Mpombo ikata ayikafuisha kipungo kikata ki na nkalakashi i bukopo yabasha muene kui bantu. Muyile matemuki a mu Bible, mpombo ikaata ayikakitshika mu kipungo kia “mafuku a ku nfudiilo,” sunga mu “kipungo kia ku nfudiilo.” (2 Timote 3:1; Ndaniele 12:4, Bible de Jérusalem) Aa mafuku aakekala mafuku a “mpombo ishakitshikile kasha, kubanga ku kibangilo kia nsenga ibaadi Efile Mukulu mupangie mpaa na ku aa mafuku, na ta yana’kitshikie dimo.”​—Maako 13:19; Ndaniele 12:1; Mateo 24:21, 22.

Mianda ikata ayikakitshika mu kipungo kia mpombo ikata

•   Kubutula kua lulanguilo lua madimi. Lulanguilo lua madimi, alukabutudibua mu kipaso kia kukaanya. (Kibafumbuilue 17:1, 5; 18:9, 10, 21) Makome a mianda ya politike aaleesha Organisation de Nations unies (ONU) ngi akabutula lulanguilo lua madimi, akite kikiebe ki’eshimba di’Efile Mukulu.​—Kibafumbuilue 17:3, 15-18. a

•   Kutuuka kua lulanguilo lua biinyibiinyi ngoshi. Miilo isangie yabadi baleeshe mu kimonua kia Ezekiele bu “Goge a kuiwumbo dia Magoge,” akatompo su apudisha baaba booso bakuete kukita lulanguilo lua biinyibiinyi. Anka Efile Mukulu akakaluila balanguidi baye ku kano kabutu.​—Ezekyele 38:1, 2, 9-12, 18-23.

•   Kiimu kia bantu be pa nsenga. Yesu akatshibila bantu booso kiimu na “akabuula bantu mu bisaka bibidi, nka bu abiabuulaa mulami mikooko na mbushi.” (Mateo 25:31-33) Yesu akatshibila muntu ooso kiimu muyile bia kuete kukuatshishena “bakuabo” na Yesu, sunga kupela kuibakuatshishena. Bakuabo na Yesu, mbaaba booso abakamunana naye muiyilu.​—Mateo 25:34-46.

•   Kubunga kua bantu abakamunana mu Bufumu. Bantu baasha lulamato babadi basangule bua nkamunana na Nkidishitu muiyilu, abakapudisha luendo luabo lua pano pa nsenga na abakabushibua buabadia nkekala dingi na muwa muiyilu.​—Mateo 24:31; 1 Bena Kodinda 15:50-53; 1 Bena Tesalonika 4:15-17.

•   Armagedone. Ino “ngoshi y’efuku dikata di’Efile Mukulu Sha bukome booso.” Abeyitanyinaa dingi bu “efuku dia Yehowa.” (Kibafumbuilue 16:14, 16; Yeeshaya 13:9; 2 Mpiele 3:12) Baaba booso b’abakatshibila kiimu kui Yesu’shi ta mmuibafule, abakabutudibua. (Sofoni 1:18; 2 Bena Tesalonike 1:6-10) Mu bano bantu abakabutudibua, mui mpaa na bamfumu booso ba mianda ya polotike ya mu nsenga ishima babadi baleeshe mu Bible mu ngakuilo a mu kimfuanyi bu nyema a mitue musambobidi.​—Kibafumbuilue 19:19-21.

Mianda ikata ayikakitshika kunyima kua mpombo ikata

•   Kuedibua kua Satana na bademo mu lukano. Muikeyilu e bukome akasumbula Satana na bademo mu “buina bula,” abuleesha kukutua kua kufuba nka bu mupue kufua. (Kibafumbuilue 20:1-3) Satana akekala mu buabua buina nka bu muina lukano; Satana t’akekala dingi na ngobesha yadia kuikala na bukitshishi ku mianda ayikakitshika pa nsenga nyaa.​—Kibafumbuilue 20:7.

•   Kubanga kua kumunana munda mua bipua kinunu. Bufumu bu’Efile Mukulu abukabanga kumunana munda mua bipua 1000, bino bipua bioso abikatuadila bantu miabi i bungi bukile. (Kibafumbuilue 5:9, 10; 20:4, 6) “kibumbu kikata” kia bantu babashibaadi balombene kubadika kui muntu su ngumune, abakatuuku “mu mpombo ikata,” kino kibumbu kikata akikapanda ku mpombo ikata, ngi akikamono kubanga kua bipua kinunu bia kumunana kua Bufumu bu’Efile Mukulu pa nsenga.​—Kibafumbuilue 7:9, 14; Misambo 37:9-11.