Oolo. Ba Temwe ba Yehowa abakuminaa shi Bible ooso mushima mufundjibwe ‘ku bukome bw’Efile Mukulu na akwasha.’ (2 Timotee 3:16) Bino mbitale Kilombeno kikulu na Kilombeeno kipya, bu byabebitaminaa kwi bantu bebungi. Mu byoso ba Temwe ba Yehowa abayitanyinaa bino bipindji bya mu Bible bu Bifundwe bya kina Ebreeyi na bya kina Greke kya beena Kidishitu. Mu uno mushindo atupelaa kulesha shi bingi bipindji bya Bible mbya kala ngofu sunga shi tabi na muulo ano mafuku etu.

 Mpoolo mutumibwa mwina Kidishitu bafundjile bino ku bukwashi bwa kikudi ki selele shi: “Kyooso kibaabadi bafunde kala kibaadi byaabya bu elango dyeetu.” (Beena-Looma 15:4) Byabya mu Bifundwe bya kina Ebreeyi mwi malango e na muulo kwatudi. Kukaasha ingi myanda i mwanka, amusanganyibwa myanda ya kala i na muulo mpa na malango aakwasha.

•   Myanda ya kala i na muulo. Bifundwe bya kina Ebreeyi bi na myanda ayilesha mushindo ubabapangile bantu na bibapoone bantu mu mulwisho. Su yaaya myanda tayi kwanka, tatubadya kwikala na myalulo i buwa ku nkonko bu shi: Twi batuukile kunyi? Bwakinyi bantu abafwiya? (Kibangilo 2:7, 17) Na dingi mu Bifundwe bya kina Ebreeyi mwi myanda ayilesha bibaadi Yehowa Efile Mukulu akitshiina bantu abaadi mu malwa sunga muloo myanda.​—Jaake 5:17.

•   Malango aakwasha. Mikanda ya mu Bible bu wa Myeele na wa Mulungudi, ayo ikale mu Bifundwe bya kina Ebreeyi i na binangu bishi na mpwilo bya mu nshalelo. Ayituusha malango pabitale mushindo wa kwikala na muloo mu kifuko (Myeele 15:17), mushindo wa kwikala na mweneno e buwa pabitale mudimo (Myeele 10:4; Mulungudi 4:6), na mushindo ulombeene bansongwalume na bansongwakashi kwikala na muloo ku bukinga bwabo (Mulungudi 11:9-12:1).

 Na dingi, twi balombeene kupeta bukwashi mu kulonga kwa Miiya ya Moyiise ayisanganyibwa mu Torah (mikanda itano ya kumpala mu Bible). Sunga yaaya Miiya ta ngitale beena-Kidishitu, ina mayi e buwa a kulonga alombeene kwitukwasha bwa kwikala na muloo.​—Beena-Levi 19:18; Miiya Ikituulwe 6:5-7.