“Alefa na Omega” aleesha Yehowa Efile Mukulu, Sha-bukome booso. Kino kishima atwikisangana mu Bible misango isatu.​—Kibafumbwilwe 1:8; 21:6; 22:13. a

 Alefa nyi dileeta dya kumpala na omega ndya nfudiilo mu alfabee a beena Greke, edimi dibabadi bafube nadyo bwa kufunda kipindji kya Bible ky’abetaminaa kwi bantu bu Kilombeeno Kipya, mwi na mukanda wa Kibafumbwilwe. Muyiile kwilondeena kwa ano maleeta mu alafabee a mu kiina Greke mbeafubishe bwa kuleesha shi Yehowa bupenka bwaye mmwikale mbangilo na nfudiilo. (Kibafumbwilwe 21:6) Kubanga kala mmwikale Efile Mukulu Sha-bukome booso, na atungunuka na kwikala bwa ikalayika Efile Mukulu Sha-bukome booso. Mmwikale pend’aye nabeene “a-looso na bwa-looso.”​—Misambo 90:2.

 Bible atumikisha kino kishima bwa booso babidi bwa Yehowa Efile Mukulu na bwa Mwan’aaye, Yesu, kadi mu mpatulwilo ilekeene. Tubande kutaluula bileshesho bibidi.

•   Mu Yeeshaya 44:6, Yehowa amba bino: “Nnaami a-kwibedi, nnaami a-nfudiilo; kukaasha’ami, takwi ungi efile.” Pano Yehowa ashimika kasele shi aye nyi Efile Mukulu a binyibinyi bwa losoo; kukaash’aye, takwi ungi. (Miiya Ikituulwe 4:35, 39) Byabya, kishima “a-kwibedi na a-nfudiilo” kiina mpatulwilo umune nka bu “Alefa na Omega.”

•   Dingi, kishima “A-kwibedi [pro’tos, kushii alefa] na a-nfudiilo [e’skha·tos, kushii omega]” abisanganyibwa mu Kibafumbwilwe 1:17, 18 na 2:8. Mu ino verse, nfundjilo aleesha shi abaleesha uno bafwile akupu asaannguka. Nyi bwakinyi, yaaya verse t’ayileesha Efile Mukulu nya mwanda t’afwile kasha. (Abakuke 1:12) Byabya, Yesu bafwile n’aye nkusaanguka. (Bikitshino 3:13-15) Baadi muntu a kumpala basangukile na nshalelo a mu kikudi mwiyilu ta mulombeene kufwa dingi, mwadi binobino bwa “iikalaika.” (Kibafumbwilwe 1:18; Beena-Kolose 1:18) Yesu ndjo musangushe bantu booso kunyima kwaye. (Yowano 6:40, 44) Byabya, baadi muntu a nfudiilo ababadi basaangushe kwi Yehowa aye nabeene. (Bikitshino 10:40) Mu uno mpushisho, twi balombeene kwitamina Yesu bu “A-kwibedi na A-nfudiilo.”

 Nya. Uno akula mu Kibafumbwilwe 22:13 t’aukikwa kalolo nya, na kwi bantu be bungi bakule mu uno shapitre. Pabaadi akwila pa kino kipindji kya Kibafumbwilwe, Mulongyeshi William Barclay mmufunde bino: “Bintu ta mbifundjibwe kalolo mmulongo nya; . . . na bi bukopo bwa kushinkamisha shi nanyi esamba pano.” (The Revelation of John, Volume 2, Revised Edition, page 223) Byabya, “Alefa Omega” e mu Kibafumbwilwe 22:13 twi kwamba shi nka yawa Muntu umune abadi bape wawa mwasu mu angi ma mbalo e mu Kibafumbwilwe​—Yehowa Efile Mukulu.