Ba Temwe ba Yehowa abafubaa na ma Bible elekeenelekeene mu kulonga kwabo kwa Bible. Mu ndjimi yabadi baluule Les Saintes Écritures​—Traduction du monde nouveau atumukuminaa ngofu mwanda, mwi eshina dy’Efile Mukulu, mbamufunde kalolo, na apushika kalolo.

•   Mwi eshina dy’Efile Mukulu. Bangi bafundji ba Bible mbakutwe kupa Efile mukulu kineemo kimupwandjikiile. Bu kileshesho, mu ungi Bible mwi mulongo wa mashina a bantu bakile pa 70 babaadi bakwashe bwashi bamufunde. Kadi, yawa Bible te na eshina dya winyi mumutuushe​—Yehowa Efile Mukulu​—eetu!

   Anka, Bible a Les Saintes Écritures​—Traduction du monde nouveau mmwalushule eshina dy’Efile Mukulu mu ma mbalo binunu mwadidi mu bifundwe bya kala, na dingi bantu abaadi mu komite baadi mutuushe yawa Bible ta mbafunde mashina aabo mwanka nya.

•   Mmufundjibwe kalolo. Ta ma Bible ooso abadi bafunde kalolo byashi a atuusha myanda y’abakwila mu ma Bible a kiina Ebreeyi na kiina Greke nya. Bu kileshesho, mu ungi Bible mbafunde ano mayi a Yesu e mu Mateo 16:24 bino shi: “Su muntu akyebe kundonda, eepele aye nabeene aate nkuluse aaye, andonde.” Munda mwa bipwa bibungi kumpala kwa kutandjikwa kwa Kidishitu ba mpangano abaadi abafubu na ma nkuluse bu bintu bya kulangwila nabyo mu bipwilo. Munkatshi mwa siyekele a 3 kunyima kwa Yesu Kidishitu, bipwilo bibaadi byate kitshibilo kya kufuba naye bwa kuleesha nkuluse a Kidishitu. Pangi baaba bantu abalulwile Bible abaadi batweshe binangu bya “nkuluse” Mwiyi dy’Efile Mukulu mwanda abaadi abakumiina shi Yesu bafwile ku nkuluse. Kadi kishima kyabadi bafube nakyo mu kiina Greke akipatuula “mutshi” pamutwe pa “nkuluse”. Nyi bwakinyi mu Traduction du monde nouveau uno verse atumubadika bino: “Su muntu akyebe kundonda, eepele aye nabene, na aate mutshi waye wa makyenda andonde.”

•   Apushika kalolo. Bible abadi baluule kalolo ta nka penda yawa abadi bafunde kalolo nya kadi abitungu ekadikye apushika kalolo, mubofule bwa kupusha. Twate kilesheho. Mu mukanda wa Mateo 5:3, Yesu afubu na kishima akipatuula shi: “Basha muloo nyi mbalanda mu kikudi.” Byabya, bu bi kino kishima takipushika kalolo mu ngakwilo a ano mafuku, Traduction du monde nouveau mmwalule uno verse mu mushindo wapushika kalolo. Amba shi: “Basha muloo nyi mbano abashinguula byabadi na nsala ya mu kikudi.”

 Kukaasha kutumika n’eshina dy’Efile Mukulu, kufundjibwa kalolo, na kupushika kalolo, Bible a Traduction du monde nouveau e na kingi kintu akimwabuula na angi ma Bible: Abamwabilaa buntu. Bipeta abituuku, bantu midiyo be na mushindo wa kubadika Bible mu ndjimi yabo ya butandwa​—mpa na baaba bashii na mushindo wa kumuula.