Kubanga muifuku dia 26, mu’eshi w’Ekumi 2022, kui bakuetu balume 106 na bakuetu bakashi 4 biabikala be mu lukano sunga babadi bakuate abatengiela kusambishibua pa muanda wa lukumiino luabo mu Russie na mu Crimée. Mukuetu Dmitriy Dolzhikov, e na bipua 44, balombana bu mufubi a Yehowa a 100 abadi beele mu lukano binobino. Dmitriy abaadi bamukuate mu mueshi wa Kitema muifuku dia 8, 2022. Mbamufunde’shi mmutuelakane mu kisaka kia ndumbuluilo atakula bantu mu kutomboka pa muanda baadi mutuele mu bisangilo bia bena Kidishitu na kulungula bangi bi lukumiino luaye. Pepi Tumonyi 350 ntukishe nsaa mu lukano kubanga kasha bemika midimo yetu mu kipua kia 2017.

Ba mpulushi abaadi bakuate Dmitriy kunyima kua’bo kutuela pa bukopo mu nshibo yaaye mu provense a Tcheliabinsk. Kunyima kua mafuku abidi, abaadi bamutume mu lukano bua kutengiela kusambishibua kuaye mu provense a Novossibirsk mu bilometre pepi 1500 kula na kuaye.

Dmitriy e mu kadimbo ka lukano pamune na bangi bantu 12. Mukashi aaye, Marina, te na matalua a kuenda mu kutala Dmitriy, anka be na mushindo wa kuisamba mu kuifundishena kua mikanda.

Marina amba’shi: “Pabaabadi bamukuate ntshinaadi nalaala kalolo nya naadi mpana nakutua tulo bufuku. Bakuetu ba mu kakongie abekalanga abangitamina bua kushaala nami, na bino mbinkuashe na kunyingisha ngofu.”

Marina amba’shi Dmitriy e na eshimba difukame na binangu bibuwa, akumbasha’shi “Yehowa kuete kumupasukila.”

Bakuetu mbebakuate muyile muiwa wa mu Russie w’abetamina bu Code pénal de la Fédération de Russie pabitale midimo ya ba ntomboshi. Munkatshi muabo mui mukuetu taadi na bipua 57 abetamina bu Anna Safronova, bapu kulombasha binobino bipua bisamombo mu lukano. Kino nyi nkibawe kia bipua bikile bungi kiabadi batshibile mukuetu mukashi.

Kukuata kua Dmitriy nyi ngungi muanda wi buufu aulesha kampanye ke bubi ke nako Russie kui Tumonyi tua Yehowa, akatungunuka takudi bipua bitano sunga mbiabadi batopekie kiakia kikitshino ngofu kui ndumbuluilo ya mu nsenga ishima. Pabaadi Tumiladi tukata tua mu Russie tuponeeshe Tumonyi tua Yehowa kilumbu mu 2017, bakata ba mu Russie abambile’shi abafungu mashibo a Tumonyi aaukibua ku mbulamatadi kadi kushi kuibakandika kukita midimo yaabo ya lulanguilo. Anka, ta mbikitshikie biabia nya. Mpa na binobino kui bilumbu, 308 biabakuete kusambisha Tumonyi tua Yehowa pepi 700. Na dingi mbatuele mu kukimbuula mu mashibo 1851 a Tumonyi tua Yehowa.

Atutuulu Dmitriy na bakuetu balume na bakashi babadi beele mu lukano muanda wa lukumiino luabo mu nteko yetu. Atushinguula’shi Yehowa atungunuka na kuibapa bukome buabadi nabo lukalo bua kunyingiila.​—Mateo 24:13.