“Nemeka nshobe na nyinobe, bwa’shi olale mafuku e bungi mu nsenga ayikupa Yehowa Efile Mukulu obe.”​—Efilu 20:12, Traduction du monde nouveau.

 “Dinga nshoobe naa nyinoobe, bwa’shi olaale mafuku pa nsenga pakutuule MFUMU, Efile oobe.”​—Efilu 20:12, Biible Bifundwe Biiselele.

 Efile Mukulu badi mwelele bena Isalele kala mwiya wa kunemeka baledi babao. Bakumbeeshe kangi kabingilo ka kukookyela uno mwiya. Sunga byekala’si Mwiya ubadi Efile Mukulu mwelele bena Isalele abewitamina bu Mwiya wa Moyiise, tangupwe kinemo kyao nya mayi ao a kulonda tangashintulukye. Mayi a kulonda e mu Mwiya w’Efile Mukulu ngatale mpa na bena Kidishitu na ena muulo kwabadi.​—Bena-Kolose 3:20.

 Bana​—bakulu sunga bakinga—​abanemekaa baledi babo na kwibakookyela. (Bena-Levi 19:3; Nkindji 1:8) Sunga bana bakula na batanda babo bana, abatungunkaa nka na kupasukila baledi babo. Kileshesho, abakitshi mwabo moso bwa’shi baledi babao bekale biya abebapasukila ku bununu bwabo na kwibapa bukwashi bwa bintu bya ku mbidi bwabadi nabo lukalo.​—Mateo 15:4-6; 1 Timote 5:4, 8.

 Lamina’shi bana ba bena Isalele babadi na kya kunemeka ba nshabo na ba nyinabo, na kushinguula muulo wi nao nyina bana mu kifuko. (Nkindji 6:20; 19:26) Lelo uno abitungu bana bakite namu nka byabya.

 Mwiya wa kunemeka baledi ubadi yao mikalo. Bana ba bena Isalele tababadi bakumbene kukookyela baledi babo, sunga mungi muntu, su kukita byabya kwekala bu kukutwa kukookyela Efile Mukulu. (Miiya Ikituulwe 13:6-8) Mu mushindo umune lelo uno, bena Kidishitu “abakokyelaa Efile Mukulu pamutwe pa kukookyela bantu.”​—Bikitshino 5:29.

 Mu uno Mwiya ubadi Efile Mukulu mupe Isalele, badi mulee’shi bana abanemeka baledi babo “alala mafuku ebungi pa nsenga” mu nsenga y’abebaa kwi Efile Mukulu. (Miiya Ikituulwe 5:16) Ta mbalombene kupeta kibawe kibadi kikumbene kupeta bana abalengula mwiya w’Efile Mukulu na kutombokyela baledi babo. (Miiya Ikituulwe 21:18-21) Sunga kwakila mafuku bungi kinyi mayi a kulonda e mu uno mwiya ta ngashintulukye. (Bena-Efeso 6:1-3) Byatwikala bakulu sunga bakinga, twi na kitungo ku meso kwa Mupangi etu. Eyendo’shi mulayilo waye kwi bana abakookyela baledi babo abekala na muwa mafuku ebungi. Byabya, bena lukulupilo lwa kwikala na muwa wa looso.​—1 Timote 4:8; 6:18, 19.

 Mwiya wi mu Efilu 20:12 wi pa mbalo ya kinemo mu Miiya ekumi sunga Mayi ekumi. (Efilu 20:1-17) Miiya i kumpala kwa uno mwiya ubadi aulesha kitungo kibaadi nakyo bena Isalele kwi Efile Mukulu, bu lukalo lwabo lwa kumulangwilo. Wawa mwiya ubadi aulesha kitungo kyabadi nakyo kwi benabo, mpana mwiya wa kulamata mwina dibaka naye na wa kupela kwiba. Byabya, mwiya wa’shi “nemeka nshobe na nyinobe” ubadi aukwasha bu kitala, mwanda kukookyela akutekye kulombasha kitungo kyetu kwi Efile Mukulu na kwi bantu netu.