Veprat 3:1-26
3 Tani, Pjetri dhe Gjoni u ngjitën në tempull për lutjen e orës së nëntë.*+
2 Atje sollën një burrë, që kishte lindur+ i çalë. Atë e vinin përditë pranë derës së tempullit që quhej E Bukura,+ për t’u kërkuar lëmoshë atyre që hynin në tempull.+
3 Kur vuri re se Pjetri dhe Gjoni do të hynin në tempull, ai nisi t’u kërkonte lëmoshë.+
4 Por Pjetri dhe Gjoni ia ngulën sytë+ dhe i thanë: «Na vështro!»
5 Atëherë ai e nguli vështrimin mbi ta, duke pritur të merrte diçka prej tyre.
6 Mirëpo Pjetri tha: «Argjend e ar nuk kam, por atë që kam, po ta jap:+ në emër të Jezu Krishtit, nazareasit,+ ec!»+
7 Sakaq e kapi nga dora e djathtë+ dhe e ngriti. Në çast, tabani dhe kyçet e këmbëve iu forcuan,+
8 hovi përpjetë,+ qëndroi në këmbë e filloi të ecte. Hyri me ta në tempull+ duke ecur, duke hovur e duke lëvduar Perëndinë,
9 dhe të gjithë njerëzit+ e panë tek ecte e lëvdonte Perëndinë.
10 Për më tepër, e njohën se ishte ai që ulej në Portën e Bukur+ të tempullit për të kërkuar lëmoshë, prandaj u mahnitën dhe mbetën të shtangur+ për çka i kishte ndodhur.
11 E pra, ndërsa burri nuk po i shqitej Pjetrit dhe Gjonit, të gjithë ata që ishin atje, të shastisur nga habia, vrapuan drejt tyre tek ajo që quhej kolonada e Solomonit.+
12 Kur e pa këtë, Pjetri u tha: «Burra të Izraelit, përse po çuditeni? Pse na i ngulni sytë a thua se ne me fuqinë ose përkushtimin tonë hyjnor bëmë që ky të ecte?+
13 Perëndia i Abrahamit, i Isakut dhe i Jakobit,+ Perëndia i paraardhësve tanë, i dha lavdi+ Shërbëtorit të tij,+ Jezuit, të cilin ju e dorëzuat+ dhe e mohuat para Pilatit, kur ai kishte vendosur ta lironte.+
14 Po, ju e mohuat të shenjtin e të drejtin+ dhe kërkuat t’ju lirohej një njeri, një vrasës,+
15 kurse Kryepërfaqësuesin e jetës+ e vratë. Por Perëndia e ngriti nga të vdekurit, dhe për këtë ne jemi dëshmitarë.+
16 Prandaj, emri i tij, ose më mirë besimi që kemi në emrin e tij, e bëri të fortë këtë njeri që shihni e njihni. Besimi që kemi falë tij, i dha këtij njeriu shëndet të plotë para të gjithëve ju.
17 E pra, vëllezër, e di se vepruat në padije,+ ashtu si bënë edhe krerët tuaj.+
18 Por në këtë mënyrë Perëndia përmbushi ato që tha që më parë nëpërmjet tërë profetëve, se Krishti i tij do të vuante.+
19 Prandaj pendohuni+ dhe kthehuni,+ që t’ju fshihen mëkatet,+ që nga vetë Jehovai të vijnë kohë freskuese+
20 e që ai të dërgojë Krishtin e emëruar për ju, Jezuin.
21 Atë, në të vërtetë, duhet ta mbajë brenda vetes qielli+ deri në kohën e rivendosjes+ së të gjitha gjërave, për të cilat Perëndia foli nëpërmjet profetëve+ të tij të shenjtë të lashtësisë.
22 Në fakt, Moisiu tha: ‘Perëndia Jehova do t’ju japë një profet si unë nga gjiri i vëllezërve tuaj.+ Dëgjojini të gjitha ato që do t’ju thotë.+
23 Çdo shpirt që nuk e dëgjon atë Profet, do të shfaroset nga populli.’+
24 Në të vërtetë edhe të gjithë profetët që kanë folur, që nga Samueli e me radhë, folën qartë për këto ditë.+
25 Ju jeni bij+ të profetëve dhe të besëlidhjes, që Perëndia bëri me paraardhësit tuaj, kur i tha Abrahamit: ‘Me anë të farës sate do të bekohen të gjitha kombet e tokës.’+
26 Pasi ju dha Shërbëtorin e tij, Perëndia jua dërgoi më parë juve,+ që t’ju bekonte duke e larguar secilin prej jush nga veprat e liga.»
Shënimet
^ Rreth 3 e pasdites, duke llogaritur nga lindja e diellit.
