Tumiladi twa mu kibundji kya Pskov atwakula kitshibilo pabitale mwanda wa mukwetu Gennady Shpakovskiy e na bipwa 61, mwifuku dya 8/6/2020. Mbamufude’shi, “extrémiste” kwamba’shi mmufule lulangwilo lwaye bikilekile penda mwanda wa’shi mutweshe bisangilo kwaye ku nshibo. Procureur badi mutekye tumiladi bwatudya kutshibila mukwetu Gennady Shpakovskiy bipwa musambo na kipindji mu lukano.

Ku mbangilo kwa kipwa kya 2018, ba mpulushi babetaminaa bu Service fédéral de sécurité (FSB) ababangile kupupuula kifuko kya mukwetu Shpakovskiy. Munda mwa myeshi i bungi, abadi abafwama bwa kutemesha na kutala byoso by’abakitshi. Mwifuku dya 3/6/2018, mu 12h45, ba mpulushi ba FSB abafikile na bangi ba mpulushi batwale ma mputu, bwa kutwela pabukopo, mu nshibo mu babadi abakitshi bisangilo mu butaale. Bano ba mpulushi abadi bakimbule mu nshibo munda mwa nsaa isamombo.

Ba mpulushi ba FSB abadi banyengye ma tablete, ma telefone na abo nkwenda na ba Temwe ba Yehowa bwa kwibela nkonko. Nsaa ibabadi abebele nkonko, ba Temwe ba Yehowa abadi abakayibwa na kwibalungula’shi abashimisha midimo akupu bebele mu lukano. Abadi basambishe mukwetu Shpakovskiy mpa na mu 22h.

Mu 19/3/2019, abadi bafunde mukwetu Shpakovskiy shi kwete akwatshishena ndumbulwilo a ba “extremistes.” Kunyima kwa myeshi itano, abadi balombashe ungi mwanda wa’shi kwete kutusha makuta bwa kukwatshishena ndumbulwilo a ba extremistes.

Patuky’atutengyela kitshibilo kya tumiladi, atutekye Yehowa n’eshimba dyetu dyoso bakulupile’shi, akwasha kifuko kya mukwetu Shpakovskiy bwakidya kunyinga, bashinkamishe’shi lukumino lwabo lwi bukopo alwibatwadila myabi i bungi.—2 Myanda 15:7.