“Su okumiina’shi Bible nyi eyi di’Efile Mukulu kui bantu, bino abilesha’shi Efile Mukulu kuete kuisamba netu. . . . Bua’shi lulanguilo luenu luikale na bukitshishi mu nshalelo oobe, biabia abitungu’shi ngakuilo e mu Bible ekale a kano kabidi.” Biabia nyi bibafundile ungi mufundi abetanyina bu Alan S. Duthie mu mukanda waye wa Bible Translations and How to Choose Between Them.

Bantu bafule Eyi di’Efile Mukulu ngofu abakumiinaa namu ano mayi abaadi muakule. Dingi, abakumiina n’eshimba dimune’shi “bifundue bioso mbiyokielue n’Efile Mukulu na abikuasha bua kulongiesha, bua kulanga, bua kuludika mianda na bua kunyoka mu kululama.” (2 Timote 3:16) Bible ta mmuikale penda bu mukanda wa kala nya. Kadi e “na muwa na bukome,” na mui malango aakuasha bantu bua kupudisha mianda ya kuifuku n’efuku. (Bena Ebelu 4:12) Bua’shi bantu bapushe uno mukanda wa kishila na kutumikila mianda imuanka, abitungu’shi wikale na ngakuilo a mu nshalelo a ku’efuku n’efuku, biabia bantu ba mishindo yoso mbalombene kuiubadika na kuiupusha kalolo.

Bantu bafule Eyi di’Efile Mukulu be na muloo bua kutuuka kua Bible​—Ngaluluilo a nsenga ipia (Mateo-Kibafumbuilue) mu Kisonge. Ba Tumonyi tua Yehowa mbaukishe kutuka kua uno Bible mu le 29/08/2023. Mbaluule uno Bible mu mushindo aupushika kalolo na mianda nka biayidi, na bino abikuasha bua’shi bantu abakula Kisonge bapushe mukandu w’Efile Mukulu kalolo kukila kumpala. Pangi weyipusha’shi mba nanyi baluule Bible kalolo ke biabia?

Sunga biekala’shi mbua musango wa kumpala wabatusha Bible​—Ngaluluilo a nsenga ipia (Mateo-Kibafumbuilue,) mu Kisonge, uno Bible mmupue kuikala kuanka kubanga mu kipua kia 1950. Mu aa mafuku, babadi bamutushe mu Anglais kui Watch Tower Bible and Tract Society​—Societe atuushaa ma Bible takudi mafuku e bungi. Kitenta kia Mulami kia 15/09/1950, kibambile’shi: “Bantu be mu komite a kualuula Bible mbakumiine bua’shi . . . mashina aabo taaukibuaga pabaki na muwa sunga abo babapu kufua. Kepatshile ka uno Bible nka kutumbisha eshina di’Efile Mukulu a binyibinyi, e na muwa.”

Mu kipua kia 1961 nyi mubabadi batushe Bible mushima a Ngaluluilo a nsenga ipia. Sunga biekala’shi mashina a baaludi ngashale kushi kuukibua mpa na lelo, tatui balombene kuelesha mpaka pabitale kisumi kiabo sunga lulamato luabo kui Efile Mukulu. Mayi a mbangilo a Bible ababadi batushe mu 2013 aamba’shi: “Bu bikale’shi mukandu wa mu Bible wi na muulo ukata, tui baleshe kanemo kakata bua mianda i mu Bible pakukituula uno Bible na kalolo koso. Tui na bushito bukata bua kutusha mukandu wa mu Bible nka biabia biaudi. . . . Kepatshila ketu kabadi ka kutusha ngaluluilo mulamate ku bifundue bia ku kibangilo, na mubofule kubadika.”

Mpa na lelo, mbapue kutusha ma Bible­​—Ngaluluilo a nsenga ipia akile pa midiyo 247, mushima sunga kipindi mu ndimi ikile pa 260. Bantu be bungi ababadikaa mbatundule kinyi?

Yesu badi mulongieshe balongi baye bua kuteka’shi: “Yaya etu e muiyilu, eshina diobe dikashue dia kishila.” (Mateo 6:9) Eshina dia Yehowa di mu Bible misango ikile pa 7 000. (Efilu 3:15; Misambo 83:18) Kunyima kua lufu lua batumibua ba Yesu, mu kakongie ka bena Nkidishitu mubatuelele binangu bibubi bibadi nabio bena Yunda bebungi bia kupela kufubisha eshina di’Efile Mukulu. (Bikitshino 20:29, 30; 1 Timote 4:1) Bantu babadi abatentula bipindi bia bifundue bia mu kina Greke babaabangile kuela eshina “Efile Mukulu” na “ Muanana” pa mbalo y’eshina dia Yehowa.

Komite a Bible​—Ngaluluilo a nsenga ipia mmualushe eshina Yehowa mu Bifundue bia mu kina greke bia bena nkidishitu, a diadia eshina di muanka misango 237. Kitshibilo kia kualusha diadia eshina takibadi kia baaludi nya, kadi kibadi muyile kukimbuula kubabadi bakite. Bu kileshesho, mu Luka 4:18 mui mayi a mu Yeshaya 61:1. Mu bifundue bia kina Ebelu bia ku kibangilo, eshina Yehowa dibadi mu yawa verse. Nyi buakinyi mu Bible​—Ngaluluilo a nsenga ipia, mu Luka 4:18 mbaluule’shi: “Yehowa mmumpe kikudi kiaye muanda mungiele muimu bua kulungula balanda mukandu wibuwa.”

Kualuula bino akukuasha ababadika bua kumona kuilekena kui pankatshi pa Yehowa na Muan’aye a eleka, Yesu Nkidishitu. Bu kileshesho, mu ma Bible e bungi mbaluule Mateo 22:44 shi: “Nfumu balungwile Nfumwami.” (King James) Kadi mu uno verse nnanyi alungula nnanyi? Aku namu, uno verse mmutemune mayi a mu Misambo 110:1 mui eshina di’Efile Mukulu muyile bifundue bia kina Ebelu bia ku kibangilo. Nyi buakinyi mu Bible​—Ngaluluilo a nsenga ipia mbaluule Mateo 22:44 bino: “Yehowa balunguile Nfumuami.” Bi na muulo ukata bua kulesha kuilekena kui pankatshi pa Yehowa Efile Mukulu na Muan’aye. (Maako 13:32; Yowano 8:17, 18; 14:28) Abitungu tupushe kalolo kuno kuilekena buatudia kupaashibua. Bikitshino 2:21 amba’shi: “Muntu oso ayitanyina eshina dia Yehowa akapaashibua.”

Baludi ba Bible​—Ngaluluilo a nsenga ipia mbakite muabo moso bua kualula bifundue bia kina Greke mu ngakuilo a kano kabidi nka bibabidi mu bifundue bia ku kibangilo na lulamato loso. Bu kileshesho, baludi ba Bible​—Ngaluluilo a nsenga ipia babaadi betatshishe bua kualula mianda muyile abilesha verbe ya mu kina Greke. Mu ndimi i bungi ya kano kabidi, abafubishaa ma verbe bua kulesha nsaa ayikitshika muanda kampanda​—kuamba’shi, muanda upue kukitshika, aukitshika binobino, na aukakitshika mu mafuku e kumpala. Mu kina Greke namu ma verbe aaleshaa mushindo aukitshika muanda kampanda​—kuamba’shi aukitshika bua kapindi kapela, ngupue kukitshika, sunga’shi autungunuka na kukitshika. Tubande kutaluula mayi a Yesu e mu mukanda wa Mateo 6:33. Verbe a mu kina Greke alesha “kukimba” apatuula muanda autungunuka na kukitshika. Nyi buakinyi mbalule mayi a Yesu e mu uno mukanda’shi: “Biabia, tungunukayi na kukimba kumpala Bufumu na kululama ku’Efile Mukulu, na abakenukumbashila biabia bingi bintu bioso.” Mu mushindo umune, Mateo 7:7 mbamualule’shi: “Tungunukayi na kuteka, na abakenupa; tungunukayi na kukimba, na anukapete; tungunukayi na kukookola, na abakenushituila.”​—Bena Loma 1:32; 6:2; Bena Ngalateya 5:15.

Kutuka kua Bifundue bia mu kina greke bia bena nkidishitu mu Kisonge, mpenda mbangilo. Mbate mpango bua kualuula Bible mushima apakumbana mafuku. Bantu ababadika be kushinkamisha’shi Bible a mu Kisongie ekala na mianda ya binyibinyi na ayipushika kalolo nka bu a mu Anglais su?

Olo. Muanda Kasaka ka Bakunkushi-Bakulu ka Tumonyi tua Yehowa kakuete kukunkusha mudimo wa kualuula kalolo. Babadi bate kitshibilo kia binangu kia’shi bantu abakitshi mudimo wa kualuula Bible, beukite mu kisaka. (Nkindi 11:14) Biabia, tusaka tua kualuula Bible tubadi tutudibue mu nsenga ishima. Departema a kualuula badi mutudibue ku Biro bikata bia Tumonyi tua Yehowa bia mu nsenga ishima bua kukuasha tuatua tusaka, kualuula nkonko ya baaludi, na kukita bia’shi ma Bible​—Ngaluluilo a nsenga ipia ekale epushene mu ndimi ilekenelekene. Dingi, babadi balumbuule programe abetanyina bu Watchtower Translation System bua kukuasha baaludi ba Bible. Bu kileshesho, yawa programe alesha biabadi baalule mu Anglais kishima kioso kia mu kina Ebelu na mu kina Greke​—bino abikuasha baaludi ngofu buabadia kusangula bishima bibuwa mu ludimi luabo. Kadi abitungu kushinkamisha’shi mudimo wa kualuula, mmudimo wi bukopo autekie kuitatshisha ngofu. Informatike mmukuashe ngofu bua’shi bisaka bia baaludi bilombashe kepatshila kakata kabadi nako, ka kualuula Bible​—Ngaluluilo a nsenga ipia ena mianda ya binyibinyi na ayipushika kalolo nka bu Bible a mu Anglais.

Atukunyingisha bua kubadika Bible​—Ngaluluilo a nsenga ipia (Mateo-Kibafumbuilue.) We kumubadika ku Internete, mu aplikation a JW Library, sunga’shi be kukupa yawa a ku masaki, mu kakongie ka Tumonyi tua Yehowa ke pepi nobe. Dingi, okasanka na ingi mianda imuanka: mmupelepele kubadika; kipindi kiabadi bafunde’shi mianda y’abesambila muanka akikukuasha bua kumona mu kikoso mianda yoso i mu mukanda kampanda wa mu Bible, na akikukuasha bua kupeta ma verse oodi muiubidishene nao bukidibukidi; mpa na mianda i mu apandise. Muanda wi na muulo ngua’shi we mulombene kubadika uno Bible mushinkamishe’shi ena mianda ya binyibinyi y’Efile Mukulu muyile ngakuilo a kano kabidi.