Nanggusheena musalayi e ku kilwilo kya ngoshi bupenka kwete kwikitshisha bwa kukatuka mbalo i kabaaka i kibobo na kukamina ku mabwe. Muyiile kumona, basalayi ba bena Filistine mbashaale kwakwa abasangana kintu kibebakanyisha mu mweneno aabo abo banabeene: Bantu babidi ba bena Isaleele, mbemane mu mbalo mwabamono mpoongo. Basalayi bakwete kwasha maasha​—paapa tabamwene ngoshi nya. Bena Filistine babaadi bamune bena Isaleele munda mwa mafuku ebungi, tabauku su nga mbya kupeta bina mufubo byabo na bilonda bya mbalo ya bamunyinaa nyema byabadi banone bwashi bibakwashe bwa kwenda nabyo kwi beshikwanyi baabo bena Filistine. Basalayi ba bena Isaleele ta be na kintu kya kulwa nakyo. Kunundu kwa byabya, be nka penda bantu babidi! Sunga bekala na bina ngoshi, mputu kinyi ibadya kwibakwasha bwa koobesha? Mwanda wa tusepo, bena Filistine ebeelele musaase’shi: “Fika kuno kwatudi, twi na mwanda wa kwinulungula”​—1 Samwele 13:19-23; 14:11, 12.

Kubaadi kulombene kukitshika mwanda, anka bena Filistine booso tababadi na muntu badya kwibalongyesha wanka nya. Bena Isaleele babidi babayile lubilo mu mpoongo bwa kushika na kubanga kukamiina peepi nabo. Babadi beele binangu bya kufubisha maasa na ngwa yaabo, anka babatungunukile na kufika. babakammiine ku mabwe batadiile dya ku kilwilo kya ngoshi! (1 Samwele 14:13) Binonino bena Fililistine babaadi bakumbene kwikala bashinkamishe’shi muntu ebaludika ekale na bintu bikumbane bya kulwa nabyo ngoshi; mwikale dingi na muntu mumutwadile bina ngoshi bilombane amulondo kumongo. Byabya baadi na kya kuludika bantu babidi bwabadya kwenda mu kulwa ngoshi na kisaka kishima kya beshikwanyi su? Uno muntu ta babaadi na mombe su?

Tabaadi mombe nya; baadi muntu sha lukumiino lwi bukopo. Eshina dya mbuu Yoonatane, na mwanda waye nyi ndilongyesha dikata kwi bena Kidishitu ba binyibinyi leelo uno. Byabya ngoshi yatulu ta ngya musamba na mase nya, anka abitungu tulongyele ku kileshesho kya Yoonatane kitale eshimba dinyingye, lulamato, na kwipaana ngofu bwatudya kwikala na lukumiino lunyingye lwatudi nalo lukalo.​—Yeeshaya 2:4; Mateo 26:51, 52.

Bwatudya kupusha bwakinyi Yoonatane baadi mwalulukile bano basalayi babaadi ku kilwilo kya ngoshi, abitungu mbalo yaadi mukudile. Yoonatane baadi mwana mbedi a Saule, Nfumu a kumpala a mu Isaleele. Nsaa ibababelele Saule mwimu afika bu Nfumu, Yoonatane baadi mupwe kwikala songwalume, pangi baadi na bipwa 20 sunga kukila paapa. Abimweneka’shi Yoonatane baadi mwikwateene na nshaye ngofu, baadi mukumbene kulekyela mwana aye ingi myanda. Kumbangilo kooso, Yoonatane baadi muukye nshaye kalolo kushi penda bu muntu mukulu, kadi dingi bu muntu ebuwa na bu kilobo kya ngoshi, dingi bu kintu ki na muulo ukata​—muntu sha lukumiino na mwiyishe. Yoonatane bamwene bwakinyi Yehowa baadi musangule Saule bu Nfumu. Sunga mutemuki Samwele baakwile’shi takwekele dingi muntu e bu Saule mu Nsenga!​—1 Samwele 9:1, 2, 21; 10:20-24; 20:2.

Yoonatane baadi mukumbene kupusha bu e na kineemo kya kwikala mushi mwa matalwa a nshaye bwa kulwa ngoshi na beshikwanyi ba mwilo wa Yehowa. Ino ngoshi yooso tayibaadi bu ino ya miilo yatudi nayo leelo uno nya. Mu mafuku a kala, Yehowa basangwile mwillo wa Isaleele bwaudya kulesha mpala yaaye, na babaadi munkatshi mwa bantu babadi abalangwila b’efile ba madimi. Bena Filistine, babaadi balwishibwe na lulangwilo lwa efile bu Dagon, na babatompele kulwisha mwilo ubabadi basangule kwi Yehowa bwa kwiubutula.

Bwa muntu bu Yoonatane, kulwa ngoshi kubaadi akulesha lulamato lwaye kwi Yehowa Efile mukulu. Na Yehowa namu baadi mwelele kwikitshisha kwa Yoonatane mwabi. Kapindji kapeela kunyi kwa Saule kufika bu Nfumu, basangwile mwana aye bu mukata basalayi 1 000, na Yoonantane baadi ebaludika bwabadya kulwa na Bena Filistine ku Geba. Tababadi na bina ngoshi bikumbane su baba abntu babadya kwikala panka, ku bukwashi bwa Yehowa Yoonatane baadi mutshokole ngoshi mwifuku dimune. Anka bwa kwalula, bena Filistine abasangwile basalayi bena bukome bwibungi. Basalayi bebungi ba Saule babadi na moo. Bangi babasukile lubilo bakafwama, na bapela namu babaadi balwe ku lupese lwa bena Filistine! Kadi pamwanda wa eshimba dinyingye dya Yoonatane tamubofule nya.​—1 Samwele 13:2-7; 14:21.

Efuku dimune dyabadi baleshe, Yoonatane baadi musukye na penda mutwadi aye a bina ngoshi ku lupese lwaye. Bu bibabadi abefubwila pepi na bena Filistine pa kilwilo kya ngoshi ku mikmase, Yoonatane balungwile mutwadi a bina ngoshi aye bi mpàngo yaye ya ngoshi. Abo banabene abaadi beleeshe kwi bena basalayi ba bena Filistine. Su bena Filistine babadya kupela bantu babidi bashii ba kulupese lwabo bwashi tabafikanga kwabadi, bino bibaadya kwikala bu kitunduilo kya’shi Yehowa akwasha bafubi baye. Mutwadi a bina ngoshi basangeele, pangi pamwanda mayi a kunyingisha a Yoonatane aaba’shi: “Takwi kya kumukutshishwa kwitupa ngobesha sunga twekala bungi sunga twekala babadikye.” (1 Samwele 14:6-10, EEM) Bino abipushisha kinyi?

Mu binyibinyi Yoonatane baadi muukye Efile Mukulu eaaye kalolo. Kushii mpaka mu mafuku a kala Yehowa baadi akwasha mwilo waye na kwiulwila ngoshi kumpala kwa beshikwanyi babaadi na bukome bukile bwabo. Ingi nsaa baadi na kya kufuba na muntu umune bwadya kutyshokola ngoshi. (Bansushi 3:31; 4:1-23; 16:23-30) Ngi bwakinyi Yoonatane baadi muukye’shi ta nku bungi bwabo sunga ku bukome sunga bina ngoshi bya bafubi b’Efile Mukulu kwababadi bobeshe nya, anka ku lukumiino lwabo. Dingi ku lukumiino, Yoonatane baadi mutadiile’shi Yehowa aate kitshibilo bwaye na bwa mutwadi aaye a bina ngoshi bwabadya kulwa na basalayi be ku kilwilo kya ngoshi; basaangwilo kitundwilo kimune bwa kuuka’shi Yehowa bakumiina. Su Yehowa badya kukumiina, Yoonatane tabaadi na kya kutshina nya.

Lamiina myanda ibidi ya ku lukumiino lwa Yoonatane. Wa kumpala, baadi na kaneemo kakata bwa Efile aaye, Yehowa. Baadi muwukye’shi Efile Mukulu sha bukome booso teena lukalo lwa bukwashi bwa muntu bwadya kulombasha mpàngo yaaye nya, anka Yehowa akumiinaa kwelela bafubi baye basha lulamato myabi. (2 Myanda 16:9) Wa kabidi, Yoonatane bakimbile kishinkamiisho akileesha’shi Yehowa bakumiina kumpala kwa kukita mwanda. Leelo uno, tatwi byakumona bitundwilo bikata bya kwi Efile eetu bya kutundula’shi bakumiina luteko lwetu bwa kukita kintu kampanda nya. Bu byatudi na eyi diyokyelwe n’Efile Mukulu, twi na byooso byatudi nabyo lukalo bwa kunangusheena ku akikumiina Efile Mukulu. (2 Timote 3:16, 17) Atubanda kutaluula akyamba bible kumpala kwa kwata kitshibilo kiina muulo su? Su oolo, atuleesha’shi atupasukilaa kukita akikumiina Efile Mukulu kumpala kwa byetu​—nkabu Yoonatane.

Byabya, bantu babidi, kinkome na mutwadi a bina ngoshi, babaadi bakaamiine lubilolubilo kutuka mu bwina bubaadi kumpala kwa pa kilwilo kya ngoshi. Nfudiilo a byooso, pababawukile’shi abebatuuku ngoshi, abatumine bantu bwa kulwa na bisaka bibidi bya beshikwanyi. Beena Filistine t’ababaadi nka penda na bantu bebungi nya, kadi namu abaadi na mbalo i kunundu ngofu, ngi bibaabadi na mushindo wa kumona bya kulwa ngoshi na bisaka bibidi luntuluntu. Anka Yoonatane bakupiile musalayi eese umune kwa umune. Anka kunyima kwaye, abaipayile mutwadi aaye a bina ngoshi. Mu kambalo kapeela kabaadi kepeepi naye, bantu babidi babepayile basalayi 20 ba beshikwanyi naabo! Na Yehowa naamu bakitshine kintu kikile kya kukaanya. Atubadika shi: “Bibekeele moo ukata mu lupata, mu mapya na munkatshy’a mwilo ushima. Epata dishima na biimankinda byooso, babaakwatshikile moo ukata abo baanabeene. Nsenga ibaatshinkile, dingi kubeekeele kutshiina kw’Efile.”​—1 Samwele 14:15.

Pabaadi ku bula, Saule na bantu baye babamwene mwanda wa kukaanya na wi moo munkatshi mwa beena Filistine, tabadi abelwila ngoshi abo baanabeene! (1 Samwele 14:16, 20) Beena Isaleele babanyingile mashimba na abo nkulwa nabo, pangi abaadi abaata bina ngoshi bya beena Filistine babaadi abafu. Yehowa baadi mupe mwilo waye kutshokola kukata dyadya efuku. Na ta mwalulukye kubanga aa mafuku nya. Su atwe namu leelo uno twatuula lukumiino mwadi, bibakitshiine Yoonatane na mutwadi aaye a bina ngoshi shina eshina, tatukapete kabingilo ka kwidila kusangula kwetu nya.​—Malaki 3:6; Beena-Looma 10:11.

Bwa Saule, kwakwa kutshokola takubaadi kukidikye kalolo bibaadi akumiina bwa Yoonatane nya. Saule bakitshiine bilubilo bikata. Baadi mupele kukookyela mutemuki aababadi batule kwi Yehowa Samwele paaye kulambula mulambu, ubaabadi abalambula nka kwi mwina Leevi baadi na aa matalwa. Pabafikile Samwele, balungwile Saule’shi pamwanda wa kupela kwaye kwa kukookyela, bufumu bwaye t’abwisha nya. Dingi, Saule pabatumine bantu baye ku ngoshi, belele mutshipo amba’shi: “Atshipibwe yaawa ooso akumu kya-kudya kumpala kyoolwa na kumpala kwandya kwiobwela kwi balwishi bande!”​—1 Samwele 13:10-14; 14:24.

Mayi a Saule abalesheshe’shi babanga kushintuuluka na kukita myanda ibi. Muntu baadi mwiyishe, na baadi muntu a mu kikudi bapetele lwabi na kwitatula naminyi? Kunyima kwa byooso, Yehowa tabaadi mwakule’shi beelele musalayi aaye afubu ngofu miya kampanda kushii kinangu nya. Na mayi ababakwile kwi Saule’shi “kwiobwela kwi balwishi bande”​—Abimweneka’shi Saule baadi amono yaya ngoshi bu yaaye su? Baadi mulube’shi kiimu kya Yehowa takibaadi kifikye bwa kupa Saule mushindo wa kwiobwela, kwi kimbila ntumbo na kutshokola su?

Yoonatane tabaadi muukye mwanda su ngumune pabitale mutshipo ubabadi bakite kwi nshaye nya. Baadi mukookye aye nkwela mukombo mu mpako a buuki na aye nkwibulamba; nka paapa bapushishe bukome bubamwalukila. Akupu muntu aye umune bamulungwile pabitale mutshipo wa nshaye utale kuleka kudya kintu. Yoonatane bamwalulwile’shi: “Nshami mmutwadil’eumbo malwa. Tala bitadi meeso alulukye bwa pandji mutompe kudya ndambo aa buno buuki bikishekishe su leelo bantu babaadya kudya bintu byabadi bapaulwe mu lupata lwa balwishi beetu, kutshyokola kwabadi batshyokole beena-Filistina kubaadya kwikala kuka kuunnabeene.” (1 Samwele 14:25-30) Baadi na kabingilo. Yoonatane baadi mwana sha lulamato, anka lulamato lwaye talubaadi lwa bu mpufu nya. Tabaadi akumiina nka myanda yooso yabakitshi sunga yabakula kwi nshaye nya, na baadi na mweneno e na nkatshinkatshi pabitale kunemeka bangi.

Pabaukile Saule’shi Yoonatane bakutwa kunemeka mwiya waye, babangi kupela kukumiina kumona bwabwa bwaye bu mukata a basalayi. Kadi, baadi mukumiine’shi mwana aye nabene afwe! Yoonatane namu tamwende mu nkamuteka lusa sunga mukwibingisha kwadi nya. Pusha lwalulo lubaadi mutuushe. Bakwile aye nabene’shi: “Nnami uno! Taadi peepi na kufwa!” Mwilo ubaalulwile’shi: “Yoonatane afu biikunyi, aye baatshyokola kuno kutshyokola kukata mu Isaleele? Mbilombene kwikala bibi ku meeso kwa Yehowa, lunyene su ndumune lwa ku mutwe waye taalupono paashi, mwanda mufube leelo uno na bukwashi bw’Efile Mukulu.” Bu kipeta? Saule batushishe kabingilo. Mwisambo aulesha’shi: “Byabya mwilo ubaapoosweshe Yoonatane, na tabaafwile nya.”​—1 Samwele 14:43-45.

Ngi bwakinyi mwanda wa eshimba dinyingye, mudimo wibukopo, na kikudi kya kulambula, Yoonatane baadi na nkumo ibuwa. Pabaadi mu masaku, nkumo yaye ibuwa ibafikile bu bukwashi bwaye. Atukitshi bibuwa nsaa yatumono eshina dyaye, sunga nkumo yaye, myanda yatukitshi atwe banabene kwifuku n’efuku. Bible etulungula’shi eshina dibuwa di na muulo ukata. (Mulungudi 7:1) Nka bu Yoonatane, abitungu twikitshishe bwatudya kwikala n’eshina dibuwa kumeeso kwa Yehowa, nkumo yetu aikekala na kineemo kikata.

Sunga bibaadi Saule bilubilo, Yoonatane baadi mwikitshi ngofu bwadya kwikala na lulamato ku lupese lwa nshaye munda mwa bipwa bibungi. Twibalombene kunangusheena bibaadi apele pabaadi amono nshaye anyisha kukutwa kukookyela na kikudi kya kwitatula. Mufito ubaadi unyishe kutama mwi nshaye, na Yoonatane tabaadi na ngobeesha ya kupelesha kukita byabya nya.

Kubatukile mwanda nsaa ibabalungwile Saule kwi Yehowa bwadya kulwa ngoshi na bena Amaleke, na bantu namu babatwelakene mu bwabwa bubi nka bu mu mafuku a Moiise, Yehowa baadi mupwe kwakula pabitale kulwishibwa kwa mwilo ooso ushima. (Efilu 17:14) Babalungwile Saule bwadya kwipaa nyema yooso na kulombasha abikyebe nfumu, Agage. Saule baadi mutshokole ngoshi, kushi mpaka na Yoonatane baadi alu ngofu muushi a miiya ya nshaye nkabu pa kyubishi. Kadi Saule baadi mupeleleele kukyookyela Yehowa, mu kukumba Agage na mukulama kwa bupeta, nyema, na byooso bibuwa. Mutemuki Samwele balungwile Saule kiimu kya Yehowa kya nfudiilo: “Pa mwanda we mupele eyi dya Yehowa, ê namu bakupele bu nfumu.”​—1 Samwele 15:2, 3, 9, 10, 23, EEM.

Ta kubakitshiine mafuku ebungi na Yehowa kukaasha kikudi kyaye kwi Saule nya. Kushii bukitshishi bwa kifulo kya Yehowa, Saule bayikeele nka mulamate ku myanda ya butesha, nsungu ishii na kabingilo, na moo ukata. Bibaadi nka bu’shi kikudi kibi akifiki kwi Efile Mukulu kibaadi kipyane myanda ibuwa. (1 Samwele 16:14; 18:10-12) Yoonatane baadi mwinyongole pa kumona nshaye baadi muntu a kineemo baluluka naminyi! Kadi, Yoonatane ta mulekye mudimo waye wa kululama kwi Yehowa nya. Baadi akwatshisheena nshaye muyiile ngobesha yaaye, sunga ingi misuusa baadi amutubwila myanda patooka, anka baadi mulame nka lulamato lwaye kwi Efile Mukulu na nshaye sha shintulukaa Yehowa.​—1 Samwele 19:4, 5.

Tobomwene muntu oodi mufule, pangi mukwenu a mu kifuko, kwa shintuluka musango imune na kufika muntu mubi su? Bi kwikala’shi myanda ayimukalakasha mwishimba. Kileshesho kya Yoonatane akitutentekyesha bibafundjile kayimba ka misambo’shi: “Nshaami na nyinaami bee kunsumbusheena, anka Yehowa ankukiila.” (Mis 27:10) Yehowa e na lulamato. Akakutambula namu noobe na akekala nshobe ebuwa shi akupwandikisha, ta kwi mwanda ulombeene kukutwa kupwidika kwa bantu nkukita wi nkwinyosha sunga nkuponesha nya.

Yoonatane baadi muukye’shi Yehowa atuulu mungi Nfumu pa mbalo ya Saule. Yoonatane bakitshine naminyi? Baadi mwiyipushe namu’shi mwiya kinyi ulombnene kwedibwa su? Aye namu baadi mukulupile’shi e kutopeka nshaye ku bilubilo bibaadi akitshi na kukimba bya kumulekyela kileshesho kya lulamato na bu nfumu sha kukookyela su? Tatuuku bibaadi binangu byaye nya; atuuku nka penda’shi baadi mulombashe myanda yaye yooso. Bino abushisha’shi Yehowa baadi musumbusheene muntu aye sha lulamato su? Ta mbyabya nya, baadi mufundjishe kileshesho kya bukuuku bwa Yoonatane sha lulamato mu Bible! Buno bukuuku atukebumono mu uni mwisambo awakwila Yoonatane.