Luibako lua mashibo apia a filiale ku Lubumbashi mu République démocratique du congo lukuete kuenda kalolo. Bena Betele pepi na 260 abakatuele mu ano mashibo apia kubanga mu mueshi wa Katano 2022, na bangi bena Betele 131 abashaala mu mashibo e ku Kinshasa. a Bakuete kuibaka angi mashibo a kushaala pepi na Betele a ku Kinshasa. Bena Betele 48 nyi abakashaala mu aa mashibo kubanga mu mueshi wa Kumpala 2024. Ano mashibo apia aakuasha bua kukuatshishena mpango ya teokrasi mu Congo yoso ibidi.

Mu kipua kia mudimo kia 2021, mu République démocratique du Congo, bakuetu mbalongie Bible na bantu bakile pa 250 000. Na bantu bakile mudiyo umune bekele batuele mu Kitentekiesho kia lufu lua Kidishitu. Bua binobino kui bena Betele 394 bakuete kufubila ku Betele mu Kinshasa.

Bu biakushii mushindo wa kutamisha lupango mu Kinshasa, bakuetu mbakimbe mpango mu bingi bibundi. Mbapete ku Lubumbashi lupango lulombene kuibaka mashibo a Betele mupia, mulombene kutama mu kuenda kua mafuku.

Lubumbashi e mu bilometre 2 300 na Kinshasa. Lupango lupia lui bukata bua ektare 12 na amuikala mashibo a kushaala, ma biro, depo, na nshibo ikata i na kadimbo ka kudiila na mbalo ya kukishisha kapapi.

Midimo ibaadi ibangie mu mueshi w’Ekumi na umune 2020, anka kuikele nkalakashi ibungi pa muanda wa kipupa kia COVID-19.

Mukuetu Robert Elongo, a mu komite a filiale a Congo (Kinshasa) apatuula’shi: “Kufunga kua mikalo ya maumbo nkukalakashe ngofu bua kutuesha bintu bia luibako, nyi buakinyi kipindi kia kumpala kia luibako takikeele kiende luntuluntu nya.”

Sunga mbiabia mukuetu Elongo amba’shi: “Penda mu kipua kimune, kipindi kia 40% kikele kipudishibue.”

Kushi mpaka Yehowa kuete kuelela luno luibako miabi. Atutekie bua’shi ano mashibo, abakumbashibua ku ‘bintu bia Kidishitu,’ atuushe nkumo ibuwa bua muilo wa Yehowa na kutumbisha eshina dia Yehowa Efile Mukulu.​—Mateo 24:47.