Bible amba kinyi pabitale kwishidika?
Lwaluulo lwa Bible
Mu mafuku a kala, Efile Mukulu baadi akumiina kwishidika nsaa ibaadi muntu ebikitshi na binangu bibuwa. Kadi nsaa ibaadi muntu eshidika bwa tubingilo twi bubi, Efile tabaadi ebisangeela nya. Byabya, lelo uno Bible t’atakula sunga kutosha muntu bwa kwishidika nya.
Mu ingi nshalelo kinyi mubaadi bangi bantu mu Bible abeshidika?
Nsaa ibabadi abakimbi bukwashi na bukunkushi bw’Efile Mukulu. Bantu abaadi abende ku Yelusaleeme bakeshidikanga bwa kuleesha by’abakimbi bukwashi bw’Efile binyibinyi. (Esela 8:21-23) Ingi misusa, Mpoolo na Barnabee abaadi abeshidika nsaa ibabadi abasangula bakulu mu tukongye.—Bikitshino 14:23.
Nsaa ibabadi abepaana mu mpàngo y’Efile Mukulu. Kunyima kwa lubatshisho lwaye, Yesu baadi mwishidikye munda a mafuku 40 bwashi elumbuulwa bwa kukita kikyebe ky’eshimba dy’Efile Mukulu mu mudimo waye wi kumpala.—Luuka 4:1, 2.
Nsaa ibabadi abelanga ku milwisho yabo ya kala. Ku bukwashi bwa mutemuki Yowele, Efile balungwile beena Isaleele batombokye shi: “Alukai kwandji na mashimba enu oso! Nushile bya kudya na kudila mpolo, mpâ na kutompola.”—Yowele 2:12-15, EEM.
Nsaa ibabadi mwifuku dikata dya kulekyêlwa kwa milwisho. Mu miiya ibaadi Efile Mukulu mupe mwilo wa Isaleele mubaadi mwiya wa kwishidika kwa kipwa kwa Mwifuku dya Kulekyêlwa kwa milwisho. a (Beena-Levi 16:29-31) Kwishidika kubaadi na muulo dino efuku mwanda kubaadi akutentekyesha beena Isaleele shi abaadi bakutwe kupwidika n’abaadi na lukalo lwashi Efile Mukulu ebafwile lusa.
Mushindo kinyi wa kwishidika wi bubi?
Bwashi bakumone kwi bantu. Yesu bakwile shi abitungu kwishidika kwa bwin’Efile kwikale kwa mwishimba na mwanda wi pankatshi pa muntu eshidika n’Efile Mukulu.—Mateo 6:16-18.
Bwa kwileesha bu mululame. Kwishidika t’akwikashaa muntu bu mukile bangi mu binangu sunga mu kikudi nya.—Luka 18:9-14.
Bwa kutompa kufuta pa mulwisho wadi mukite mu kukumiina kwaye. (Yeeshaya 58:3, 4) Efile Mukulu akuminaa penda kwishidika kwi na kwiyisha na kwilanga kwa kwishimba bwa mpekato yooso ikite muntu.
Bwa kupeta mashito kampanda mu kipwilo. (Yeeshaya 58:5-7) Pa bitale uno mwanda, Efile Mukulu e nka bu muledi enyongolaa ngofu nsaa i bana baye abamuleesha kifulo nka pa bukopo kushii kifulo akituukila mwishimba.
Biina muulo bwashi beena Kidishitu beshidikye?
Nyaa. Efile Mukulu baadi atekye beena Isaleele bwa kwishidika Mwifuku dya Kulekyêlwa kwa milwisho yabo, kadi baadi mwipee kyakya kitentekyesho kunyima kwa Yesu kupwa kusuula bantu basha kwiyisha ku milwisho bwa looso. (Beena-Ebelu 9:24-26; 1 Mpyeele 3:18) Beena Kidishitu tabakii ku Mwiya wa Moyise dingi nya, uno ubaadi n’Efuku dya Kulekyêlwa kwa milwisho. (Beena-Looma 10:4; Beena-Kolose 2:13, 14) Byabya, mwina Kidishitu ooso mmulombeene kwata kitshibilo aye nabeene su akumiina kwishidika.—Beena-Looma 14:1-4.
Beena Kidishitu abashinguula shi lulangwilo lwabo ta ndwimeena pa kwishidika nya. Kasha mu Bible kwishidika na kusangala t’abitambukaa pamune. Mu kwilekeena na byabya, lulangwilo lwa binyibinyi lwa beena Kidishitu ngwimeene pa muloo, aluleesha bwikashi bwa Yehowa, “Efile Mukulu a muloo.”—1 Timote 1:11; Mulungudi 3:12, 13; Beena-Ngalatea 5:22.
Mweneno e bubi pa bitale abyamba Bible bwa kwishidika
Mweneno e bubi: Mpoolo mutumibwa baadi muleeshe shi abitungu ba mulume na mukashi beyibakisheene beshikikye.—1 Beena-Kodinda 7:5, La Bible du roi Jacques.
Kishinkamisho: Manikri a kala a mu Bible ta ngaleeshe kwishidika mu 1 Beena-Kodinda 7:5 nya. b Byabya, baaba abaadi abafunduula Bible abaadi bakumbashe kwishidika, ta nka penda mu uno verse nya, mpa na mu Mateo 17:21; Maako 9:29; na Bikitshino 10:30. Ma Bible e bungi e kwanka lelo uno mbakaashe yaaya mwaku ya madimi ya kwishidika.
Mweneno e bubi: Abitungu beena Kidishitu beshidikye bwa kutentekyesha mufuku 40 abaadi Yesu mwishidikye mu kabaaka kumyima kwa lubatshisho lwaye.
Kishinkamisho: Yesu tabaadi mutekye bantu batu bwashi beshidikye byabya, na takwi mbalo sunga ngimune mu Bifundwe ayileesha shi beena Kidishitu abaadi abeshidika bino kala. c
Mweneno e bubi: Abitungu beena Kidishitu beshidikye nsaa y’abatentekyesha lufu lwa Yesu.
Kishinkamisho: Yesu tabaadi mutekye balongi baye bwa kwishidika nsaa y’abatentekyesha lufu lwaye. (Luka 22:14-18) Sunga mbibaadi Yesu mwakule shi balongi baye abakeshidika nsaa ibafwile, tabaadi mwele mwiya nya kadi baadi penda aleesha akikyebe nkakitshika. (Mateo 9:15) Bible baadi atekye beena Kidishitu abaadi na nsala bwa kudya ku mashibo aabo kumpala kwa kukita Kitentekyesho kya lufu lwa Yesu.—1 Beena-Kodinda 11:33, 34.
a Efile Mukulu balungwile beena Isaleele shi: “Abitungu nwikyengyeshe,” sunga “kukyengyesha miuwa,” Mwifuku dikata dya Kulekyêlwa kwa milwisho. (Beena-Levi 16:29, 31; NWT, King James Version (Bible du roi Jacques) Kino kishima akileesha kwishidika. (Yeeshaya 58:3) Dingi, ungi Bible a Contemporary English Version mmwaluule bino: “Abitungu nwende kushii kudya bwa kuleesha kenyongoshi bwa mpekaato yeenu.”
b Tala A Textual Commentary on the Greek New Testament, kwi Bruce M. Metzger, Edition a Kasatu, esaki 554.
c Pabitale myanda ya kala itale mafuku 40 a kwishidika, New Catholic Encyclopedia aleesha bino: “Munda mwa siyekele isatu ya kumpala, kipungo kya kwishidika bwa kwilumbuula ku musangeelo wa Pasaka takibaadi akikidi lubingo lumune nya; bantu abaadi abakamba kufudiila mwifuku dimune sunga abidi. . . . Musango wa kumpala wabadi baleeshe kipungo kya mafuku 40 ausanganyibwa mu canon a katano a Concile de Nicée (325), sunga byekala shi bangi bantu balongye ngofu abalwila bwa kuuka pabitale Pasaka ky’apatuula.”—Edition a kabidi, Volume 8, esaki 468.
Tala dingi
YESU—NYI ESHINDA, BINYIBINYI NA MUWA
Bwakinyi balongi ba Yesu t’abeshidika?
Yesu bafubiishe kileshesho pabitale mulangi wa musokya wa nfinyo bwa kutuusha lwalulo.
TWI BANTU KINYI?
Teka bua’shi bafikie mu kukutala
Esambe mianda ya mu Bible sunga kulonga bibungi pabitale ba Temue ba Yehowa.