Mwifuku dya 4/2/2020, tumiladi twa Zheleznodorozhniy mu Khabarovsk mu Russie atwakula kitshibilo pabitale kilumbu kya mukwetu Stanislav Kim na Nikolay Polevodov. Procureur atekye’shi boso bwabo bakite bipwa bisatu mu lukano, mbalo yabebafubisha ngofu. Nka mu kino kibundji kimune, tumiladi twa District industriel twi na kingi kilumbu.

Abadi bakwate mukwetu Kim na Polevodov mwifuku dya 10/11/2018. Mu dyadya efuku, bakwetu balume na bakashi bakile pa 50, abadi bende mu mbalo y’abatomenaa kafe na bwa kukisha kapapi. Ta babadi mu bisangilo nya. Kapindji kapela kunyima kwabo kubanga, ba mpulushi be bungi abafikile abo nkukwata boso abadi mwamwa. Mukwetu Kim na Polevodov, pamune na mukwetu Vitaliy Zhuk, abadi bebele mu lukano munda mwa myeshi ikile bungi.

Kilumbu ky’abakyebe kutala mwifuku dya 4/2/2020, nkya’shi mukwetu Kim na Polevodov abadi bebapete ino mbalo ibabadi bebungye bwa kusanka pamune na bakwabo. Byabya, bakata ba mbulamatadi abafundu dingi kilumbu kya’shi mukwetu Kin, Polevodov, Zhuk na bakwetu bakashi basatu abadi ku ino mbalo. Byabya, mukwetu Kim, na Polovedov mbebafunde’shi abo nyi abadi bate ino mpángo. T’abatushishe efuku dy’abatala uno mwanda.

Mukwetu Kim na Polevodov mbapete myanda i bukopo, mwanda abebafundu bwa myanda ibidi ilondene. Mbafunde bano bakwetu myanda ibidi pamutwe pa umune, byabya, abitungu mukwetu Kim na Polevodov bakasambe ku tumiladi tubidi twilekene mu Khabarovsk.

Boso bwabo mbebakile na be na bana baki ku mashibo abo. Atuuku’shi Yehowa atungunuka na kupa bano bakwetu na bifuko byabo kikudi kiselele bwa kulama mashimba abo, binangu na bwa’shi balame lukumino lwi bukopo mu kitompwanga.​—Bena-Fidipe 4:7.