1 Korintasve 12:1-31
12 Sa për dhuratat frymore,+ o vëllezër, unë nuk dua që të jeni në padije.
2 Ju e dini se, kur ishit njerëz të kombeve,+ tërhiqeshit pas atyre idhujve+ të pagojë+ në mënyra të ndryshme.
3 Prandaj, do t’ju bëja të ditur se askush, kur flet nëpërmjet frymës së shenjtë të Perëndisë, nuk thotë: «Jezui qoftë i mallkuar!».+ Dhe askush nuk mund të thotë se «Jezui është Zotëri», veçse nëpërmjet frymës së shenjtë.+
4 Ka një shumëllojshmëri dhuratash,+ por është e njëjta frymë,+
5 dhe ka një shumëllojshmëri shërbimesh,+ e megjithatë është i njëjti Zotëri.+
6 Ka edhe një shumëllojshmëri veprimesh,+ e megjithatë është i njëjti Perëndi,+ që i kryen të gjitha ato te të gjithë njerëzit.+
7 Por fryma është shfaqur përmes secilit, për një qëllim të dobishëm.+
8 Për shembull, dikujt i janë dhënë me anë të frymës fjalë mençurie,+ një tjetri fjalë njohurie,+ sipas së njëjtës frymë,
9 një tjetri besim,+ nga po e njëjta frymë, një tjetri dhurata e shërimit,+ nga po ajo frymë,
10 një tjetri akoma të kryejë vepra të fuqishme,+ një tjetri profetizim,+ një tjetri aftësi dalluese+ për shprehjet e frymëzuara,+ një tjetri gjuhë të ndryshme+ dhe një tjetri të interpretojë+ gjuhët.
11 Dhe të gjitha këto veprime i kryen e vetmja dhe e njëjta frymë,+ që i shpërndan ato,+ ashtu si dëshiron, për secilin individualisht.+
12 Ashtu sikurse trupi është një, por ka shumë gjymtyrë, dhe të gjitha gjymtyrët e atij trupi, edhe pse janë shumë, janë një trup i vetëm,+ po kështu është edhe Krishti.+
13 Sepse, në të vërtetë, ne të gjithë u pagëzuam+ nga një frymë e vetme në një trup të vetëm, qofshim judenj a grekë, qofshim skllevër a të lirë, dhe të gjithëve na u dha të pinim+ nga një frymë e vetme.
14 Në të vërtetë, trupi nuk është një gjymtyrë, por shumë.+
15 Sikur këmba të thoshte: «Meqë nuk jam dorë, unë s’jam pjesë e trupit», jo për këtë arsye nuk është pjesë e trupit.+
16 Sikur veshi të thoshte: «Meqë nuk jam sy, unë s’jam pjesë e trupit», jo për këtë arsye nuk është pjesë e trupit.+
17 Sikur i gjithë trupi të ishte sy, ku do të ishte dëgjimi? Sikur të ishte i gjithi dëgjim, ku do të ishte nuhatja?
18 Por tani, Perëndia ka vendosur në trup gjymtyrët, secilën ashtu si i pëlqeu.+
19 Sikur të ishin të gjitha një gjymtyrë,+ ku do të ishte trupi?
20 Ka shumë gjymtyrë,+ mirëpo një trup.
21 Syri nuk mund t’i thotë dorës: «S’kam nevojë për ty.» Ose koka nuk mund t’u thotë këmbëve: «Nuk kam nevojë për ju.»
22 Përkundrazi, ato gjymtyrë të trupit, që duket se janë më të dobëta,+ janë të nevojshme,
23 dhe ato pjesë të trupit, që ne mendojmë se janë më pak të nderuara, i rrethojmë me shumë më tepër nderim+ dhe kështu, pjesët tona të pahijshme, kanë shumë më tepër hijeshi,
24 kurse pjesët tona të hijshme s’kanë nevojë për asgjë. Sidoqoftë, Perëndia e formoi trupin, duke i dhënë shumë më tepër nderim asaj pjese që kishte nevojë për nderim,
25 në mënyrë që në trup të mos ketë ndarje, por që gjymtyrët e tij të kenë të njëjtin kujdes për njëra-tjetrën.+
26 Sikur të vuajë një gjymtyrë, gjithë gjymtyrët e tjera vuajnë+ bashkë me të, dhe sikur të marrë lavdi+ një gjymtyrë, gjithë gjymtyrët e tjera gëzojnë bashkë me të.+
27 Ju jeni trupi i Krishtit dhe gjymtyrë më vete.+
28 Perëndia ka vendosur gjymtyrë të ndryshme në kongregacion:+ së pari apostuj,+ së dyti profetë,+ së treti mësues.+ Pastaj vepra të fuqishme,+ pastaj dhuratën e shërimit,+ pastaj shërbime të dobishme,+ aftësi për të drejtuar+ dhe gjuhë të ndryshme.+
29 Mos janë të gjithë apostuj? Mos janë të gjithë profetë? Mos janë të gjithë mësues? Mos kryejnë të gjithë vepra të fuqishme?
30 Mos e kanë të gjithë dhuratën e shërimit? Mos flasin të gjithë në gjuhë të huaja?+ Mos janë të gjithë përkthyes?+
31 Por vazhdoni të kërkoni me zell dhuratat më të mëdha.+ E megjithatë, unë po ju tregoj një udhë që i tejkalon të tjerat.+
