“Nulekie na nuukie’shi ami ne Efile Mukulu. Nakatumbishimbua munkatshi mua miilo; nakatumbishibua pa nsenga.”​—Misambo 46:10, Ngaluluilo a nsenga ishima.

 “Lekayi . . .  nwiukye’shi, ami nyi Efile Mukulu. Nyi nfumu a miilo yoso na nsenga yoso.”​—Misambo 46:10, Ebuku dy’Efile Mukulu.

 Efile Mukulu anyingisha bantu boso buabadia kumulanguila na kushinguula’shi aye nyi e na matalua a kukunkusha nsenga. Bukome na matalua aaye ta mbia kuelesha mpaka nya, na boso abakumiina kuikala na muwa wa loso abitungu bebikumiine.​—Kibafumbuilue 4:11.

 “Nulekie na nuukie’shi ami ne Efile Mukulu.” Angi ma Bible ngaluule kino kipindi kia kumpala kia uno verse’shi “shalayi baumiine.” Pa muanda wa biabia, bantu bebungi abapuandikisha’shi uno verse esambila kanemo sunga kumiina kuabadi beele muiya mu kipuilo. Anka muaku wa mu kina Ebelu wabadi baluule’shi “nulekie na nuukie’shi ami ne Efile Mukulu” nyi mayi a kunyingisha aafiki kui Yehowa a Efile Mukulu aye nabene kui miilo, na eyitekie bua’shi tayimubinduilanga, imukumiine’shi mpenda aye atungu kulanguila.

 Atusangana mayi a kunyingisha nao e mumune mu Misambo 2. Muanka, Efile Mukulu mmulee bua kukita kintu kampanda kui beshikuanyi baaye. Ku lungi lupese, bua bano abakumiina matalua a Efile Mukulu, abakimbi bukunkushi, bukome, na binangu biaye. “Abasuukila kuadi,” abapusha muloo na kukaluilua, bikishekishe mu kipungo kia nkalakashi.​—Misambo 2:9-12.

 “Nakatumbishimbua munkatshi mua miilo; nakatumbishibua pa nsenga.” Kala, Yehowa Efile Mukulu baadi mutumbishibue nsaa ibaadi mufube na bukome buaye bua kukaluila muilo waaye. (Efilu 15:1-3) Mu mafuku aafiki, akatumbishibua mu kipaso kikile bukata nsaa ayikekala boso be pa nsenga abakakookiela matalua aaye na kumulanguila.​—Misambo 86:9, 10; Yeshaya 2:11.

 Ungi mukanda aupatuulaa mianda ya mu Bible awitamina Misambo 46 bu “loono alutumbisha bukome bu’Efile Mukulu, sha bukome boso akaluilaa bafubi baaye.” Pabaabadi abayimbi Misambo 46, Muilo w’Efile Mukulu ubaadi aulesha lukulupilo luao mui ngobesha ya Yehowa ya kuibakaluila na kuibakuasha. (Misambo 46:1, 2) Mayi a luno lono abaadi aebatentekiesha’shi Yehowa baadi nabo nsaa yoso.​—Misambo 46:7, 11.

 Bua kunyingisha lukulupilo luabo mui Yehowa Efile Mukulu, musambo ubaadi awibatakula mu kunangushena ku mianda ya kukaanya ibaadi mukite. (Misambo 46:8) Bu kileshesho, mayi a luno lono aakaka binangu ku ngobesha yaaye ya kuimika ngoshi. (Misambo 46:9) Mu mushindo kampanda, baadi muimikie ngoshi mu mafuku a kala pa kukaluila muilo waaye kui beshikuanyi bao. Anka, Bible mmulee’shi Efile Mukulu akebikitshi mu mushindo ukile bukata pa kuimika ngoshi pa nsenga yoso ishima.​—Yeshaya 2:4.

 Yehowa kiakuashaa balanguidi baaye lelo uno su? Oolo. Mpoolo mutumibua, baadi munyingishe ngofu bena Nkidishitu buabadia kutuula lukulupilo luabo mu bukuashi bua Yehowa. (Bena Ebelu 13:6) Binangu bi mu Misambo 46 abinyingisha lukulupilo luetu mu bukome bu’Efile Mukulu bua kukaluila. Aetukuasha buatudia kumona Efile Mukulu bu “kifuamino kietu na bukome buetu.”​—Misambo 46:1, NWT.

 Tala uno video muipi bua kumona mu kikoso mianda i mu mukanda wa Misambo.