Eliya bapushishe mukandu’shi: Nfumu Akabe baafu. Twi kunangusheena bibasangeele uno mutemuki taadi mununu, meeso aye abamwelele mufito, paye kunangusheena bungi bwa mafuku abaadi mukite mu kusuuka uno Nfumu tomboshi. Eliya baadi munyingiile ngofu! Baadi mukyengyeshibwe na mubingwebingwe sunga mbibaadi kumpala kwa lufu​—byooso bibaadi mu maasa mwa Nfumu Akabe na ndalamumba e bubi, Yezabele. Nfumu tabaadi mukite kintu su nkimune bwa kwimika Yezabele baadi mutume eyi dya kwipaa batemuki bebungi ba Yehowa nya. Uno mukashi na mulume babaadi bakite lukuku lwa kwipaa bantu bashii basoole, na balulame bu, Nabote, na baana baye mwanda Akabe na Yezabele babaadi na lwabi. Eliya balungwile Akabe mukandu wa kiimu na bufumu bwaye booso. Binobino, Eyi dy’Efile Mukulu dibalombene. Akabe bafwile nka mu mushindo ubabadi baakule kwi Yehowa.​—1 Banfumu 18:4; 21:1-26; 22:37, 38; 2 Banfumu 9:26.

Anka, Eliya baadi muukye’shi ena lukalo lwa kutungunuka na kunyingiila. Yezabele bu bibaadi kyatala, baadi mutungunukye na kutamisha bukitshishi kwi kifuko na kwi mwilo. Eliya baadi kumpala kwa nkalakashi ibungi, na baadi mulombene kulongyesha kuuku aye amupyana, Elisha. Byabya tutaleyi binobino midimo ya Eliya isatu ya nfudiilo. Nka bu byatumono mushindo ubaadi umukwashe lukumiino lwaye bwa kunyingiila, abitungu tutale kalolo mushindo wa kunyingisha lukumiino lwetu atwe banabene mu kino kipungo ki bukopo kyatudi bashaale.

Akazyase, mwana a Akabe na Yezabele, baadi Nfumu a beena Isaleele. Pamutwe pa kulongyela ku moombe wa baledi baye, baadi mulonde matabula aabo ebubi. (1 Banfumu 22:52) Na Akazyiase namu baadi mulangwile Baale nka bu baledi baye. Lulangwilo lwa Baale lubaadi alutumu baantu mu kukita myanda ibubi, alutakula bantu bwa kutambuka lusandji mu Tempelo na kulambula baana. kubaadi kintu kampanda kibaadi na bukitshishi kwi Akazyase bwa kushintuula mashinda aye na buludiki bwa bantu baye bwa kupela kulamata kwi Yehowa su?

Mususa umune uno nfumu nsongwa babangile kwitatula. Baadi mupone pa kukamina ku musaka wa nshibo yaaye ya kulala na aye nkupeta masaku akata. Mu muwa waye ooso baadi nka na nkalakashi, na ta mwalukile kwi Yehowa bwa kuteka bukwashi nya. Anka, batumine mikyendji kwi beshikwanyi bena Filistine ba ku Ekrone bwa kuteka efile Baale-zebube su kwi lukulupilo lwa kupanda. Yehowa baadi mwinyongole. Aye nkutuma mwikeyilu kwi Eliya, amulungula bwadya kwimika mikyendji yooso. Mutemuki bebatumine bwabadya kwaluka kwi nfumu na mukandu wibukopo. Akazyase baadi mukite mulwisho ukata paye kwamba’shi bena Isaleele ta be na Efile Mukulu nya. Yehowa baadi mwatshile Akazyase kitshibilo kya’shi takabuuku kwakwa ku lusala na mukumbo.​—2 Banfumu 1:2-4.

Akazyase na kukutwa kwa kwilanga ku mulwisho waye bayipwishe’shi: “Mbii-kunyi biikeele uno muntu mufikye mu kufumankana neenu bwa kwinulungula bino bishima?” Mikyendji ibalulwile pa kumulesha penda ekotshi dya mutemuki, na Akazyase bakwile nka paapa’shi: “Nyi Eliya!” (2 Banfumu 1:7, 8) Mushindo ubaadi Eliya aulesha’shi baadi na nshalelo mupeelepeele, na’shi baadi mwipaane mu kufubila penda Efile Mukulu na bibaadi bilombene kulesha bi nfwadilo aaye. Mu binyibinyi, takubaadi kintu kibaadi kilombene kwakula Akazyase sunga baledi baye nya, mwanda babadi bafule bintu bya kumbidi ngofu. Kileshesho kya Eliya akitutentekyesha lelo uno bwatudya kulonda elango dya Yesu dya kwikala na nshaleelo mupeelepeele, bwa’shi meeso eetu atale nka ku myanda i na muulo ngofu.​—Mateo 6:22-24.

Kukyeba kwa kwalusha bubi ku bubi, Akazyase baadi mupalakashe kisaka kya basalayi 50 na mukata aabo bwa kukwata Eliya. Nsaa i babamwene Eliya “mushaale ku songo kwa mwengye” * mukata a basalayi bapasukile ayitanyina Eliya mu eshina dya nfumu’shi: “ika,” EEM​—Bu muntu akyebe kumutwala bwa kwenda naye mu kumwipaa. Banda kunangusheena! Sunga mbibabadi abauku’shi Eliya baadi ‘Muntw’Efile Mukulu a binyibinyi,’ basalayi booso ababangile kupusha moo’shi e kwibasashila, ngi abo nkubanga kumutshinyisha. Mbubi kinyi bubabidi! Eliya balungwile mukata abo’shi: “Su nee muntw’Efile, kaalo kaikye mwiyilu, kakushiikye, obe na bantu boobe makumi ataano!” Efile Mukulu bakitshine nka byabya! “Kaalo kabaayikile mwiyilu, naa kabaamushiikile, aye na bantu baaye makumi ataano.” (2 Banfumu 1:9, 10) Mwanda wa kukaanya ubamwenekyele kwi basalayi booso bwabadya kushinguula’shi Yehowa tamulombene kukumiina’shi bakitshine bafubi baaye myanda kushii kanemo sunga ya kwibabepula nya.​—1 Myanda 16:21, 22.

Akazyase batumine ungi mukata na basalayi 50. Yawa mukata a kabidi baadi bukyelo kukila a kumpala. Anka kintu kimune, tabaadi muukye kintu kimune bwa lufu lwa baba bantu booso 51, babaadi bashale buto bwabo ku mwengye nya. Bwa ungi musango, tababaadi nka penda baakule aa mayi a kubepuula ababakwile kwi bakwabo kumpala’shi: “Ika” nya, abakumbeshe dingi eyi balungula Eliya’shi, “bukidi!” Babaadi batshikame bikile! Byabya aye na basalayi baaye, babafwile nka mu kipaso kimune kibafwile kyakya kisaka kya basalayi ba kumpala. Sunga bibaadi mutshikame ngofu, baadi nka bu Nfumu. Bu bibaadi na mutwe wibukopo, batumine dingi kisaka kya kasatu kya basalayi. Mwanda wa muloo, uno mukata a kisaka kya kasatu baadi na kinangu. Na kwiyisha kooso baadi mwifubwile kwi Eliya na kumwisendeela’shi aye na basalayi baye bamone bya kupanda. Kushii mpaka Eliya, muntw’Efile Mukulu, baadi muleeshe bi lusa lwa Yehowa nsaa ibaadi mwaluule uno mukata na kwiyisha kooso. Mwikeeyilu a Yehowa baadi mulungule Eliya bwadya kwenda na bano basalayi. Eliya baadi mukookyele na dingi baadi mwambuulwile uno nfumu ebubi mayi a Yehowa. Bakwile’shi mayi aafiki kwi Efile Mukulu abinyibinyi aamba’shi, Akazyase afu. Bufumu bwaye bubaadi bukite nka penda bipwa bibidi.​—2 Banfumu 1:11-17.

Eliya baadi munyingiile naminyi sunga mbibandi bantu na mutwe wibukopo, ba ntomboshi kwi baba booso babadi bamwifunyishe? Abilesha lukonko leelo uno, ta naabyo su? Todi namu mufiite munda su muntu apela nkuteemesha mu kipaso kibuwa na atungunuka na kulonda mashinda ebubi su? Twi balombene kunyingiila kuno kubingwabingwa naminyi? Twi kupeta dilongyesha ku mushindo ubaadi upete basalayi ku mbalo ibaadi Eliya, “kusongo a mwengye.” Tatwi balombene kwakula nka’shi Eliya baadi kwakwa nya, anka twi kwamba’shi bu bibaadi muntu a nteko ibungi, basangeene’shi yaya mbalo ibaadi buwa bwadya kushala kushii tuleo bwa kupeta mushindo wa kwifubwila kwi Efile mukulu aye sha kifulo. (Shake 5:16-18) Abitungu twikale atwata nsaa ya ya kwikala mu uumune n’Efile Mukulu, kwitanyinwa mwishina dyaye na bwa kukambila nkalakashi yetu na myanda imutale. Atukekala dingi bibuwa na ngobesha ya kunyingiila nsaa yabetukitshina myanda ibubi kwi bantu betwifunyishe na kwilwishisha atwe banabene.

Nsaa ya Eliya kuleeka mudimo waye wefuku dyooso ibalombene. Lamiina bibaadi mukite. Aye na Elisha babakatukile ku eumbo dya Gilgale, Eliya balungwile Elisha bwadya kushaala kwakwa nsaa ibaadi mwende, bupenka, ku Betele, pe bula bwa bilometre 11. Lwalulo lwa Eliya lubaadi alulesha bi kitshibilo kyaye’shi: “Na bi Yehowa na mûwa na byodi’be namu nao, tankakulekye’mi!” Kunyima kwa bano bantu babidi kufika ku betele, Eliya baadi mulungule Elisha’shi mulombene kwenda ku Yeeriko, aye nabene mbalo i bula bwa bilometre bifikye 22. Elisha baadi mwaluule kushii kunyengakana nka bu bibaadi mukite kumpala. Mususa wa kasatu, ku Yeeriko, kubakitshikile ingi myanda kumpala kwabo kufika ku mwela wa Yoordano, wi mbalo i peepi bilometre 8. Dingi nsongwalume baadi mushaale bashadile kushii moo. Ta mulekya Eliya!​—2 Banfumu 2:1-6, EEM.

Eliya baadi muleeshe eyikashi dibuuwa, kifulo ki na lulamato. Kino ngi kifulo kibabadi baleeshe Naomi kwi Luuta, kifulo kina lulamato kwi mukwabo na akipele kumuleka. (Luuta 1:15, 16) Abitungu bafubi booso b’Efile Mukulu bekale na dino eyikashi​—bikishekishe leelo uno. Tubamono kalolo kineemo kya bibaakitshine Elisha su?

Eliya baadi munyingishibwe ngofu pakumona kifulo ki na lulamato kya kuuku aye nsongwalume. Mwanda wa byabya, Elisha bapetele mwabi wa kumona kilengyeleshi kya nfudiilo kya Eliya. Ku kyese kya Mwela wa Yoordano, mwela wikale na mpumo n’edindji, Eliya bakupiile kilamba kyaye mu meema. Meema nkwitshiba pankatshi! Na dingi kino kilengyeleshi abaadi bende mu kwikimona kwi ‘makumi ataano a ba munkatshi mwa baana ba batemuki’ mu binyibinyi, kya pankatshi kya mu kisaka kya bantu balongye bebungi babadi balambukishibwe bwabadya kwikala mu lulangilo lwi selele mu eumbo dishima. (2 Banfumu 2:7, 8) Eliya baadi mumone pangi’shi abitungu kulambukisha bantu uno programe. Kubaadi nsaa mu bipwa bya kumpala bibabadi abapusha kwi Eliya’shi nka penda aye ngi sha lukumiino mu eumbo dishima. Kunyima, Yehowa bapeele Eliya efuto bwa kunyingiila kwaye, aye nkumulekyela bwa’shi amone mwanda ukata aukitshika munkatshi balangwidi baaye.​—1 Banfumu 19:10.

Kunyima kwabo kufumankana ku mwela wa Yoordano, Eliya balungwile Elisha’shi: “Teka kintu kilombeene nakukitshiina kumpala kwa kutentulwa kwande!” Eliya baukile’shi nsaa yaye ya kwenda ibalombana. Tabaadi na mukao bwa mashito sunga nkumo ilombene kupeta kuuku aaye mukinga mu mafuku e kumpala nya. Anka, Eliya baadi mukumiine kumukwasha mumishindo yooso. Elisha batekyele nka penda’shi: “Nakyebe namu kupyana bipindji bibidi bya ku bukome bwa kikudi kya Yehowa bodi n’abo!” (2 Banfumu 2:9, EEM) Tabipushisha’shi baadi akyebe kya mbibidi kya kikudi ki selele kya babapetele ku mwengye kwi Eliya nya. Anka, baadi mutekye bupyanyi bu bwa mwana mbedi, baadi apyana kintu kikata muyile mwiya, sunga’sh kya mbibidi, bu kupyana mashito ebungi apya a bu nfumu a kifuko. (Miiya Ikituulwe 21:17) Kikudi kya Eliya ky’eshimba dinyingye, abimweneka’shi akyebe kushinkamisha lukalo lwa kupeta kikudi kya kwikala n’eshimba dinyingye bu dya Eliya bwa kukita byabya bibaadi akitshi namu.

Na kwiyisha kooso, Eliya balekyele shi Yehowa aluule. Su Yehowa baadi mukumiine shi Elisha amone Eliya bu bibadi Efile Mukulu mutumine mutemuki aye eyi, lwalulo lw’Efile mukulu ku luteko lwa Elisha lubaadi’shi oolo. Na dingi kumpala kwa paapa, bano bakuuku babidi baba bashale pamune munda mwa nsaa ibabadi, “abend’abesambanga,” kubadi kukitshikye kintu kya kukaanya!​—2 Banfumu 2:10, 11.

Kubamwenekyele kintu kipya akifiki mwiyilu ki bu Etata dya kaalo akifubwila peepi ngofu. Twi kunangusheena kituumo kyakyo, bu kipapi kibukopo akipenyapenya bu kaalo akiibabuula, pangi kyakya kintu kibabamwene kibaadi kibaalushe kunyima pa bukopo na kwibakwatshisha moo. Kino kibabamwene kibaadi bu mootoka, etempu, akimekameka bu etaata dya kaalo. Eliya baukile’shi nsaa yaaye ibalombana. Bakamiine mwanka su? Binyibiny Eliya baadi epusha bu bamutwale mu lupaapi, bamutulule kwi kingumbongumbo!

Elisha baadi atala, akaanya ngofu. Mwanda bamwene kintu kya kukaanya akikitshika, Elisha bashinkamishe’shi Yehowa amupa “bipindji bibidi” bya kikudi ky’eshimba dinyingye dya Eliya. Anka pabaadi Elisha anangusheena pa uno mwanda, baadi enyongola ngofu. Mwanda tabaadi auku akwende kuuku aye ap’eshimba taadi mununu nya, na tabadi dingi na lukulupilo’shi e kumona Eliya dingi nya. Belele musase’shi: ‘Nshaami baabo! . . . Etempu na baasha-mfwalasa ba Isaleele!’ Baadi abandjila nshaye a kifulo kwashimina; dingi Elisha basanwine kilamba na kenyongoshi.​—2 Banfumu 2:12.

Nsaa ibaadi Eliya mutentulwe mwiyilu, bapushishe kudila kwa kuuku aye nsongwalume na pangi banokyeshe mpolo aye nabene su? Baadi ashinkamisha shi kwikala na kuuku e bino kubaadi kumukwashe bwadya kushaala munyingye mbipungo bi bukopo. Abitungu tupetele dilongyesha ku kileshesho kya Eliya na kunyingisha kipwano kyetu na bantu bafule Efile Mukulu n’abakumiina kukita akikyabe eshimba dyaye!

Kunyima kwa paapa, Eliya bayile dingi kunyi? Bingi bipwilo abilongyesha’shi bayiile mwiyilu mukushaala n’Efile Mukulu. Anka byabya bi bukopo. Bipwa nkama kunyima, Yesu Kidishitu bakwile’shi takwi muntu sunga ngumune mwende mwiyilu kukatusha aye muyikye mwanka. (Yowano 3:13) Nsaa yatubadika’shi “Eliya bebwesheshwe mwiyilu mu kingumbongumbo kya lupapi” twikwiyipusha’shi, eyilu kinyi? (2 Banfumu 2:11, EEM) Bible afubaa na kishima “Eyilu” kushii bwa kuleesha penda mbalo ishale Yehowa, anka akileesha dingi mu lupapi, mwi makumbi na toonyi atupapama. (Misambo 147:8) Mu aa mayilu​—Eyilu—​Ndjo mubaadi Eliya mwende. Nkinyi kibakitshikile kunyima?

Yehowa baadi penda mukatushe mutemuki aye a kifulo amutuma ku mudimo upya, yaya nsaa ku lupese lwikungisheene na bufumu bwa bena Yuuda. Bible aleesha’shi Eliya batungunukile dingi na kufuba kwakwa kubayile, pangi bipwa bikile pa musambo-bidi kunyima. Mu mafuku a bufumu bwa beena Yuuda kubadi nfumu mubi Yorame baadi mumunane. Baadi mwibakile mwana a Akabe na Yezabele baadi anka babaadi abatungunuka na kwikala na bukitshishi bwibubi ku mudimo. Yehowa balungwile Eliya bwa kufunda mukanda wi na kiimu kya Yorame. Nka bu bibaadi mwakule kumpala, Yorame bafwile lufu lwa malwa. Bikishekishe bubi, uno mwanda aufudiila bino: “Bafwile, kushii muntu kwinyongola pa mwanda waye.”​—2 Myanda 21:12-20.

Kwi kwilekeena kwi kashaa pankatshi pa uno muntu mubi na Eliya! Tatuuku mafuku sunga mushindo ubafwile Eliya nya. Anka atuuku’shi bafwile lufu lushii bu lwa Yorame, shibaadi na muntu mulombene kwinyongola pa mwanda waye. Elisha bashimiishe kuuku aye. Bangi batemuki ba sha lulamato abaadi bakite namu nka byabya. Yehowa aye nabene batungunukile na kufula Eliya munda a bipwa 1 000 kunyima, mwanda bafubiishe kifwanyi kya mutemuki aaye a kifulo mu kimonwa kya kwaluluka. (Mateo 17:1-9) Okumiina kulonga bibungi pabitale Eliya na kutamisha lukumiino lobe bwa kunyingiila sunga wekala mu bitompwanga su? Tolubangakwikala na kipwano kibukopo na bangi bantu bafule Efile Mukulu, kwipaana mu kufubila Yehowa, na kwela nteko ayitukila mwishimba. Byabya obombeela mwishimba dya kifulo dya Yehowa!