24 MUESHI WA MUANDA 2022
RUSSIE

Bakuetu abanyingiila mu lukano pa kuinyingishena

TEEMESHA MU

Mu mafuku apeela Tumiladi tua mu Taïga, mu provense a Kemerovo atutuusha kitshibilo kiato mu kilumbu kia mukuetu Maksim Morozov na Iouri Oussanov. Procureur ta mmubande kutshiba kibawe akitungu’shi bebatshibile nya.

Kuilondena kua mianda

1/4/2021

Ababanga kulondoola Iouri pa muanda wa kukita kisangilo kia kipuilo kia ndumbuluilo abadi bakandikie
2/4/2021

Bakata ba mbulamatadi abatuele mu kukimbuula mu nshibo ya Iouri munda mua nsaa isatu ishima. Abaadi bamukuate na babanda kumuela mu lukano
4/4/2021

Ababanga kulondoola Maksim
6/8/2021

Maksim abamukuata abamulama mu lukano munda mua bufuku bushima
7/8/2021

Maksim abamufundu’shi bakitshi kibeshi na abamuele mu lukano
16/5/2022

Ababanga kusambisha kilumbu

Mianda yaabo

Maksim Morozov

Mutandikue mu:1983 (Volgograd, mu provese a Volgograd)

Nshalelo aaye: Baadi afubu bu parachutiste mu kisaka kia basalayi. Kunyima aye nkubanga kutambusha miotoka ikata

Babangile kulonga Bible na Tumonyi tua Yehowa kunyima kuaye kuleka busalayi. Baadi mubatshishibue mu 2009

Biakula aye nabene

Nkinyi akikukuasha bua kulama muloo mu lukano?

Ne na Bible, nkuete kumubadika efuku dioso. Ne mufule kubadika mikanda ya Mpoolo mutumibua, bikishekishe ma shapitre akuete kulonda pabaabadi bamuele mu lukano, sunga pabaabadi bamuanye nkano na kumuela mu momba. Baadi atuulu binangu biaye ku midimo ya mu kukudi kushi kuibituula kuadi’ye nabene.

Na dingi, akinkuasha bua kushala na muloo nkuuka’shi ntshi bupenka. Ne na Yehowa ku lupese luande, Yesu na binunu bia mikeyilu mpa na bakuetu balume na bakashi. Mu ungi video a Caleb na Sophia, atumono abikitshi mikeyilu nsaa ayata bana bitshibilo bibuwa ku kalasa. Abintentekiesha’shi bibuwa ngate lukalakashi loso bu mushindo wandia kulesha lulamato luande kui Yehowa. Bino nyi abinkuasha bua kupela kutula binangu biande kuandi na ku nkalakashi yande na kulama binangu bibuwa.

Iouri Oussanov

Mutandikue mu: 1991 (Gorno-Chuisky, provense a Irkutsk)

Nshalelo aabye: Baadi afubu mudimo wa kutala nsembue na kushiika bintu sunga bu soudeur. Baadi mulongiele kui ninaaye pabitale Yehowa pabaadi kii mukinga. Baadi mubatshishibue mu 2007

Mmuibakile Irina mu 2021

Abiakula mukashi aaye Irina a

Iouri kuete nkunyingisha naminyi aku e mu lukano?

Mpa na binobino, ta mbetupe bulungantu bua kuimonena, sunga bua kuisamba naaye ku telefone. Tukuete kuisamba naaye penda mu kuifundishena mikanda, anka bua’shi mikanda ifikie abiata mafuku akile bungi. Eyendo’shi mbilekene na miisambo y’atuisambanga mafuku oso, anka tui na muloo bu biatukuete kuisamba.

Tatui na mushindo wa kuisamba buludiludi, sunga kubadika Bible pamune bu biatukitanga kumpala, bino ne nabio lukalo ngofu. Anka pepi mu mikanda yaaye yoso Iouri afundaa ma verse a mu Bible aadi mumone’shi aanyingisha. Ingi nsaa afundaa na mabue a muulo abapete mu mikanda ibaabamutumina. Ku bukuashi bua kuakua kuifundishena, tui na mushindo wa kuikala bu be mu lulanguilo lua mu kifuko. Dingi Iouri takuete kuluba kuntentekiesha’shi Yehowa mmuitufule na’shi mmuitulamine miabi ibungi mu mafuku e kumpala. Andungula dingi biadi munfule na muloo wadi nao bua bioso biankitshi. Nyi mbintu bipelepele, anka abinyingisha ngofu.

Atuuku’shi Yehowa ataa bano bakuetu balume na bakashi bepaane kuadi na muulo. Atushinkamisha’shi Yehowa atungunuka na kuibelela miabi ibungi mu mafuku e kumpala.—Bena-Ebelu 11:26.

a Patuikele atulumbuula uno muisambo, mukuetu Oussanov ekalanga mu lukano. Tatuikele na mushindo wa kuisamba naaye.

MIKANDU IPYA