Muntu mpeta na Lazare nyi mbatu ba kala babaadi Yesu muteemune mu miisambo yaye. (Luka 16:19-31) Mu mianda ya kala, bano bantu babaadi abaleesha bisaka bibidi bia bantu: (1) bakata ba lulanguilo lua bena Yunda ba mu mafuku a Yesu, na (2) bantu baasha kuiyisha na balulame babaadi bakumiine mukandu wa Yesu.

Mu uno muisambo mui

•  Yesu bakuile kinyi pa bitale muntu mpeta na Lazare?

•  Uno muanda ubakitshikile biinyibiinyi?

•  Uno muanda aukuatshishena dilongiesha dia’shi eshiba dia kaalo, di kuanka biinyibiinyi su?

•  Muanda wa muntu mpeta na Lazare aupushisha kinyi?

 Mu mukanda wa luka shapitre 16, Yesu baadi muleeshe bantu babidi babaadi bapete kushintuuluka mu nshalelo aabo.

 Yesu bakuile pabitale uno muanda mu kikoso bino’shi: Muntu mpeta baadi na nshalelo e buwa mu nshalelo aaye. Anka Lazare baadi atekie ka pa lusa baadi mushale pa kibelo kia muntu mpeta. Baadi na lukalo lua kudia bintu bibaadi abipono ku mesa a muntu mpeta. Anka kunyima kua mafuku Lazare bafuile, mikeyilu nkumutuala ku lupese lua Abalahama. Muntu mpeta namu nkufua na abo nkumushiika. Pabitale bano bana balume babidi, mbebaleeshe bu babaadi na muwa kunyima kua kufua. Na pabaadi mu Mashamaa akienge, babushile meso na amona kula’bia Abalahama na Lazare ku lupese luaye. Biabia aye nkuitanyina na nkuamba’shi: ‘Yaya Abalahama, nfuile namu lusa na otume Lazare buadia kuela nsongo ya munue waye mu mema bua kuntaadisha edimi, muanda nkuete kukienga ngofu mu kano kaalo kebukopo. Abalahama, baadi mupele bino bibamutekiele muntu mpeta, na akula’shi booso babidi binobino babamono kushintuluka kukata mu nshalelo aabo. Na’shi pankatshi pabo pe lupongo lui bula ngofu mui kalo ke bukopo luabashi balombene kusabuka.

 Nyaa. Luno nyi ndukindi lubabatushishe kui Yesu bua kutusha dilongiesha. Bantu balongie mianda ya mu Bible mbaukie’shi uno muanda nguikadikie lukindi bu abileesha ka mutue ka muanda ka mu Bible Luther a mu 1912. Bu kileshesho, mu mayi e kushi ku’esaki mu La Bible de Jérusalem mbaleeshe uno muanda bu “lukindi kushii’bo kuiwela bu mianda i baadi ikitshikie.”

 Luno lukindi lua Yesu, lubaadi na kepatshila ka kuleesha’shi kunyima kua muntu kufua atungunukaa na kuikala na muwa su? Yesu baadi muleeshe’shi bangi bantu bakuete kukienga mu kaalo ke bukopo su? Na’shi bantu be buwa bu Abalahama na Lazare, be muiyilu su? Kui bishinkamisho bi bungi abileesha’shi bino ta mbikitshikie.

 Tuteemuneyi bisatu:

•   Su muntu mpeta baadi akiengie mu kaalo ka biinyibiinyi, ekopola dia meema dibaadi ku munue wa Lazare ta dibadia kuuma nka musuusa umune su?

•   Ekopola dimune dia meema dibadi’akupua nyota ya muntu akiengie mu kaalo ka biinyibiinyi?

•   Mushindo kinyi ubaadi ulombene kuikala Abalahama na muwa muiyilu, aku namu Yesu pa baadi pa nsenga bakuile’shi ta kubaadi muntu su ngumune baadi muende muiyilu?​—Yowano 3:13.

 Nyaa. Sunga bi’abauku’shi uno muanda ta ngua biinyibiinyi, anka bantu be bungi abakumiina kinangu ki’ashi bantu be buwa abende muiyilu, be bubi namu abende mu kukienga mu kaalo. a

 Kino kinangu ki buwa su? Nyaa.

 Dilongiesha dia eshiba dia kaalo ta di mu mianda y’abalongiesha kui Bible pabitale lufu nyaa. Bu kileshesho, Bible t’akula’shi bantu be buwa babaafuile mbende muiyilu muabadi na muloo sunga’shi bantu be bubi bakuete kukienga muishiba dia kaalo nyaa. Anka Bible apatuula kalolo’shi: “Mwanda abatala abawuku’shi abafu; anka bafwe taabawuku kintu su nkimune.”​—Mulungudi 9:5.

 Uno muanda auleesha’shi nshalelo a bisaka bibidi bia bantu baadi mulombene kupeta kushintuluka kukata.

 Muntu mpeta baadi aleesha bakata ba bipuilo bia bena Yunda “babaadi bafule makuta.” (Luka 16:14) Babapushishe pabaadi Yesu akula, anka babaadi bapele mukandu waye na babaadi babepuule bantu.​—Yowano 7:49.

 Lazare baadi aleesha bantu booso babaadi bakumiine mukandu wa Yesu na bababadi ababepuula kui bakata ba bipuilo bia bena Yunda.

 Bisaka bioso bibidi bibaadi bipete kushintuluka kukata.

•   Bakata ba bipuilo bia bena Yunda babaadi abanangushena’shi mbakuminyibue n’Efile Mukulu. Anka babaadi nka bu bafue kumpala ku’Efile Mukulu nsaa ibaadi Efile Mukulu muibasumbusheene na lulanguilo luabo, muanda babaadi bapele mukandu wa Yesu. Mukandu ubaabadi abalongiesha kui Yesu na balongi baye, ubaadi nka bu kaalo akakiengiesha bakata ba bipuilo bia bena Yunda.​—Mateo 23:29, 30; Bikitshino 5:29-33.

•   Bantu babaabadi ababepuula kui bakata ba bipuilo munda mua bipua bi bungi, binobino babaadi bapete mushindo wa kukuminyibua n’Efile Mukulu. Be bungi babaadi bakumine mukandu ubabadi abalongieshe kui Yesu, babaadi bakuashibue. Binobino mbapete mushindo wa kusangeela kifulo ki’Efule Mukulu bua losoo.​—Yowano 17:3.