Bwakinyi ba Temwe ba Yehowa tabakitaa feete a Pasaka?
Mpwandikisho ya bantu
Mpwandikisho: Ba Temwe ba Yehowa tabakitaa feete a Pasaka mwanda ta mbeena Kidishitu.
Eyendo: Twi bakumiine shi Yesu Kidishitu nyi Mupashi etu, na atukitaa mwetu mooso bwa ‘kulonda etabula dyaaye kalolo.’—1 Mpyeele 2:21; Luuka 2:11.
Mpwandikisho: Tanwi bakumiine shi Yesu musangukye ku bafwe nya.
Eyendo: Twi bakumiine shi Yesu musangukye; na atuuku shi kusanguka kwaye nyi kukwate lukumiino lwa bwina Kidishitu bu byatwibileshaa nsaa yooso patulungula mukandu wibuwa.—1 Beena-Kodinto 15:3, 4, 12-15.
Mpwandikisho: Tanwitatshishaa pakumona shi bana beenu bakwete kukutwa muloo aupetaa bana mu feete a Pasaka.
Eyendo: Twi bafule bana beetu—atukitaa mwetu mooso bwa kwibalongyesha na kwibakwasha bwashi bekale na muloo mu nshalelo aabo.—Tite 2:4.
Bwakinyi ba Temwe ba Yehowa tabakitaa feete a Pasaka?
Feete a Pasaka tafiki mu Bible nya.
Yesu baadi mutume eyi bwashi twikale atutentekyesha lufu lwaye, ta nkusanguka kwaye nya. Atutentekyeshaa lufu lwaye kipwa kyooso muyiile calendrier ka myeshi ya mu Bible.—Luuka 22:19, 20.
Atuuku shi bu bi bipikwa bya Pasaka abifiki ku bipikwa bya kala bitale myanda ya kutanda, Efile Mukulu tamukumiine uno feete nya. Efile Mukulu etutekye bwashi tumulangwile nkapenda aye bupenka bwaye mwanda aye nyi “Efile Mukulu sha mukao,” na dingi twi balombeene kulwisha eshimba dyaaye su mu lulangwilo lwetu atukitshi myanda yashii mukumiine.—Efilu 20:5; 1 Banfumu 18:21.
Atuuku shi kitshibilo kyetu kya kupela kukita feete a Pasaka nkipushene na akyamba Bible, mwanda Bible etutekye bwashi tuleshe “binangu na kapatupatu” pamutwe pa kulonda bipikwa bya bantu. (Myeele 3:21; Mateo 15:3) Patwisamba na bantu pabitale lukumiino lwetu pamwanda utale Pasaka, atuuku shi be na matalwa a kwata kitshibilo pabitale kyabakyebe kukita na atwibanemeka.—1 Mpyeele 3:15.