Pusha abiakula Gwen, a mu Angleterre, pabitale biepusha pabaadi muende mu kukuasha mbalo yabadi na lukalo lua balungudi bebungi: “Ntshinaadi napuandikisha’shi ne mulombene kufubila Yehowa n’eshimba diande dioso bino.” a

 Gwen nyi ngumune a ku Tumonyi tua Yehowa tubaadi tuende mu Albanie mu kukuasha mu mudimo wa kubunga “bintu bibuwa bia mu miilo yoso.” (Angai 2:7) Nkinyi kibaadi kitakule bano balungudi? Mmianda kinyi yabadi bashintuule bua kumona bia kuenda kuanka? Na mmianda kinyi ya muloo yabadi bapete ibakuashe buabadia kunyingiila nkalakashi yabo?

 Balungudi boso abaadi bende mu Albanie mbaleshe penda kabingilo penda kamune kabaadi kebatakule buabadia kuenda mu kukuasha, abamba’shi: Mbafule Yehowa na abakumiina kukuasha namu bangi bubadia kumuuka.

 Kumpala kuabadia kuenda, abaadi bashintuule mianda mu nshalelo aabo bua kumona biabadia kupeta mushindo wa kufubila Yehowa ngofu, bino bibaadi bibakuashe buabadia kunyingiila nkalakashi kuabene. Gwen amba’shi: “Kia kumpala nabangile kutuela mu kakongie ka ludimi lua Albanais, muiumbo dietu. Akupu nayile mu kutala eumbo dia Albanie bua’shi ntuele mu kikongeno kuanka. Akupu, nalukiile kuanka bua ndambo ya mafuku, buandia kuuka dingi kalolo diadia edimi.”

 Pabaadi Manuela na bipua 23, baadi muende mu kingi kibundi kia muiumbo diabo, mu Italie, mu kukuasha mu kakongie kapeela. Amba’shi: “Naadi mulungule kuanka munda mua bipua binanka. Akupu, napushishe’shi muiumbo dia Albanie be na lukalo lua balungudi. Nyi buakinyi natshile mpango ya kuenda mu kulungula kuanka bu mbala-mashinda munda mua mieshi ipeela.”

 Federica baadi penda na bipua musambo pabaadi mupushe abatuusha rapore y’eumbo dia Albanie mu kingi kikongeno. Amba’shi: “Yawa mukuetu baadi atuusha rapore bakuile’shi, balungudi be mu Albanie babaadi abalongo Bible na bantu bebungi, na’shi bantu babaadi bakumiine ababangile kutuela mu bisangilo. Nabangile kulungula baledi bande’shi, ne na lukalo lua kuenda mu Albanie. Lualua lukalo lunaadi nalo lubaadi luibakaanyishe, anka Papa bandunguile’shi: ‘Ikala wele nteko pabitale wawa muanda, na su nyi bi kikiebe ki’eshimba dia Yehowa akupusha.’ Kunyima kua mieshi, abaadi betutekie bua’shi kifuko kietu kioso kishima tuende mu kulungula mu Albanie!” Kubapu kukila bipua bibungi, binobino Frederica mbapue kumuibakila kui Orges. Bakuete kufuba boso bu balungudi ba nsaa yoso mu Albanie.

 Kunyima kua Gianpiero kuata pansio, aye na mukashi aaye Gloria, abayile mu kushala mu Albanie. Amba’shi: “Tui bakushe bana betu balume bananka mu Italie. Basatu ba kuabadi abaadi bende mu kukuasha mu dingi eumbo dibaadi na lukalo lua balungudi bebungi. Muisambo wa mu Kitenta kia Mulami awamba’shi: ‘Pourriez-vous passer en Macédoine?’ Ubaadi witukume ku mashimba ngofu. Tubashalele bua kutaluula mushindo watudia kufubisha makuta etu a pansio bua kuenda mu kulungula mu Albanie.”

 Abitungaa kuilumbuula kalolo na kushintuula ingi mianda kumpala kua kuenda muiumbo diabadi na lukalo lua balungudi bebungi. (Luka 14:28) Mu yaaya mianda mui kukimba ekuta dia kuikuasha nadio. Pabaadi kii mu Angleterre, Gwen atuikele besambile ku mbangilo, aye na taata aaye abaadi bakimbe makuta kumpala kua kuenda kuanka. Sophia na Christopher, abo dingi abaadi abakatukila mu Angleterre, abamba’shi: “Tubaadi bapaane mootoka wetu mpa na bingi bintu bia mu nshibo. Lukalo luetu lubaadi lua kushaala mu Albanie sunga bua kipua kimune.” Muanda wa muloo nguno, mbapete muloo wa kuimushaala munda mua mafuku ebungi.

 Bangi balungudi abaadi bashale mu Albanie munda mua mieshi ipeela abo nkualukiila kuabo mu kukimba makuta akupu baluka dingi mu Albanie. Bino nyi bibaadi bikite Eliseo na Miriam. Eliseo amba’shi: “Miriam akatukila muiumbo adiendaa ba turiste mu kutala ngofu mu Italie, mbalo ibofule kupeeta mudimo wa makuta ebungi mu kipungo kampanda. Mu kipungo ki’eshipo kiabetaminaa bu été tubaadi atuende mu diadia eumbo atukisha muanka mieshi isatu akupu atuende mu Albanie bua kushaala mieshi kitema muanka. Tui bakite biabia munda mua bipua bitano.”

 Kunyima kua kuenda muiumbo diabadi na lukalo lua balungudi bebungi, bano bakuetu abaadi na lukalo lua kuiubidishena na mianda ya mu diadia eumbo, anka malango na bileshesho bia Tumonyi tua mu diadia eumbo bibaadi bibakuashe bua kunyingiila nkalakashi ibaabadi bafumankane nayo. Sophia atuisambilanga kumpala, amba’shi: “Mu kipungo kia mashika kiabetamina bu hiver mu Albanie, mashika aekalaa ebungi mu mashibo kukila mu mashibo andi mubiile kuetu. Nalongiele kufuala bilamba bilekene panaadi natala mushindo ubaadi aufuala bakuetu bakashi ba mu diadia eumbo.” Grzegorz na mukashi aaye, Sona abakatukile mu Pologne benda mu kukuasha mu kibundi kiabetamina bu Prizren, mu Kosovo. b Grzegorz amba’shi: “Balungudi ba mu diadia eumbo be na kuiyisha ngofu, kalolo, mpa na luishinko! Bakuete kuitukuasha buatudia kulonga diadia edimi kalolo. Bu kileshesho, mbetuleshe mbalo ya kuula bidibua muulo upeela, betulesha mpana bia kuula bintu mu kisalue kia muiumbo.”

 Bano abendaa mu dingi eumbo abapetaa miabi ilekene pa kudia bu kuuku na bakuetu ba mu diadia eumbo, dingi abalongaa bipikua bia baaba bakuetu. Sona amba’shi: “Ne mumone mushindo wikale kifulo bua Yehowa nkilombene kushintuula bantu. Bakuetu mbanyingishe lukumiino luande muanda ne mumone mushindo wabadi bashintuule nkumiino na nshalelo aabo, nsaa ibaabadi balongie mianda ya Yehowa. Mu kakongie atuipushaa’shi tui na muulo na’shi nyi mbalo yetu yatudia kuikala. Tukuete kufuba pamune na bakuetu balume na bakashi bapue kuikala bu ba kuuku betu.” (Maako 10:29, 30) Gloria amba’shi: “Nauku bakuetu bakashi bebungi banyingiile nsaa ya kubinguabingua kukata akufiki kui be na eumbo bashikue Tumonyi tua Yehowa. Eyendo’shi bino abinkumu kuishimba nsaa y’amono biabadi bafule Yehowa.”

 Kuenda mbalo yabadi na lukalo lua balungudi bebungi, akupeyaa bakuetu dingi mushindo wa kulonga mianda i na muulo yabashibadia kulonga muiumbo diabo. Kileshesho, abamonaa’shi kukita kintu kilombene kuibafuishila nkalakashi bua kufubila Yehowa bibungi akuibapeyaa muloo. Stefano amba’shi: “Muiumbo dietu nadi nalungula ngofu nka penda ku interphone, mpa na kufubisha mushindo wa kubanga muisambo mu kikoso. Anka bena Albanie abakuminaa kuisamba munda mua nsaa ibungi, bikishekishe nsaa y’abatomo tu kafe. Bu biangikalaa na buufu buibungi, ku mbangilo naadi na moo, ntshinaadi nauku kiandia kuakula. Anka, kunyima kua mafuku ebungi ne mulongie bia kupasukila bantu, na binobino ne na muloo wa kuisamba nabo. Ne na muloo ukata mu mudimo wande wa bulungudi.”

 Leah na mulume aaye William, abaadi bakatukile mu États-Unis abo nkuenda mu Albanie. Amba’shi: “Kulungula mukandu wibuwa muno mu Albanie nkuitulongieshe ngielelo mupia a binangu na mushindo wa kushaala na bantu. Tui balongie mianda ibungi pabitale kukuukila bantu, kunemeka bantu na kudia bu kuuku nabo! Tui balongie mushindo upia wa kukita bulungudi, kunangushena pabitale Bifundue, na kuakula mu bishima bietu’tue banabene.” William amba’shi: “Bantu bebungi abafikaa mu kutemba mu Albanie abekalaa na muloo wa kumona mafua ebuwa e muanka. Ami nakumiinaa kukaamina ku miengie i mabue ebungi ya mu Albanie. Anka bantu nyi abakitaa bia’shi neyifule ngofu pa ino mbalo muanda be na kalolo biabia! Mu bibundi bibungi bia mu terituare etu, ta mbantu bebungi abekalanga bapushe mukandu wibuwa mu kipungo kia kampanye ke pa buako nya. P’atuendaa kuanka, ingi nsaa atukishaa efuku dishima penda na kuisamba na bifuko bibidi.”

 Muloo wibungi aupetaa bano abendaa mu kulungula mbalo yabadi na lukalo lua balungudi bebungi, autukilaa mu kumona mushindo wabasangeela mukandu wibuwa kui bantu. (1 Bena-Tesalonika 2:19, 20) Laura, baadi muende mu Albanie pabaadi ki nsonguakashi, na kii bukupi, atuusha kino kileshesho: “Ne mulungule munda mua mafuku ebungi mu kibundi kia Fier. Penda munda mua bipua bibidi na kipindi, bantu 120 bapia abaadi balombashe mianda itekibue bua kufika bu balungudi! Ne mulongie na bantu 16 ba munkatshi muabo!” Mungi mukuetu mukashi abetamina bu Sandra, atentekiesha’shi: “Naadi mutuushe bukamonyi kui mungi muana mukashi audishaa mu kisalue. Aye nkufika bu Kamonyi ka Yehowa akupu enda mu kushaala mu kibundi kiabo ki kula. Mukandu wa nfudiilo wangikalanga mupushe, nkuamba’shi kuete kulonga Bible na bantu 15!”

 Bebungi abaadi bende mu mbalo yabadi na lukalo lua balungudi bebungi, mu Albanie mu bipua bishaale, be nka kuakua na lelo na dingi be na muloo mu mudimo wabo. Abakaanyaa pa kumona’shi mudimo wabo ngupe bikuba penda na lutete lua kumpala lubaabadi bakune. (Mulungudi 11:6) Christopher, atuikele besambile kumpala, amba’shi: “Nekalanga mufumankane na muana mulume anaadi nalongo naaye Bible panayile mu Albanie bua musango wa kumpala. Naadi mukaanye pa kupusha andondela kantu pa kantu muianda ya mu Bible inaadi mumulongieshe bua musango wa kumpala. Bua binobino aye na mukashi aaye tabadi bafubi ba Yehowa bapue kubatshishibua.” Federica, atuikele besambile kumpala, amba’shi: “Mu kangi kakongie mungi mukuetu mukashi baadi muifubuile pepi nami aye nkungipusha su namutentekiesha dingi. Andugula’shi naadi mumulungule mukandu wibuwa takudi bipua 9. Baadi mubangie kulonga Bible, mu mafuku apeela kunyima kua’mi kuenda mu kingi kibundi aye nkuenda kumpala na nkubatshishibua. Naadi napuandikisha’shi bipua bietu bia kumpala mu Albanie ta mbituushe bikuba nya. Aku namu naadi nedimbi!”

 Bakuetu balume na bakashi abekalanga bende mu Albanie na mu Kosovo abekalanga na lutumbu lukata pabitale mushindo wabadi bebelele muabi kui Yehowa mu kuitatshisha kuabo na, aye nkuibapa nshalelo a muloo. Kunyima kua kukisha bipua bibungi mu Albanie Eliseo akula miloo yadi mupete bino mu kikoso: “Bu biatudi bantu, atupuandikishaa’shi nshalelo etu ekala biya su tui bakulupile mu bintu biabamonaa mu ino nsenga bu abikaluilaa muwa. Anka ta mbiabia nya. Miiya ya Yehowa nyi ayitukuashaa bua kuikala na muulo, ayo nyi ayitukaluilaa. Kulungula mu mbalo yabadi na lukalo lua balungudi bebungi, akunkuashaa bua kupela kuluba uno muanda. Ne na ba kuuku ba p’eshimba banyifunyishe. Na dingi be na mpango i mumune na yande.” Sandra ashinkamisha’shi: “Panaadi muende mu mbalo yabadi na lukalo lua balungudi bebungi, namuene’shi Yehowa baadi mumpe mushindo wa kulombasha lukalo lukata lunaadi nalo, nyi nkuamba’shi lua kuikala misionere. Ntanenyongolaa muanda wa kuenda mu Albanie nya. Kasha ntampushishe muloo wi bino.”