavide baadi mwipe kinkome Ngolyate! Yoonatane baadi mukwatshile Daavide mukawo bwa ntumbo ibaadi mupete su?

Bikitshino bya Yoonatane bibaadi bilombene nkukanyisha. Atubadika’shi: “Pabapwile Daavide kwisamba na Saule, Yoonatane mwana a winyi Saule batomene Daavide kifulo nka byadi mwitome e nabene.” Yoonatane aye nabene bapeele Daavide bina ngoshi byooso na buta, Yoonatane baadi akyebe kupa Daavide bwedi bwa bu musalayi e na nkumo. Bikishekishe, Yoonatane na Daavide abakitshiine kilombeeno, bepusheena ngofu, kwibabungye pamune bu bakuuku abekwasheena kumuntu na mukwabo.​—1 Samwele 18:1-5.

Uno ngi mbangilo a bukuuku bwabo bukata bwatusangana mu Bible. Kipwano ki na muulo ukata kwi bantu basha lukumiino. Su tubasangula ba kuuku bebuwa na kwikala atwikwasheena, na basha lulamato, twi kwinyingisheena mu lukumiino mu kino kipungo kishii kifulo. (Nkindji 27:17) byabya tutaleyi mushindo watudi balombene kulonga pabitale kipwano kya Yoonatane.

Kino kipwano ki kumweneka bukidibukidi naminyi? Lwalulo alulesha kibangilo kya buno bukuuku. Tutaleyi ingi myanda. Yoonatane bakudile mu kipungo kibukopo. Nshaye, Nfumu Saule, baadi mushintuulukye munda mwa bipwa bibungi,akitanga nka myanda ibubi. Saule baadi na kwiyisha, badya kokyela na sha lukumiino, bafikile sha kwitatula, na nfumu sha kookyela.​—1 Samwele 15:17-19, 26.

Kushintuluka kwa Saule kubaadi kulombene kukalakasha Yenatane, bu bibaadi peepi na nshaye.(1 Samwele 20:2) Yoonatane baadi eyipusha bubi bubabadi balombene kufwishisha mwilo wa Yehowa wadi musangule kwi Saule. Kukutwa kukookyela kwa Saule kubaadi kulombene kulubisha mwilo na kwiukutshishwa kukumiinyibwa na Yehowa su? Kushii mpaka kyakya kipungo kibaadi kikeele Yoonatane muntu sha lukumiino bukopo.

Yaaya myanda i kwitukwasha bwa kupusha Yoonatane baadi kuuku a nsongwalume Daavide. Yoonatane bamwene Daavide na lukumiino lukata. Banda kutentekyesha, bungi bubaadi basalayi ba Saule, Ngoliate baadi bukata na bula bukile. Daavide belele binangu’shi su nende mu kulwa naye n’eshina dya Yehowa akumpa bukome bwibungi kukila kwenda na mputu ya kulwa naye.​—1 Samwele 17:45-47.

Bipwa bibungi kumpala, Yoonatane baadi munangusheene mu wawa mushindo umune. Baadi mushinkamishe’shi bantu babidi​—aye na mutwadi aye a bina ngoshi—​mbalombene kulwa na kisaka kishima kya basalayi na kutshokola. Bwakinyi? Mwanda Yoonatane bakwile’shi: “Takwi kyaku mukutshishwa kwitupa ngobesha.” (1 Samwele 14:6) Ngi bwakinyi Yoonatane na Daavide babadi na myanda i mumune. Lukumino lunyingye mwi Yehowa na kifulo ki bukopo mwadi. Bino ngi bibaadi bu kitako kya bukuuku bubaadi pankatshi pa bano bantu babidi. Sunga mbibaadi Yoonatane bu mwana a Nfumu na muntu mukulu e na bipwa 50, Daavide baadi mulami a nyema mwiyishe na baadi na bipwa bu 20, kuno kwilekeena kubaadi pankatshi paabo takubaadi bu mwanda nya. *

Kilombeno ky’eyendo kibabadi bakite bwa bukuuku bwabo kibaadi akibakalwila. Mushindo kinyi? Tala mushindo ubaadi, Daavide auku’shi Yehowa mulombene kumwikasha byabya: Bekeele bu nfumu a kabidi a beena Isaleele! Baadi muukile uno mwanda kwi Yoonatane su? Nya! Bukuuku bwibuwa bu buno bwabo bubaadi bunyingye pa kwilungusheena bya binyibinyi kushii kwidimbeena kwifiyisheena ingi myanda. Kuuka’shi Daavide baadi mulombene kwikala bu Nfumu kubaadi kwinyongoshe Yoonatane su? Bibadya kwikala naminyi su dingi efuku Yoonatane badya kukimba kwikala na kineemo kya bu Nfumu na kukalwila bikitshino bibubi bya nshaye? Bible etulungula’shi takubaadi kintu su nkimune kibaadya pangi kupa Yoonatane kinangu kibubi pabitale wawa mwanda nya; etulungula nka penda bibaadi myanda ya binyibinyi, lulamato lwa Yoonatane na lukumiino lwaye. Baadi amono nka penda kikudi kya Yehowa mwi Daavide. (1 Samwele 16:1, 11-13) Ngi bwakinyi Yoonatane balombeshe mutshipo waye na atungunuka na kutala nka penda Daavide, kushi kwipikeena naye, kadi bu kuuku aaye. Yoonatane baadi akumiina kumona nka kikyebe ky’eshimba dya Yehowa kikitshikye.

Bwabwa bukuuku bwabo bubaalulukile bwafika bu mwabi ukata. Nkinyi kyatudi bakumbeene kulongyela ku lukumiino lwa Yoonatane? mufubi ooso a Efile Mukulu akitshi bibuwa pamono kineemo kya kwikala na bakuuku. Tabitungu’shi bakuuku beetu bekale nka batudi nabo bipwa bi mumune sunga batudi bakule nabo pamune nya, anka abitungu’shi betumone bu be na mwikeelo wibuwa su be na lukumiino lwi bukopo. Yoonatane na Daavide babaadi na mushindo wa kwinyingisheena na kwikankamisheena nsaa yooso. Na booso babidi abaadi na lukalo na buno bukwashi, mwanda bukuuku bwabo bubaadi kumpala kwa bitompwanga bikata.

Kumbangilo, Saule baadi mufule Daavide ngofu na baadi mumutule bu mukata a basalayi baye. Mafuku ebungi kumpala, Saule baadi mutamiishe eyikashi dibubi dyabashii bakumiine kwi Yoonatane’shi ditame mwadi​—mukao. Daavide baadi mutshokole ngoshi ya beshikwanyi ba bena Isaleele misusa na misusa, na bena Filistine. Daavide baadi mupete kineemo na kukuminyibwa. Bangi bana bakashi ba bena Isaleele babayimbile’shi: “Saule mmwipee binunu, Daavide naamu nkama ya binunu.” Saule tabaadi musangale na luno loono nya. Atubadika’shi: “Kubanga nka papa, Saule bádi atala Daavide n’eiso dibubi” (1 Samwele 18:7, 9, EEM) Baadi amono’shi Daavide mulombene kutompa kumunyenga bufumu bwakatuka mu kifuko kyaye. Bino abilesha’shi Saule baadi mukutwe binangu. Mu binyibinyi, Daavide baadi muukye’shi akapyana Saule, anka tabaadi akumina kunyenga bufumu abadi beele mwimu kwi Yehowa bufumu aku namu baadi kya munana nya!

Saule baadi mutwelele Daavide lukuku lwa kumwipaa ku ngoshi, anka tankukitshjikye kintu su nkimune nya. Bantu babadi bamufule ngofu na kumunemeka. Ungi mususa Saule batompele dingi kubunga bena mudimo na bantu ba mu nshibo mwaye mpaa na Yoonatane mwana aye mbedi bwabadya kwipaa Daavide! Banda kunangusheena bibapushishe mwishimba dya Yoonatane paye kumona nshaye akitshi mynda ibyabya! (1 Samwele 18:25-30; 19:1) Yoonatane baadi mwana sha lulamamto, anka badi dingi kuuku sha lullamato. Binobino ino mishindo ibidi ya lulamato ya Yoonatane ibamwenekyele bu ya mushikwa, bwa’shi apetele bwedi kwi muntu umune su?

Yoonatane bakwile’shi: “Mulopwe, tolwishiishanga mufubi oobe Daavide, mwada ta mmukulwishiishe nya, dingi myanda yaadi mukite ibaadi bwa buuwa bwobe. Baakumiinyine kupaana muuwa waye, bwa kwipaa mwina-Filistina, na Yehowa bapeele Isaleele mushima ngobesha. We mwibimone, dingi e musankya. Byabya bwa kinyi we mulombeene kukita mulwisho pa kusukumuna mase a muntu shii musoole mwanda pa kwipaa Daavide kushii mwanda?” Mu ingi nsaa Saule baadi apushisha Yoonatane, na baatshipi’shi tayipaa Daavide dingi nya. Anka Saule tabaadi alombasha byadi mwakule nya. Kunyima Daavide baadi muboshe, Saule baudile dingi na sungu ibukopo aye nkumwasa mulumbu! (1 Samwele 19:4-6, 9, 10) Anka Daavide baadi mwepe na aye nkutuuka mu lupango nkusuuka.

Obe namu topetele mushikwa pamwanda wa lulamato lwi bino su? Bi kwikala bubi ngofu. Mu myanda i bino, bangi mbalombene nkulanga’shi abitungu nka bena kifuko boobe bafikye kumpala. Anka Yoonatane baadi muukye kibuwa kyadi mulombnene kukita. Nkinyi kibaadi mulombene kulungula shaye nsaa ibaadi Daavide na lulamato, mufubi a Yehowa sha kukookyela? Yoonatane balekyele myanda yaye yooso kwi Yehowa bwa’shi amuludikye ku kitshibilo kyaye. Bakimbile bya kwakwila Daavide. Dingi Yoonatane batungunukile na kulesha lulamato kwi Yehowa pa mbalo ya kumpala, badi muleeshe bi lulamato kwi nshaye paye kumupa elango na kaneemo mu mushindo wadi kumuteemesha pamutwe kumulungula byaye byapusha. Muntu ooso a kwatudi mulombene kupletela mwabi pa kwambula mushindo wa Yoonatane wa kuleesha lulamato.

Yoonatane batompele kutwesha kwipusheena pankatshi pa Saule na Daavide anka Saule tabaadi mu mupushishe yaya nsaa nya. Daavide bafikile kwi Yoonatane ku bufyefye, amulungula ’shi atshiinanga bwa muwa waye. Balungwile kuuku aye mukulu’shi “Pankatshi pande na lufu pe’nka etabula dimune!” Yoonatane batompele kuuka bi binangu bya nshaye pabitale Daavide su ekukumiina’shi baukye kinyi kiina mwanda bwa kutwesha butaale naaye. Sunga Daavide bibaadi mufwame, Yoonatane baadi amutumina mukandu kukiila ku mukyetwe na buta. Yoonatane batekyele Daavide nka penda kutshipa bwa uno mulayilo’shi: “Okaîdidîle na kyakya [kifulo ki na lulamato] mpâ na kwi bena nshibo yande, sunga mpapa p’abakashimisha kwi Yehowa beshikwanyi n’obé boso, koso kw’abakekala pa nsenga.” Efuku dyooao Daavide badi nka apasukila na kukalwila bantu booso ba mu nshi ya Yoonatane.​—1 Samwele 20:3, 13-27, EEM.

Yoonatane batompele kwisambila Daavide na kalolo kwi Saule, anka Nfumu baadi mufiite munda ngofu! Aye nkwitanyina Yoonatane bu “mwana a mukashi mubi” na bakwile’shi lulamato lwa Daavide lwi buufu mu kifuko. Batompele kumwitanyina bwa penda buwa bwa Yoonatane’shi: “Mwanda paki’nka yawa mwana a Yese na mûwa, tokulupilanga’shi we mulombêne kumunana.” Yoonatane batungunukile dingi na kudidila nshaye’shi: “akyafwila nkinyi? A kyadi mukite kibubi nkinyi?” Saule batombokyele ngofu! Sunga mbibaadi Saule mupwe kununupa, baadi nka kilobo kya ngoshi. Baadi mwase mwana aye mulumbu! Sunga byekala’shi baadi mwase uno mulumbu mushindo kinyi, badi nka mutupilwe. Yoonatane baadi mufite munda ngofu sunga mbibaadi mwinyongola na kwiyisha kooso.​—1 Samwele 20:24-34.

Pababutokye kunakashika, yoonatane baadi mwende kwifuba di peepi na mbalo ibaadi Daavide. Belele mukyetwe bu bibabadi bepusheene bwa kumulungula’shi Saule ki nka na lukalo lwa kumwipaa. Akupu Yoonatane batumine mukindji waye bwadya kumulungula’shi baluka mu kibundji. Aye na Daavide babaadi bupenka, na babaadi na kupindji kapeela bwa kwisamba. Booso babidi babadidile, na mu kapindji kapela Yoonatane baladikile kuuku aye nsongwalume bu bibabangile Daavide nshaleelo a bu muntu mufilukye.​—1 Samwele 20:35-42.

Yoonatane baadi muleshe lulamato munkatshi mwa nkalakashi, na balesheshe’shi baadi na lulamato lushii lwa kwifula. Satana, mwishikwanyi a bafubi booso basha lulamato, baadi akumiina kumona Yoonatane alondo matabula a Nshaye Saule na kukimba buwa bwaye nabene na kwikimbila ntumbo pa mbalo ya kumpala. Banda kutentekyesha, Satana akumiina bantu bekale na binangu bya kwikumiina. Bu bibakitshine na Adame na Eeva, ba kwambwa betu ba kumpala. (Kibangilo 3:1-6) Anka kwi Yoonatane ta mobeshe nya. Satana baadi mwinyongole ngofu! We kukambila bitompwanga mu mushindo wi mumune su? Twi mu kipungo kikale kwikumina bu kipupa (2 Timote 3:1-5) atwambula kinanga kya kupasukila bangi na lulamato bu kya Yoonatane su?

Mushikwa wa Saule kwi Daavide ubatamine mu binangu na mwishimba dyaye. Yoonatane baadi akwasha ngofu bu bibaadi amono nshaye anyisha kukita myanda ibubi, ayikanyisha mpaa na basalayi baye na kumuna bantu booso bamwifunyishe mu kibundji, na kwipaa muntu shii musoole mwanda. (1 Samwele 24:1, 2, 12-15; 26:20) Yoonatane namu baadi mupetekyelwe su? Nya, ta kwi kifundwe sunga nkimune akilesha’shi Yoonatane baadi mutwelakane mu ino myanda ibubi nya. Lulamato lwa Yoonatane kwi Yehowa, na Daavide na kwi kuuku aye nabene lubamukutshishwe kwibikita.

Bibaadi apusha munda mwaye bwa kuuku aye ta mbishintulukye nya. Ingi nsaa, bapetele mushindo wa kufumankana na Daviide. Bibaadi ku Horesha, kwamba’shi “mbalo i mitshi ibungi.” Horesha baadi mu kisuku, mbalo i myengye i metre apeela dya kuushi na kutunduka nguba kwa Hebrone. Bwakinyi Yoonatane baadi mukutwe kwenda mukutala bantu be mukusuuka? Bible etulungula’shi kibaadi kimutakule mbwa nkakwasha Daavide “bakankamikile mu lukulupilo lwê mwi Yehowa.” (1 Samwele 23:16, EEM) Yoonatane bakitshine bino mushindo kinyi?

Yoonatane balungwile kuuku aye nsongwalume’shi: “Totshinanga.” Baadi mu mushinkamiishe dingi’shi: “Eyasa dya nshami Saule taadikukumu.” Kino kishinkamisho kibaadi kitukile kunyi? Yehowa baadi mushinkamiishe’shi milayilo yaaye ayikalombana binyibinyi. Baadi mwambe dingi’shi: “Nnoobe adiila Isaleele bufumu.” Babatumine mutemuki Samwele bwadya nkakula uno mwanda bipwa bibungi kumpala, na Yoonatane baadi mutentekyeshe Daavide’shi misusa yooso Eyi dya Yehowa adilombanaa. Yoonatane baadi anangushena shi mu mafuku aafiki akakitshi kinyi? “Nakekala kindonda kyoobe.” Kwiyisha kushii byakupwandjikisha! Bakuminyine kwikala mushii mwa matalwa a muntu aadi mukudile na bipwa 30, bwa kumukwasha. Yoonatane baadi mufudiishe na ano mayi: “Sunga Saule nshaami, mmwibyuukye kalolo” (1 Samwele 23:17, 18) Mwishimba dya Saule baadi muukye’shi tamulombene kutshokola ngoshi kwi muntu a Yehowa aadi musangule bwadya kwikala bu nfumu akabidi!

Mu bipwa bibaalondele, Daavide baadi kunyima atala kisangilo kapeelakapeela. Bibaadi bu musango wa nfudiilo wabo kwimonena kumuntu na muntu. Mwanda wa malwa, lukulupilo looso lwa Yoonatane lwa kwikala bu kindonda kya Daavide ta ndulombane nya.

Yoonatane bayile ku ngoshi ku lupese lwa nshaye bwa nkalwa na bena Filistine, baadi muleshe bibaadi beshikwanyi ba bena Isaleele. Baadi mulwe ngoshi ku lupese lwa nshaye na koondo k’eshimba kebuwa, mwanda tabaadi mulekyele bikitshino bya nshaye bibubi bwadya kwenda mu mudimo wa Yehowa aye nabene nya. Baadi mulwe ngofu muyiile ngobesha na lulamato lwaye bu bibaadi akitshi efuku dyooso anka myanda ibaadi ayende bibubi bwa Isaleele. Saule bafikile muntu e bubi bibabangile kufubisha mpaa na bikudi bibi, su Saule badya kukookyela mwiya w’Efile Mukulu, Yehowa baadi mulombene kumwelela myabi ibungi. Baana basatu ba Saule, mpaa na Yoonatane, babaadi bayipayibwe ku ngoshi. Saule batapikile kwishimba ngofu na dingi aye nabene bafwile.​—1 Samwele 28:6-14; 31:2-6.

Daavide benyoongwele bikile. Baadi na kalolo na baadi afwila bantu lusa sunga bibaadi mwinyongole bwa Saule, baadi mu mumweshe malwa na bitompwanga! Daavide bafundjile loono pabitale Saule na Yoonatane. Pangi malongyesha ebungi na mayi a mu ngono ya Daavide aalesha bibadi kifulo kyaye na bukuuku bwabo’shi: “Mmpombo kinyi yandi nayo boobe Yoonatane mukwetu! Naadi mukufule biikashaa! Buukuuku bwetu bubaadi bwa kukàànyà, mbukile kifulo kya mukashi ku buuwa.”​—2 Samwele 1:26.

Daavide tamuube mutshipo waye bwa Yoonatane nya. Kunyima kwa bipwa bibungi bakimbile na baadi mupasukile Mefiboshete mwana a Yoonatane baadi na kilema. (2 Samwele 9:1-13) Kwakukla kalolo, Daavide baadi mulongyele myanda ibungi ku lulamato lwa Yoonatane na kaneemo kaaye na kukumiina kwikala na lulamato kwi kuuku aye sunga byekala’shi lwalwa lulamato lubaadi lwa muulo wibukopo. Atukapetela malongyesha ebuwa mwanka su? Twibalombene kukimba bakuuku bu Yoonatane su? Twi bya kuleesha bukuuku bwi bino atwe banabene su? Su tubakwasha bakuuku beetu kalolo na kunyingisha lukumiino lwetu mwi Yehowa, na su tubatulu lulamato lwetu mwi Efile Mukulu pa mbalo ya kumpala, na su tubekala na lulamato pamutwe pa kukimba nka buwa bwetu atwe banabene, atukekala na bukuuku bu bwa Yoonatane. Na atukambula lukumiino lwaye.