Bible alesha shi bibuwa, bi mpa na na muulo, kwifula obe nabeene mu mushindo ulombane. Kifulo ki byabya nkitale dingi kwikitshina myanda, na kwikala na binangu bya kwikwasha. (Mateo 10:31) Kushi kutakula bantu mu kwitatula, Bible mutule kwifula obe nabene pa mbalo yako.

Nnayi atungu shi tufule kumpala?

1.   Kifulo bw’Efile Mukulu abitungu kikale pa mbalo ya kumpala kitukile mu mashimba etu. Bible etulongyesha mu mwiya ukata shi: “Abitungu ofule Yehowa Efile Mukulu obe n’eshimba dyobe dyooso.”​—Maako 12:28-30; Miiya Ikituulwe 6:5.

2.   Mwiya wa kabidi ukata awamba shi: “Ofule muntu nobe bu byodi mwifule.”​—Maako 12:31; Beena-Levi 19:18.

3.   Sunga Bible ta mutemune mwiya kampanda pabitale kwifula obe nabene, mwiya wa “kufula muntu nobe bu byodi mwifule” aulesha shi kwifula mu mushindo ulombane kwi na muulo.

Nnanyi ababadi bafule kumpala kwi Yesu?

 Yesu badi muleshe bya kwikala na nkatshinkatshi pabitale kwikala na kifulo bw’Efile Mukulu, kufula muntu netu, na kwifula obe nabene, aye nkulongyesha balondji baye bwabadya kulonda kileshesho kyaye.​—Yowano 13:34, 35.

1.   Yehowa Efile Mukulu nyi abadi mufule kumpala aye nkwipaana bwa kulombasha mudimo Waye. Bambile shi, “bwa’shi ba pa Nsenga bawukye’shi nemufule Yaya kifulo; na muyiile mwiya wabadi banyelele kwi Yaya, biabia ngi biankitshi.”​—Yowano 14:31.

2.   Yesu badi mufule bantu naye, badi muleshe byanka pa kwitatshisha bwa kulombasha nkalo yabo aye nkufika na mu kupana muwa waye bwabo.​—Mateo 20:28.

3.   Badi muleshe kifulo mu mushindo ulombane bwaye’ye nabene ata nsaa ya kwikisha, ya kudya na kusangala pamune na balondji baaye na baba abadi na bya kwikala balondji baye mu mafuku e kumpala.​—Maako 6:31, 32; Luka 5:29; Yowano 2:1, 2; 12:2.

Kwifula nkulombene kupeelesha muloo obe sunga kwiata na kanemo su?

 Nya, mwanda twi bapangibwe kwifwanyika dy’Efile Mukulu, e na kifulo bu eyikashi dyaye dikata. (Kibangilo 1:27; 1 Yowano 4:8) Bino abilesha shi twi kwanka bwa kufula bangi. Kwifula kwi na yako mbalo, anka twi na muloo ukata nsaa yatufulu Efile Mukulu na kutula binangu byetu mu kukitshina bangi bibuwa. Anka abyakula Bible shi, “muloo wa kupaana ngukile wa kupebwa.”​—Bikitshino 20:35.

 Lelo uno kwi bantu bebungi abapwandikisha shi muloo aufikaa mu kwifula penda obe nabene. Kwabadi, “kwifula” nkupyane “kufula muntu noobe.” Kadi, myanda ayikitshika ano mafuku ayilesha shi bwa kwikala biya na muloo bibuwa kulonda elango dya mu Bible adyamba shi: “Muntu takimbanga buwa bwaye’ye nabene, anka akimbe bwa mungi.”​—1 Beena-Kodinda 10:24.