Bible akula kinyi pabitale kutshiba kwa muwa pa bukopo?

TEEMESHA MU

Lwaluulo lwa Bible

Bible ta mwakule patooka pabitale kutshiba kwa muwa pa bukopo nya. a Anka, kyadi mwakule pabitale muwa na lufu, akitukwasha bwa kwikala na nkatshinkatshi pabitale uno mwanda. Kufwisha lufu ta mbekukumine nya, anka ta mbitekibwe kukita kintu kampanda bwa kukimba penda kutungunusha muwa nsaa ya lufu nya.

Bible ayitamina Efile Mukulu bu Mupangi etu, “nsulo ya muwa.” (Misambo 36:9; Bikitshino 17:28) Muwa wi na muulo ku meso a Efile Mukulu. Bwa kano kabingilo, Efile Mukulu mmukandjikye kwipaa muntu sung akwiyipaa. (Efilu 20:13; 1 Yowano 3:15) Dingi, Bible amba shi abitungu twikale badimukye bwa kukalwila muwa wetu mpa na wa bangi bantu. (Miiya Ikituulwe 22:8) Eyendo, Efile Mukulu akumina shi twate kya buntu kya muwa na muulo.

Kadi su muntu e na mukumbo ushaupu?

Bible tamukumine kutshiba muwa wa muntu sunga nsaa itaadi pepi na kufwa Bible. Bino mbebishinkamishe mu kileshesho kya Nfumu Saule a mu Isalele. Pabaadi mutapikye bya lufu, batekyele mulami aye bwashi amwipee. (1 Samwele 31:3, 4) Mulami a Saule bapelele. Paapa, ungi mwana mulume, badi mudimbe shi bayipayile Saule. Yawa mwana mulume babadi bamutshibile kibawe kya lufu kwi Daavide—muntu badi muleshe bi mweneno a Efile Mukulu pabitale uno mwanda.—2 Samwele 1:6-16.

Abitungu nka kukita kyoso akitungu bwa kutungunusha muwa su?

Nsaa i lufu lwi pepi, Bible ta mwambe shi abitungu kwipaa muntu bukidibukidi nya. Anka, Bible etulesha bya kwikala na nkatshinkatshi. Lufu nyi mwishikwanyi etu mukata, atufu mwanda twi beena milwisho. (Beena-Looma 5:12; 1 Beena-Kodinda 15:26) Sunga shi tatutungunusha muwa, tabitungu shi tutshine lufu nya, mwanda Efile Mukulu mwitulee lusangukilo lwa bafwe. (Yowano 6:39, 40) Muntu anemekaa muwa akimbaa mushindo wibuwa wa kwibukisha. Sunga mbyabya, tabitumbu kukimba Bwanga bulombeene kuyisha muntu kapelakapela ku lufu nya.

Kwiyipa, nyi mulwisho wabasha kulekyela muntu su?

Nya, Bible ta mutemune kwiyipaa mu mulongo wa milwisho yabasha kufwila lusa nya. Sunga byekala shi kwipaa muntu nyi mulwisho ukile bukata, b Efile Mukulu amonaa akifwisha lwanka bu, mukumbo wa mu binangu, twinyongoshi tukile, sunga mikumbo ya butandwa ilombene kufwisha muntu mu kwiyipaa. (Misambo 103:13, 14) Kwete kutusha busambi kwi baba be mu nkalakashi ku bukwashi bwa Bible. Dingi, Bible amba shi akwikala “lusangukilo lwa bafwe, lwa balulame na lwa bashii balulame.” (Bikitshino 24:15) Bino abilesha shi kwi lukulupilo lwa lusangukilo lwa bantu babakitshine milwisho ikata bu, kwiyipaa.

a Kutshiba kwa muwa, sunga shi kwipaa muntu bwa lusa, mbekupatuule bu “kwipaa muntu e na mukumbo wibukopo sunga mutapikye ngofu bwa kupela kumukyengyesha bikile.” (Merriam-Webster Learner’s Dictionary) Nsaa i doktere apa muntu bwanga bwa kwiyipaa, bino abebitamina bu munganga akwatshishena muntu etundjika.

b Ndambo ya bileshesho bya kwiyipaa byabadi batushe mu Bible ayilesha bantu abebikitshine mu kwikutwena na akikye Efile Mukulu.—2 Samwele 17:23; 1 Banfumu 16:18; Mateo 27:3-5.