Pabitale kukita Kidibua kia Muanana, atulondaa ngofu abiamba Bible, kino kidibua abekitaminaa dingi bu “kidibwa kia mesa,” sunga bu Kitentekiesho kia lufu lua Yesu. (1 Bena-Kodinda 11:20; EEM) Anka, bipikua na nkumiino ya bingi bipuilo pabitale uno muanda ta mbituukile mu Bible nya.

 Kabingilo ka Kidibua kia Muanana nka’shi, tutentekieshe Yesu, pa kulesha lutumbu bua mulambu wadi mutuushe pa muanda wetu. (Mateo 20:28; 1 Bena-Kodinda 11:24) Kitentekiesho taki bu kino kintu kiabetaminaa bu sakramento, sunga kipikua kia mu bipuilo kiabakitaa bua’shi Efile Mukulu afuile muntu lusa ku miluisho yaaye. a Bible alongiesha’shi miluisho yetu ngilombene kubuikiilua, kushii pa muanda wa kukita kipikua kampanda, anka penda mu kuikala na lukumino mui Yesu.​—Bena-Loma 3:25; 1 Yowano 2:1, 2.

 Yesu baadi mutumine balondji baaye eyi dia kutentekiesha Kidibua kia Muanana, anka ta muleshe misusa ayitungu kuikikita nya. (Luka 22:19) Bangi abapuandikisha’shi abitungu kukikita ku mueshi oso, bangi namu’shi, lubingo loso, bangi’shi, efuku dioso, misusa ibungi kuifuku, sunga misango yoso yabamono’shi bi na muulo bua kukikita. b Anka, pusha mianda ayitungu kutuula mu binangu.

 Yesu baadi mukite Kidibua kia Muanana muifuku dia Pasaka a bena Yunda, na aye nkufua ingi nsaa mu diadia efuku dimune. (Mateo 26:1, 2) Bino tabibaadi bu kufumankana kua bisumanga nya. Bible apuandikisha mulambu wa Yesu na muana a mukooko a Pasaka. (1 Bena-Kodinda 5:7, 8) Abaadi abakitshi Pasaka musango umune ku kipua. (Efilu 12:1-6; Bena-Levi 23:5) Mu mushindo umune, bena Kidishitu ba kumpala babadi abakitshi Kitentekiesho kia lufu lua Yesu musango umune ku kipua, c na ba Temue ba Yehowa abalondaa kino kileshesho.

 Kileshesho kiabadi balekie kui Yesu akitukuasha bua kutundula kushii penda misuusa ya kuikikita, kadi mpa na efuku na nsaa ya kukita Kitentekiesho. Bakitshine kino kitentekiesho kunyima kua nguba kutuela, muifuku dia 14 nisane mu kipua kia 33 bino bipungo bietu, muyile kalandrie ka mueshi kabaabadi abalondo mu Bible. (Mateo 26:18-20, 26) Atutungunuka na kukita Kitentekiesho ku kipua kioso mu diadia efuku, bu bibaabadi abebikitshi kui bena Kidishitu ba kumpala. d

 Sunga biekala’shi, mu kipua kia 33, muifuku dia 14 dia mueshi wa nisane dibaadi mu dia Katano, efuku dia kukita kitentekiesho di kuikala dilekene mu lubingo kampanda kipua kioso. Kipua kioso, atulondaa mayele abaabadi abalondo mu mafuku a Yesu, pamutue pa kulonda kalandrie ka bena Yunda ka ano mafuku. e

 Bua kukita kino kitentekiesho, Yesu baadi muate mukate ushi na kitatusho na nfinyo imonga ibaadi ishaale ku kidibua kia Pasaka. (Mateo 26:26-28) Mu kulonda kua kileshesho kiaye, atuataa mukate ushi na kitatusho na ushii wele kingi kitobuanga, na nfinyo imonga ishi ikumbashe kintu, kushii jus atukuba tuabetamina bu raisin tuabadi bakoposhe sunga kuela elangi.

 Mu bingi bipuilo abataa mukate wina kitatusho, anka mu Bible kitatusho akileshaa miluisho na kuluila. (Luka 12:1; 1 Bena-Kodinda 5:6-8; Bena-Ngalatea 5:7-9) Biabia, nka pena mukate ushi na kitatusho na ushii wele kitobuanga kampanda, nyi kileshesho kilombane bua mbidi ya Yesu ishi na miluisho. (1 Mpyeele 2:22) Kingi kipikua kikutuene na abiamba Bible nyi nkia kuata jus a tukuba tuabetamina bu raisin tushii tusase pa mbalo ya nfinyo. Mu bingi bipuilo abakitaa bino muanda abakandikaa bantu bua kutoma maalua.​—1 Timote 5:23.

 Mukate ushi na kitatusho na nfinyo imonga abikalaa ku Kitentekiesho nyi mbileshesho bia mbidi na mase a yesu. T’abishintulukaa mu kilengieleshi bum bidi na mase nya sunga kuisanga mu mbidi na mase aaye bu abipuandikishaa bangi bantu. Tutaleyi tubingilo tui mu Bible atuitutakula mu kuamba bino.

•   Su Yesu Yesu badia kutumina balondji baaye eyi dia kutoma mase aaye, badia kutupilua muiya aupele kudia mase. (Kibangilo 9:4; Bikitshino 15:28, 29) Bino tabibadia kukitshika muanda Yesu tabaadi mukumbene kutuma eyi dia kutupilua muiya w’Efile Mukulu pabitale kuata mase bu kintu kia kishila.​—Yowano 8:28, 29.

•   Su batumibua abadia kutoma mase a Yesu anabene, tabadia kuamba’shi “mase ande […] aakapongolua,” abilesha’shi mulambu waaye ukii kumpala.​—Mateo 26:28.

•   Mulambu wa Yesu ngutushibue “musuusa umune bua looso.” (Bena-Ebelu 9:25, 26) Biabia, su mukate na nfinyo bibaadi bialulukie bu mase aaye na mbidi yaye, mu nsaa ya Kidibua kia Muana, baaba abadi abadia kukituulanga wawa mulambu misango yoso.

•   Yesu bambile’shi: “Tungunukayi na kukita bino bua kuntentekieshanga,” tabambile’shi “bua kundambula” nya​—1 Bena-Kodinda 11:24.

 Bantu boso abakuminaa mu kuilenguula, kushintuluka kua mukate na nfinyo biafikia mbidi na mase a Yesu anabene, mbakumine ino mianda muyile biabapusha mu angi ma verse a mu Bible. Kileshesho, mu ma Bible ebungi bino bibakuile Yesu pabitale nfinyo mbebialuule bino mu angi ma Bible: “Ano nyi mase ande.” (Mateo 26:28) Anka, maye Yesu ngalombene kualuulua dingi bino’shi: “Ano aapatuula mase ande,” “Ano aalesha mase ande,” sunga’shi “Ano aapushisha mase ande.” f Anka bu bibaadi akitshi, Yesu baadi alongiesha ku bukuashi bua bileshesho.​—Mateo 13:34, 35.

 Ba Temue ba Yehowa p’abakitaaa Kidibua kia Muanana, nka penda kasaka kapeela ka kuabadi nyi akadiyaa mukate na kutoma nfinyo. Buakinyi?

 Mase a Yesu abapongolokiele ngashinkamishe “kilombeno kipia” kipiane kilombeno kibaadi Yehowa Efile Mukulu mukite na muilo wa kala wa Isalele. (Bena-Ebelu 8:10-13) Bano be mu kiakia kilombeno kipia abadiyaa mukate na kutoma nfinyo ku Kitentekiesho. Muanka tamui bena Kidishiut boso nya, anka “baaba betaminyibue” mu mushindo wi pabuao kui Efile Mukulu. (Bena-Ebelu 9:15; Luka 22:20) Bano abakamunana pamune na Kidishitu, na Bible amba’shi nyi mbantu 144 000 bapete kino kinemo.​—Luka 22:28-30; Kibafumbwilwe 5:9, 10; 14:1, 3.

 Mu kuilekena na “lombe lupeela” lua bano betaminyibue bua kumunana pamune na Kidishitu, ba Temue bebungi be na lukulupilo lua kuikala munkatshi mua “kibumbu kikata” akikekala na muwa wa ikalayika pa nsenga. (Luka 12:32; Kibafumbwilwe 7:9, 10) Sunga bano bena lukulupilo lua kuikala na muwa pa nsenga tabadiyaa mukate na kutoma nfinyo, abatuelaa mu Kitentekiesho bua kulesha lutumbu bua mulamu wa Yesu ubaadi mutuushe bua bantu boso.​—1 Yowano 2:2.