Muifuku dia 29 mueshi wa Kitema 2022, Tumilaadi tukata tua mu Zimbabwe tui mu kibundi kia Mutare tuikele tutshibe kilumbu na kubingisha bakuetu Tobias Gabaza, Wonder Muposheri, na Jabulani Sithole, babekeele bakitshine mianda ya kukutua kua kululama pa muanda wa’shi mbapele kutuelakana mu bipikua bia kipuilo bua kukaluila kondo kaabo k’eshimba.

Mu mu’eshi w’Ekumi 2020, abaadi betamine bakuetu balume basatu buabadia kusamba ku tumilaadi tu’abasambisha kui nfumu a kibundi kunyima kua mungi mukata a kibundi kuteka bua’shi bakuetu batuelakane mu bipikua bia kibundi. Biabia bipikua bibaadi bitale kuitamina bikudi bia bafue bua kufuisha kipungo kia mpeshi, na abitungu’shi muina kibundi oso akite nka biabia. Bakuetu bekele baate kitshibilo, mu kulonda kua kondo kaabo k’eshimba kalongieshibue na Bible, bua kupela kutuelakana mu biabia bipikua.

Nfumu a kibundi ayikalanga muponeeshe bakuetu kilumbu na akimba bia kuibakitshisha pa bukopo. Bakuetu abekalanga batekie bua’shi kilumbu kiabo bekitaluule dingi ku Tumilaadi tua mu Chipinge.

Muifuku dia 5 dia mueshi wa Kumpala 2021, Nsushi a ku Tumilaadi tukata nkutshiba kilumbu aye nkulesha’shi bakuetu mbabingie. Anka, bakata ba kibundi bekele bapele kukookiela kitshibilo kia ku tumilaadi na nkutungunuka na kukitshisha bakuetu pa bukopo. Na dingi, bangi bena kibundi nkushikua bakuetu na kuibakiengiesha.

Bu biabidi’shi bakuetu abaadi nka abatungunuka na kukiengieshibua, abayiile na kilumbu ku Tumilaadi tukata. Tumilaadi nkushinkamisha’shi bakata ba kibundi bekele batupilue matalua a bakuetu. Tumilaadi nkutumina bakata ba kibundi eyi’shi tabekalanga dingi abatakula bakuetu pa bukopo buabadia kutuelakana mu bipikua bia kibundi abikutuena na koondo kaabo k’eshimba, na abitungu bebafute bua biabadi bebaluishishe.

Atushinkamisha’shi kino kitshibilo akikuasha bakuetu balume na bakashi ba mu Zimbabwe, muanda bino bipikua bikuete kukitshika muiumbo dishima. Atutumbula Yehowa ngofu bua kino kitshibilo kibuwa kibamueka.​—Nkindji 2:8.