Mu Mexique na mu Amerique centrale mwi bantu peepi na 290 abalulaa mikanda, bashalele mu maumbo asamombo, bakwete kwaluula mikanda ayipatuula Bible mu ndimi ikile pa 60. Bwakinyi abakitshi uno mudimo ooso? Mwanda nsaa ayipete bantu mikanda mu ludimi lwabapusha kalolo, ayibakumu ku mashimba ngofu.​—1 Beena-Kodinda 14:9.

Bwa kulongamisha ngalulwilo a mikanda, bangi bantu abalulwila mikanda ku biro bya Batemwe ba Yehowa mu Mexique mbebatume mu ma mbalo abesambaa lwalwa ludimi. Nkutuukye bipeta kinyi? Bantu abaluula bakwete kukisha nsaa ibungi na baaba abakula ludimi lwabaluula mikanda, abibakwasha bwabadya kutuusha mikanda ayipushika kalolo muyiile abisambaa baaba bantu.

Bano abaluula abapusha naminyi pabitale kwakwa kushintuluka? Federico alulaa mu ludimi lwabetamina bu Guerrero Nahuatl amba shi: “Munda mwa bipwa byooso ekumi byangikalanga naluula mikanda mu Mexique ne mufumankane penda na kifuko kimune akyakula ludimi lwetu. Kadi bwa binobino, bibundji bifunyishe biro bya kwaluula mikanda byooso abyakula ludimi lwetu!”

Karin alulaa mikanda mu ludimi lwabetamina bu Low German ku biro bya mu Mexique mu lupata lwa Chihuahua amba shi: “Kwikala munkatshi mwa ba Mennonite nkunkwashe bwa kwikala na bishima bipya byabakula kwi bantu mu miisambo yaabo. Twibashale na kufubila mu kabundji kapeela, kadi pantala kwididishi, nkwete kumona bantu abapete mikanda yatukwete kwaluula pano.”

Neyfi taadi binobino mu biro bya ku Mérida, mu Mexique amba shi: “Nsaa yatulongo Bible na bantu mu ludimi lwa Maya, atupusha bishima byabashabauku kwi bantu abesamba ludimi lwa Maya. Paapa atukimbi kishima kyabakamba kupusha kalolo kwi bantu bwa kwikifunda mu mikanda yetu.”

Mushindo kinyi wabikwete kukwasha bano booso abapete mikanda? Banda kutala penda kino kileshesho kimune: Elena e na bipwa pepi 40, esambaa ludimi lwa Tlapanec, atwelaa mu bisangilo byooso bya Batemwe ba Yehowa. Anka bu abikalanga bisangilo mu ki na Espanye, tabaadi apusha byooso kalolo nya. Amba shi: “Naadi nauku penda shi ne na kya kwenda mu bisangilo.” Binobino, kunyima kwa Elena kulonga Bible mu broshire abadi bafunde mu ludimi lwa Tlapanec kifulo kyaaye bw’Efile Mukulu nkitame aye nkulambula muwa waaye kwadi na nkubatshishibwa mu 2013. Elena amba shi: “Natumbula Yehowa paaye kunkwasha bwashi mpushe Bible.”