Mrekullia e parë e Jezuit
Kapitulli 15
Mrekullia e parë e Jezuit
KANË kaluar vetëm një ose dy ditë që nga koha kur Andrea, Pjetri, Gjoni, Filipi, Natanaeli dhe ndoshta edhe Jakovi u bënë dishepujt e parë të Jezuit. Tani ata po kthehen në shtëpi, në krahinën e Galilesë, vend nga i cili e kanë prejardhjen të gjithë. Destinacioni i tyre është Kana, qyteti i Natanaelit, i ngritur mbi disa kodra jo shumë larg Nazaretit ku është rritur vetë Jezui. Atje, ata janë të ftuar në një dasmë.
Në dasmë ka ardhur edhe mamaja e Jezuit. Duke qenë mikeshë e familjeve të çiftit që martohet, me sa duket Maria është midis atyre që u shërbejnë të ftuarve të shumtë. Për këtë arsye, ajo vëren menjëherë se diçka mungon dhe ia bën të ditur Jezuit: «Nuk kanë më verë.»
Kur Maria, me këto fjalë, i sugjeron Jezuit, që të bëjë diçka për këtë gjë, fillimisht ai ngurron. «Ç’ke me mua, o grua?»—pyet ai. Si Mbret i emëruar nga Perëndia, ai nuk duhet të drejtohet në aktivitetin e tij nga miqtë apo familjarët. Kështu, Maria, me mençuri e lë çështjen në dorën e të birit, thjesht duke u thënë atyre që shërbenin: «Bëni gjithçka që ai t’ju thotë.»
Mirë pra, atje janë gjashtë qypa uji të mëdhenj prej guri, që mbajnë mbi dyzet litra secili. Jezui i udhëzon ata që shërbejnë: «Mbushini enët me ujë.» Dhe ata i mbushin deri në buzë. Pastaj Jezui thotë: «Nxirreni tani dhe çojani të parit të festës.»
Të parit të festës i bën shumë përshtypje cilësia e shkëlqyer e verës, duke mos e kuptuar se është siguruar në mënyrë të mrekullueshme. Ai thërret dhëndrin dhe i thotë: «Çdo njeri nxjerr në fillim verën më të mirë dhe kur të ftuarit kanë pirë shumë, verën e keqe; ti përkundrazi e ke ruajtur verën e mirë deri tani.»
Kjo është mrekullia e parë e Jezuit dhe duke e parë atë, besimi i dishepujve të tij të rinj është forcuar. Më pas, së bashku me nënën dhe me vëllezërit e tij nga nëna, ata udhëtojnë për në qytetin e Kapernaumit afër Detit të Galilesë. Gjoni 2:1-12.
▪ Në cilën kohë të shërbimit të Jezuit u bë dasma në Kanë?
▪ Pse Jezui ngurron kur nëna e tij i jep një sugjerim?
▪ Çfarë mrekullie kryen Jezui dhe cili është efekti i saj mbi të tjerët?