Mulwisho ushii bya kulekyelwa ngutale bikitshino na binangu abilesha shi muntu bakitshi mulwisho te bya kufwilwa lusa kwi Efile Mukulu nya. Binangu bi byabya bilombeene kutwela mwi muntu naminyi?

 Efile Mukulu afwilaa baaba booso abelanga kwishimba lusa, abalondo mayi aaye mu muwa wabo na kulesha lukumiino mwi Yesu Kidishitu. (Bikitshino 3:19, 20) Byabya, muntu mmukumbeene kwipaana mu bubi mu mushindo wadi mulombeene kukutwa bya kushintuula binangu byaaye sunga mwikelo waaye. Bible ayitamina yawa muntu bu muntu e na “eshimba dibi” na ‘mupapishe eshimba, pa kudimbiibwa kwi milwisho.” (Beena-Ebelu 3:12, 13) Anka abikalaa ema dyabadi bashiikye dishi na mushindo wa kulongama dingi, eshimba dya yawa muntu ndipambukye ngofu kwi Efile Mukulu. (Yeeshaya 45:9) Te na kintu akilesha shi mbalombeene kumufwila lusa, paapa e na kibawe kya kukutwa kufwidibwa lusa bwa mulwisho waaye.​—Beena-Ebelu 10:26, 27.

 Bangi bakata ba bipwilo bya beena Yunda abaadi bakite milwisho ishi bya kufwilwa lusa. Abaadi abauku shi Yesu baadi akitshi bilengyeleshi ku bukwashi bwa kikudi ky’Efile Mukulu kiikale bukome bwaye, kadi abaadi abamba shi, Yesu baadi ebikitshi ku bukome bwa Satana Diabulu.​—Maako 3:22, 28-30.

Bileshesho bya milwisho yabadi balombeene kufwila luksa

•  Kwikala na kasaabu pa mwanda wa kukutwa kwa kuuka. Mpoolo mutumibwa baadi muntu sha kasaabu kumpala, kadi kunyima bambile shi: “Ami baadi asabuula [Efile Mukulu] kumpala, baadi na kubingabinga, na shakukayisheena; anka nafwidiilwe lusa, mwanda nankitanga kushii kuwuka, mu kukutwa kwa lukumiino.”​—1 Timotee 1:13.

•  Lusandji. Bible akula pabitale bangi abaadi batambukye lusandji kala kadi abaadi bashintuule mwikelo waabo abo nkufwidibwa lusa kwi Efile Mukulu.​—1 Beena-Kodinda 6:9-11.

“Ne mukite mulwisho ushii bya kufwilwa lusa su?”

 Su we mushikwe n’eshimba dyoobe dyooso mulwisho uboodi mukite kala na we mwate kitshibilo kya kushintuluka, paapa twe mukite mulwisho ushii bya kufwilwa lusa nya. Efile Mukulu mmulombeene kufwila muntu lusa sunga apona mu wawa mulwisho umune misusa ibungi anka su eshimba dyaaye ta ndipape.​—Nkindji 24:16.

 Bangi bantu abapwandikisha shi mbakite mulwisho ushii bya kufwilwa lusa mwanda nsaa yooso mashimba aabo akwete kwibatopekanga. Anka, Bible alongyesha shi tatwi balombeene kukulupila penda binangu byetu nya. (Yeelemiya 17:9) Efile Mukulu ta mwitupe matalwa akusambisha muntu kampanda​—sunga kwitshibila kiimu nya. (Beena-Looma 14:4, 12) Mmulombeene kwitufwila lusa sunga mashimba etu akwete kwitutopekanga.​—1 Yowano 3:19, 20.

Yundasa Iskariote bakitshine mulwisho ushii bya kufwilwa lusa su?

 Oolo. Lwabi lwaaye lubamutakwile mu kwiba makuta abaabadi batuushe bwa mudimo wi selele. Afika na mu kupwandikisha bu e nalusa bwa balanda aku namu lukalo lwaaye lubaadi lwa kwiba aa makuta. (Yowano 12:4-8) Ungi mususa eshimba dya Yundase dibaadi dimutakule mu kukita mwanda wibubi, baadi mupaane Yesu ku nfwalanga 30 ya kyamo. Yesu baadi auku shi Yundase tabaadi mukumbeene kwilanga kwishimba binyibinyi bwa kyakya kibaadi mukite, aye nkumwitamina bu “mwana a kushimina.” (Yowano 17:12) Bino abilesha shi pabafwile Yundase, bafwile bwa looso, kushii lukulupilo lwa lusangukilo.​—Maako 14:21.

 Yundase tabaadi muleshe shi belanga kwishimba bwa kyakya kibakitshine nya. Tabaadi mutonde kumpala kw’Efile Mukulu nya, bayiile mu kutonda kumpala kwa bakata ba bipwilo babaadi mudye nabo lukuku.​—Mateo 27:3-5; 2 Beena-Kodinda 7:10.