Mmushale mu nsenga, mbidi yaye yoso kubanga ku mutwe na ku mikoolo ngiwule na mapote e busungu bukile. Banda kumumona mu binangu, mmubandame, mapamba ngamupulumukye, e bupenka, e na ka bukome ka kubinga nshishidi imwifunyishe. Mmushale bu muntu e na maalo mu butoo, kwete nka kwinyaa na kipese kya kilangilangi. Bashimisha bintu bibungi; ekeele na kineemo Binobino tabadi bamusumbushene! Ba kuku baye, bena kifulo na bankungishanyi naye abamusumbushena. Bantu booso bakwete kumusepa, mpa na bana bakinga. Eele binangu’shi mpa n’Efile Mukulu aye Yehowa bamusumbushena, anka tabibadi byabya nya.​—Yoobo 2:8; 19:18, 22.

Uno muntu atwisambila nyi Yoobo. Efile bamulugwile’shi: “Tee na a kumupwandjikisha naaye pa nsenga.” (Yoobo 1:8) Kunyima kwa bipwa nkama, Yehowa badi atulu Yoobo munkatshi mwa bantu ba sha kululama.​—Esekiele 14:14, 20.

We na lukalakashi sunga mwanda ukukile bukopo su? Mwisambo wa Yoobo ngulombene nkunyingisha. Wi nkupa dingi binangu n’eyikashi di nayo lukalo mufubi oso a Efile Mukulu bwa kushala na​—kululama. Bantu abaleshaa kululama nsaa yabashala na lulamato kwi Efile Mukulu na abatungunuka na kukita kikyebe ky’eshimba dyaye sunga bekala mu bitompwanga. Tutale abitulongyesha Yoobo pabitale uno mwanda.

Mwisambo wa nshalelo a Yoobo abimweneka’shi Moyise muntu sha lulamato nyi beufundjile kunyima kwa mafuku na Yoobo kufwa. Ku bukwashi bwa kikudi keselele, Moyise badi na ngobesha kushi ya kufunda penda myanda ya Yoobo ibakitshikile pa Nsenga, kadi mpa na ingi ibakitshikile mwiyilu.

Ku mbangilo kwa mwisambo waye, Yoobo badi na nshalelo e buwa a muloo. Badi na bupeta bwibungi, abadi abamuku kalolo na kumuneemeka mu eumbo dya Uze​—pangi dya kunundu kwa Arabie. Badi akwasha balanda na muloo oso na kukalwila bantu bashadile. Yoobo na mukashi aaye abadi na muloo wa kwikala ba nambutwile be na bana ekumi. Kukatusha byabya Yoobo badi muntu a mu kikudi. Badi akimbi bya kusangasha Yehowa nka bu bibakitshine ba nshaye kulu Abrahame, Isake, Yakobo na Yosefe. Nka bu bano bantu ba lukumino, Yoobo badi akitshi mudimo wa bu tshite mwakwidi bwa kifulo kyaye pa kutusha milambu pa kyubishi bwa bana baye.​—Yoobo 1:1-5; 31:16-22.

Musango umune, mwisambo waye ubashintuluka. Abetulesha kapela myanda ibadi ikitshikye mwiyilu ishibadi ayiwuku Yoobo nya. Miikeyilu i na lulamato ibadi ibungye kumpala kwa Yehowa, akupu Satana mwikeyilu mutombokye batwelele. Yehowa baukanga’shi Satana kwete kubepuula kululama kwa Yoobo, bibobino Yehowa akaka binangu bya Satan pabitale kululama kwa Yoobo. Satana balwile’shi: “Yoobo atshinaa Efile Mukulu bisumanga su? Twe mumulame mu lupango, aye, na nshibo yaye na bintu byaye byoso su?” Satana mmushikwe bantu be kululama kwi Yehowa, mwanda kululama kwabo akulesha patoka’shi Nsatana mwikale nsensa. Nyi bwakinyi Satana badi akula’shi Yoobo badi afubila Efile Mukulu nka penda bwa buwa bwaye’ye nabene. Satana bambile’shi su Yoobo ashimisha bintu byoso, apele Yehowa musango umune!​—Yoobo 1:6-11.

Yoobo tabadi bya kwibiwuka nya, anka Yehowa bamupeele kineemo kikata: Kya kulesha’shi Satana sha madimi. Yehowa badi mulekyele Satana bwadya kunyenga Yoobo byoso bibadi nabyo. Tabadi na kya kukuma penda ku muwa waye. Satana bapushishe muloo wa kukita midimo yaye ya bu dyabulu. Penda mwifuku dimune, makyenga na malwa bikawatshile Yoobo. Abo nkumulungula’shi nyema yaye yoso ibaafu mpa na balami bayo abebayipaa. Umune badi mumutwadile mukandu nkumulungula’shi nyi “kaalo kabafiki kwi Efile Mukulu,”​—pangi mpeshi. Kumpala kwa’shi Yoobo ashinkamishe’shi baba bantu boso babafu sunga kwela binangu’shi bashala Mulanda, ungi mwanda wa malwa ubamufikila: bana baye ekumi Bekele mu nshibo mwa mukulu a ku booso, kipapi kibafiki musango umune kibambula nshibo, ibebaponena abafu booso!​—Yoobo 1:12-19.

Bi malwa, pangi twi kukutwa kupwandjikisha bibapushishe Yoobo. Basanwine bilamba byaye, aye nkwikuula kapweto, kubanga kwialasha mu nsenga. Yoobo Nkumona’shi Yehowa nyi bamupeele byoso, akupu bamwata byanka. Mwanda Satana bakitshine myanda na mayele ooso bwa’shi Yoobo amone Efile Mukulu nyi bamutumina aa makyenga ooso. Sunga mbyambya, Yoobo t’abatopekyele Efile Mukulu su mbipeela. Anka Yoobo bakwile’shi: “Eshina dya Yehowa dyende ntumbo.”​—Yoobo 1:20-22.

Na nsungu yooso, Satana ntamulekyele Yoobo nya. Ungi musango, pabadi miikeyilu ibungye kumpala kwa Yehowa, Satana bafikile dingi. Jehovah nkutumbisha dingi Yoobo mwanda wa kululama kwaye, mwanda bashadile nka na lulamato mu bino bitompwanga byoso. Satana nkwalula’shi: “Kii na mwanda mbidi. Kyooso kii nakyo muntu, eekipaana bwa muwa waye. Anka kumiina kool’eyaasa, okume ku mifufwa yaaye na ku mbidi yaaye. Nkushinkamisha’shi akutshipe [nkusabuula] patooka.” Satana badi amono’shi su Yoobo akumba bikata, akyebe kusabuula Efile Mukulu. Yehowa bibadi na mukulupile bikata mwi Yoobo, badi mutadiile Satana bwadya kumwikasha na malady, kadi kushiii kukuma muwa waye.​—Yoobo 2:1-6.

Mu kapindji kapela, Yoobo bafikile na maladi nka bu byatwibilesheshe kumangilo kwa uno mwisa mbo. Banda kwela binangu bibapushanga mukashi aaye. Mmupwe kusaasuka eshimba na lufu lwa bana baye ekumi, binobino te na ka bukome su nkapeela na te na muntu a kukwasha mulume aye e na maladi akile bukopo! Mwanda wa kinyongwa kikilekile, aye nkwamba’shi: “Okyonyingiila mu bululame boobe su? Tombokyel’Efile Mukulu, owukye kwinyi kufwa!” Yoobo tauku dingi su nyi mukashi aaye adi mufule. Aye nkwamba’shi mukashi aaye badi akula’nka bu muntu bashimisha binangu. Yooboo tabadi musabuule Efile Mukulu aaye nya. Na tabakwile mwanda wibubi su ngumune.​—Yoobo 2:7-10.

Ouku’shi uno mwanda wi malwa kadi wa binyibinyi ngukutale pabupenka? Ouka’shi Satana tabadi penda mufunde Yoobo nya, kadi munfunde bantu booso. Bambile’shi: “Kyooso kii nakyo muntu, eekipaana bwa muwa waye.” Mu ungi ngakwilo, Satana amono’shi takwi muntu molombene kobesha kwikala mululame! Amba’shi obe twe na kifulo kya binyibinyi bw’Efile Mukulu nya, we kumusumbushena bodya kukimba kupaasha muwa obe. Satana amono dingi’shi okwete kwikimbila penda buwa bobe bu byadi’ye! Okumina kushinkamisha’shi byakula mbya madimi? Ooso a kwatudi e na kinemo kya kulesha’shi Satana nsha madimi. (Nkindji 27:11) Binobino tutaleyi nkalakashi ibapetele Yoobo kunyima.

Bana balume basatu babadi abuku Yoobo, Bible ebalesha bu ba kuuku baye sub u bantu babadi eukena nabo, nsaa ibabapushishe pabitale bitompwanga byaye, abayile mu kumutembela bwa kumunyingisha. Nsaa ibabamumwene ku bula, tababadi bamutundele nya. Mwanda badi na kinkuse pa mbidi ishima, kikoba kyaye kibadi kipwe kufiita na maladi. Bano bana balume basatu​—Elifaze, Bildade na Zofare—​abo nkulesha kinyongwa kikata, pa kwiyela mpa na buto mu mitwe. Abashalele mu Nsenga kushii kwakula kantu su nkamune. Abadi bashale pa bwipi na Yoobo munda mwa lubingo lushima, kushii kwakula su nkapeela. Tatwi balombene kwakula’ shi kwakwa kuwumiina kubadi kunyingishe Yoobo, mwanda tababakwile kantu su nkamune, anku namu Yoobo badi mu dikyenga dikata.​—Yoobo 2:11-13; 30:30.

Nfudiilo a byoso, Yoobo babangile mwisambo aye nabene. Kushii kufya busungu bwaye, Yoobo nkwitshipa bw’efuku dibatandjikilwe. Akupu aye nkulesha bwakinyi tabadi dingi na lukulupilo. Badi amono’shi Efile Mukulu nyi nsulo ya makyenga aaye! (Yoobo 3:1, 2, 23) Anka Yoobo badi nka muntu sha lukumiino badi lukalo na kunyingishibwa. Kadi nsaa ibabangile kwisamba bano bantu abafikile mu kumutembela, Yooboo bamwene babadya kushala baumine kushii kwakula.​—Yoobo 13:5.

Elifaze, pangi badi mukulu a Yoobo nkubanga kwakula. Akupu, bangi babidi ababangile nabo namu kwakula. Abo’nyi dingi, twi kwakula’shi abadi bakumbashe binangu byabo nka bya Elifaze. Ingi myanda ibabadi bakule ibadi ibubi. Miisambo yabo boso basatu ayibanga myanda ayikambaa kwakula bantu bebungi pabitale Efile Mukulu, na ayimwenekaa bu ibuwa, bu kileshesho; Efile Mukulu e kwibula, apeyaa bantu bebubi kiimu na apeyaa bantu bebuwa efuto. Kubanga ku bishima byabo bya kumbangilo, abimweneka’shi ta be na kalolo nya. Elifaze bakwile bishima bu abimweneka bu bibuwa pa kwamba’shi su Efile Mukulu e buwa, anyokaa bantu bebubi, n’ashi badi anyooko Yoobo, binobino twi kwamba naminyi? Ta bya kwikala’shi Yoobo nabene badi mukite bibubi?​—Yoobo 4:1, 7, 8; 5:3-6.

Mu kwakula kwa binyibinyi, Yoobo tabadi musangeele bino binangu byaye nya. Badi mwipele n’eshimba dimune. (Yoobo 6:25) Bino byoso bibadi abitakula bano bantu basatu abafikile bwa kumulanga bwa kushinkamisha’shi Yoobo badi mukite myanda ibubi yadi mufwamishe; nyi bwakinyi in o myanda yoso ibubi ikwete kumufikila. Elifaze nkufunda Yoobo’shi badi muntu ebubi shyatshinyi Efile Mukulu na akitshi myanda yashii na matalwa. (Yoobo 15:4, 7-9, 20-24; 22:6-11) Zofare nkulungula Yoobo bwa kuleka kukita myanda ibubi na milwisho. (Yoobo 11:2, 3, 14; 20:5, 12, 13) Bildade nkumupudika ungi mwanda. Apwandjikisha shi bana ba Yoobo mbakite milwisho, nyi bwakinyi babafwile mwanda wa bikitshino byabo!​—Yoobo 8:4, 13.

Bano bana balume basatu be mu kilubilo abadi banyinshe kukita bibubi. Abambile’shi te na kululama kwi Efile Mukulu n’ashi ta bi na muulo kwikala na kululama kwi Efile Mukulu! Mu mayi aaye a mbangilo, Elifaze alesha bibadi mufumankane na kikudi kapanda. Bwa kufudiisha, Elifaze balesheshe binangu bibubi bya Satana pabakwile’shi: “Efile t’aakulupilaa mwi bafubi baaye no faith in his servants, and he finds fault with his angels.” Muyile ano mayi aaye, bantu ntambolombene kusangasha Efile Mukulu su nkapeela! Kunyima, Bildade nkwamba’shi kululama kwa Yoobo takubadi na muulo ku meso kw’Efile Mukulu nya, kukila mpa na kululama kwa musanda!​—Yoobo 4:12-18; 15:15; 22:2, 3; 25:4-6.

Tobotompele kunyingisha muntu e na kinyongwa kikata su? T’abikalaa bibofule nya. Anka twi balombene kulongyela bibungi pabitale bilubilo sunga bilema bibakitshine bano ba bantu basatu, bikishekishe pabitale myanda yatushii balombene kwakula. Mu miisambo yabo ikile bungi na ishii buwa, takwi musango su ngumune wabadi betamine Yoobo mwishina dyaye! Bu byabashibadi abetuulu pa mbalo ya Yoobo, tababapushishe’shi abitungu kumukitshina myanda na kalolo. * Byabya, su wesamba na muntu mutapikye kwishimba, etatshishe bwa kwakula na kibobo, na kalolo na kukimba kwituula pa mbalo yaaye. Kimba byodya kunyingisha lukumino lwaye bwa kumukwasha bwadya kukulupila mwi Yehowa na kushala mushinkamishe’shi nyi Efile Mukulu e na buwa bw’eshimba, e na lusa na e na kululama. Nyi kibadi Yoobo na kya kukitshina baba ba kuku baye su nnaye badi pa mbalo yabo. (Yoobo 16:4, 5) Kadi Yoobo bakitshine naminyi sunga byekala’shi abadi bamutopekye mwanda wa kululama kwaye?

Ku mbangilo kwa uno mwisambo wabo ula, Yoobo badi mupwe kutshoboloka kwishimba. Kubanga nka paapa, bapushishe’shi ingi nsaa badi akula “bwakulakule” na bu “muntu shi na lukulupilo.” (Yoobo 6:3, 26) Na wi kumupusha kalolo bwakinyi akula byabya. Bishima byaye bibadi abilesha kinyongwa kibadi nakyo mwishimba. Bibadi abilesha dingi kukukwa kwa kuuka myanda yooso. Mwanda bibadi ano malwa amufwile na kifuko kyaye, dingi mu kipaso kya kukaanya, Yoobo badi amono’shi aafiki kwi Yehowa. Bu byashibadi auku myanda ibungi i na muulo ukata, badi apwandjikisha myanda ibungi ya madimi mu mutwe waye.

Sunga mbyambya, Yoobo badi muntu sha lukumiino lunyingye ngofu. Mayi ebungi mu uno mwisambo wabo wibula aalesha shi badi na lukumiino. Na bibadi akula mbya biinyi na bi abitunyingisha lelo uno. Dingi, kushii bukwashi bw’Efile Mukulu, takwi muntu e kutumbisha Mupangi bu bibakitshine Yoobo pabadi akwila bwa bipanwa. Bu kileshesho, bambile’shi Yehowa nyi ‘mwimikye nsenga pashii kintu,’ mayi abadi bafikye kutundula kwi bena siyanse kunyima. * (Yoobo 26:7) Na pabadi mwakule myanda yadi mufumankane nayo, badi mushinkamishe myanda nka bu bangi ba sha lukumiino lukata babadi na muwa kumpala kwaye. Yoob badi mukumine’shi sunga lufu lwamukwata, Efile Mukulu badi na kya kumutentekyesha, tabadi na kya kumushimisha binangu nya, badi na kya kumusangula ku lufu.​—Yoobo 14:13-15; Beena-Ebelu 11:17-19, 35.

Kadi twi kwamba naminyi pabitale kululama? Elifaze na bena dyaye babidi abadi bashinkamishe’shi kululama kwa muntu takwi na muulo su ngupeela ku meeso kw’Efile Mukulu. Yoobo badi mukumine byabya binangu bipatakane su? Su nkapeela! Bambile na kushinkamisha kooso’shi Efile Mukulu aataa kululama kwa bantu na muulo ukata. Nyi bwakinyi bakwile na lukulupilo looso pabitale Yehowa’shi: ‘Atundula kupwadika kwanda.’ (Yoobo 31:6) Akupu, Yoobo batundwile kalolo’shi binangu bya baaba abadi abeamba bu babafiki mu kumusamba bibadi abimutopeka bwa kululama kwaye. Nyi kibadi kitakule Yoobo mu kwisamba myanda ikile bungi, ibadi ifungishe bano bana balume basatu mukanwa.

Yoobo bapushishe’shi abitungu kwikala na kululama mu nshalelo a kwifuku n’efuku. Badi mukalwile nshalelo a na mushindo waye wa kukita myanda. Bu kileshesho, badi mupele mushindo yoso ya lulangwilo lwa ma nkishi; badi akitshina bangi myanda na kalolo na kaneemo; bashadile mutokane mu binangu na mubambe eyibakishi dyaye; na kukatusha byabya byoso, bashadile na lulamato na mwipaane penda kwi Yehowa, Efile Mukulu umune a binyibinyi. Nyi bwakinyi Yoobo badi na ngobesha ya kwakula n’eshimba dimune’shi: ‘Mpaa na pankafwila, ntshi mulombene kushimisha kululama kwande!’​—Yoobo 27:5; 31:1, 2, 9-11, 16-18, 26-28.

We na mweneno bu a Yoobo pabitale kushala na kululama su? Mbibofule kwakula’shi twi na kululama, kadi nka bu bibapushishe Yoobo, tabitungu twikale na kululama penda mu kwakula nya. Atulesha’shi twibepaane n’eshimba dyetu dyoso kwi Efile Mukulu, p’atwe kumukookyela na kukita bimulongamine mu nshalelo eetu a kwifuku n’efuku, sunga mu nsaa yatudi mu nkalakashi i bukopo. Su twi nshalelo e byabya, atukyebe kusangasha Yehowa na kufiitshisha mwishikwanyi naye Satana munda nka bu bibakitshine Yoobo. Nyi mushindo ukile buwa wa kwambula lukumiino lwa Yoobo!

Dingi, mwisambo wa Yoobo nta ngwimeene nka paapa nya. Bakutshilwe kwikala na nkatshinkatshi, pa’ye kukalwila kululama kwaye, kadi nkuyilwanka Efile Mukulu. Bibadi abitungu ashintule mweneno aaye a myanda na apete bukwashi bwa mu kikudi. Na bu bibadi nki nka na busungu na kinyongwa, badi lukalo na kunyingishibwa. Yehowa bakitshine kinyi bwa uno muntu sha lukumiino na kululama? Ungi mwisambo wa ku ino miisambo aukaluula ku ino nkonko.