Ba Temue ba Yehowa abaluishaa sunga kutshiba bifuko bia bantu su?
Bu biatudi ba Temwe ba Yehowa, atuitatshishaa bua kunyingisha bifuko bietu na bia bangi bantu. Atunemakaa Efile Mukulu bu nsulo ya kifuko. (Kibangilo 2:21-24; Bena-Efeso 3:14, 15) Etupa mayi a kulonda mu Bible, akuashe bantu bebungi mu nsenga ishima buabadia kuikala na mabaka anyingie na e na muloo.
Mushindo aukuashaa ba Temue ba Yehowa bifuko buabidia kuikala binyingie
Atuitatshishaa bua kulonda malango a mu Bible, muanda aetukuashaa bua kuikala balume, bakashi mpa na baledi bebuwa. (Nkindji 31:10-31; Bena-Efeso 5:22–6:4; 1 Timote 5:8) Binangu bi mu Bible abikuasha mpa na bena bifuko be na nkumiino ilekene buabadia kuikala na nshalelo e buwa. (1 Mpyeele 3:1, 2) Tala mayi abadi bakule kui bantu bashi ba Temue, kadi be na bena dibaka nabo bafikie ba Temue ba Yehowa:
“Mu bipua bietu bisamombo bia kumpala bia kuikala mu dibaka, tubadi nka atulee na kuikakeena. Kadi, kunyima kua Ivete kufika Temue a Yehowa, bapetele luishinko luibungi na kifulo. Kushintuluka kubaadi mukite, kubapashile dibaka dietu.”—Clauir, a mu Brézil.
“Pabadi mulume ande Chansa mubangie kulonga Bible na ba Temue ba Yehowa ntshinadi nakumina nya, muanda nadi nanangushena’shi abatshibaa bifuko bia bantu. Kunyima nafikile mu kumona’shi Bible, bakuashile dibaka dietu.”—Agness, a mu Zambie.
Mu mudimo wetu wa bulungudi, atuleshaa bantu mushindo ulombene kufubila binangu bi mu Bible kuibakuasha bua
Kusangula muntu a kuiyibakishena naye kalolo
Kumona bia kushala kalolo na bena kifuko kia muina dibaka nobe
Kutuela mu kingi kipuilo akufuishaa nkalakashi mu dibaka su?
Ingi nsaa bi kukitshika. Bu kileshesho, mu 1998 rapore ya societe abetamina bu Sofres ibadi ileshe’shi dibaka 1 pa 20 dibapetele nkalakashi i bukopo, pabadi umune a kuabadi mufikie Temue a Yehowa.
Yesu bapuile kuakula’shi, baaba abalondo malongiesha aaye abakapete ingi nsaa nkalakashi mu kifuko. (Mateo 10:32-36) Ungi muntu ataluula mianda ya kala abetamina bu Will Durant aleesha’shi mu Ampire a bena Looma, abadi abafundu bena Kidishitu’shi bakuete kuluisha bifuko,” a. Bi mumune mpa na lelo, abafundaa bangi ba Temue ba Yehowa bua yaya mianda imune. Bino abilesha’shi muina dibaka Temue a Yehowa nyi afuishaa bilumbu mu dibaka su?
Tumilaadi tua mu Europe atutalaa bulungantu bua bantu
Pabadi Tumilaadi tua mu Europe atutalaa bulungantu bua bantu atusambisha kilumbu kia’shi ba Temwe ba Yehowa abatshibaa bifuko, tubambile’shi: Bena kifuko bashii ba Temue, abakambaa kufuisha nkalakashi ibungi mu bifuko, pa kupela kukumina na kunemeka bulungantu bua kulanguila bua bakuabo.” Tumilaadi atukumbasha dingi’shi: “Uno muanda aukambaa kukitshika mu bifuko bioso mui bena dibaka na bipuilo bilekene, na uno muanda aufikilaa mpa na ba Temue ba Yehowa.” b Kadi, sunga p’abebakitshina bi bubi pa muanda wa lulangiulo luabo, ba Temue ba Yehowa abetatshishaa bua kulonda elango dia mu Bible adiamba’shi: ‘Taanwaalwishanga muntu bubi ku bubi. . . . Sui kui mushindo, nushaale mu kufukama na bantu booso.’—Bena-Looma 12:17, 18, EEM.
Buakinyi ba Temue ba Yehowa abeyibakishenaa nka na muina kulanguila nabo?
Ba Temue ba Yehowa abalondaa muiya wa mu Bible wa kuiyibakishena ‘nka penda mu Muanana,’ kuamba’shi muntu abadi naye lukumino lumune. (1 Bena-Kodinda 7:39) Uno muiya wi mu Bible na aukuasha ngofu. Bu kileshesho, mu 2010 ungi muisambo (Journal of Marriage and Family) ubambile’shi: “mu dibaka mui bantu na lulanguilo lumune, na bipikua mpa na nkumino imune” abekalaa na kipuano kibuwa bukile. c
Anka, ba Temue ba Yehowa tabanyingisha ba Temue nabo bua kuiabulushena na bena dibaka nabo bashii ba Temue. Bible amba’shi: “Su mukwetu kampanda eekala na mukashi shii mwina kukumiina, paadi mukumiine kushaala naaye, tamubinganga nya. Dingi su mukashi e na mulume shii mwina kukumiina, aye naamu mukumiine kushaala naaye tamupelanga nya.” (1 Bena-Kodinda 7:12, 13) Ba Temue ba Yehowa abakokielaa uno muiya.