Josiu 20:1-9
-
Qytetet e strehimit (1-9)
20 Pastaj Jehovai i tha Josiut:
2 «Thuaju izraelitëve: ‘Zgjidhni qytetet e strehimit,+ për të cilat ju fola me anë të Moisiut,
3 që atje të ikë me të shpejtë ai që vret dikë* pa paramendim ose pa dashje.* Ato do t’ju shërbejnë si strehim nga gjakmarrësi.+
4 Ai duhet të ikë shpejt në një nga këto qytete,+ të qëndrojë në hyrje të portës së qytetit+ dhe t’ua paraqesë çështjen pleqve të atij qyteti, të cilët do ta dëgjojnë. Pastaj duhet ta pranojnë në qytet dhe t’i japin një vend që të banojë me ta.
5 Nëse gjakmarrësi e ndjek, ata nuk duhet ta dorëzojnë në duart e tij atë që i shkaktoi vdekjen tjetrit, sepse ai e ka vrarë pa dashje* dhe pa e urryer më parë.+
6 Ai duhet të banojë në atë qytet derisa t’i bëhet gjyqi para asamblesë+ dhe të qëndrojë atje derisa të vdesë kryeprifti+ që është në detyrë në atë kohë. Vetëm atëherë ai që i ka shkaktuar vdekjen tjetrit mund të kthehet në qytetin nga i cili iku dhe të hyjë në qytetin e në shtëpinë e tij.’»+
7 Kështu, ata e shpallën të shenjtë* Kedeshin+ në Galile, në rajonin malor të Neftalit, Sikemin+ në rajonin malor të Efraimit dhe Kiriat-Arbën,+ domethënë Hebronin, në rajonin malor të Judës.
8 Në rajonin e Jordanit, në lindje të Jerikosë, zgjodhën Bezerin+ në shkretëtirën që gjendet në rrafshnaltë* nga fisi i Rubenit, Ramotin+ në Galad nga fisi i Gadit, dhe Golanin+ në Bashan nga fisi i Manaseut.+
9 Këto ishin qytetet që u caktuan për tërë izraelitët dhe për të huajt që banonin mes tyre, që atje të ikte me të shpejtë kushdo që kishte vrarë pa dashje dikë*+ dhe të mos vdiste nga dora e gjakmarrësit, përpara se t’i bëhej gjyqi para asamblesë.+
Shënimet
^ Ose «godet një shpirt».
^ Ose «aksidentalisht».
^ Ose «aksidentalisht».
^ Ose «ata e ndanë veç».
^ Ose «pllajë».
^ Ose «një shpirt».
