Kakongie ka Tumonyi tua Yehowa ka Iqaluit ke mu Iqualuit mu Nunavut mu Canada kabapete Nshibo ya Bufumu ipia bua musango wa kumpala. Bakuetu bepaane mu luibako mbapudishe luibako lua Nshibo ya Bufumu i na ma mbalo a kushala 50 muifuku dia 14 mu’eshi w’Ekumi 2022. Ino mbalo ipia ya bisangilo nyi Nshibo ya Bufumu i kunundu ngofu mu Canada. Kakongie ka Iqaluit kabaadi kakitshibue mu kipua kia 2010 akakitshinanga bisangilo mu nshibo y’abashilaa maasha ku kalasa.

Luno luikele luibako lukile bukopo, na abekalanga beluimikie munda mua bipua bibidi muanda wa kipupa. Iqaluit, apatuula’shi “mbalo ya mishipa ibungi,” asanganyibua pa mbalo y’abetamina bu Baie de Frobisher, mu kisangi kia mema kiabetamina bu Île de Baffin. Bua nkafika kuanka nka su mmu ndekie sunga mu buato. Na dingi, bi bukopo bua kuula bintu bia luibako mu yaaya mbalo. Bino abilesha’shi, bintu bia kuibaka nabio abitungu kuibituesha mu buato nkuenda nabio mbalo ya luibako. Dingi pa muanda wa klima, mbalombene kuibaka Nshibo ya Bufumu penda kubanga mu mueshi wa Muanda na mu mu’eshi w’Ekumi.

Ma tone 127 a bintu bia luibako abekalanga beabungile mu Nshbo ya Bikongeno ya mu Ontario. Abo nkuibiela mu ma kontenere 12 na mu mishete isatu ikata na kuenda nabio kuifua dia mu Montréal mu Québec. Kukatukila kuakua abo nkuenda nabio mu buato kukidila muishinda dia mema diabetamina bu Saint-Laurent, mu Océan Atlantique, na nkafika ku Baie de Frobisher. Bu biakushi efua mu kiakia yaaya mbalo, bua’shi masuwa a mema emane, ma kontenere bekele beele mu maato apeela abetamina bu ma barges. Maato aakakaa angi nkukaka ma barge ku mbalo i mema apeela. Akupu, mu mema apeela, biamo abitentulaa ma kontenere, nkuiatentula na kuiafuisha ku kiese.

Mbebakie ino Nshibo ya Bufumu bemuela mishindo ilekene ayiyikuasha bua kushala inyingie nsaa ya kasangu na ayisunguluka kasangu na ku klima ebukopo a mu Iqaluit, amuikalaa température mu kipungo kia hiver mukafikie mu 30ºC.

Bantu pepi 40 ba mu ma provense asamombo bekele bende mu kukuasha mu luibako ku yaaya mbalo i kula. Mukuetu Jason McGregor, umune a ku bantu bayile mu kukuasha amba’shi: “Kubanga ku kukimba bia kutuala bintu bia luibako bua’shi bifikie ku lupese lua kunundu lui kula, na ku kukimba bia kupudisha nkalakashi ya kumona bia kuibifuisha ayituuku mu kimpulunkamba, takui kintu kibadia kukambila Yehowa. Abikalanga bitunyingishe pa kumona abiende mudimo kumpala efuku dioso.”

Atusanka pamune na bakuetu ba mu Canada pa muanda wa Nshibo ya Bufumu ipia ibaabapete mu ino “mbalo ya mishipa ibungi” p’abatungunuka na mudimo aupa bantu muwa wa kuikala bu “balobi ba bantu.”—Mateo 4:19.