KAPITULLI 12

Si të kem më shumë besim te vetja?

Po Jo

Kur shihesh në pasqyrë, a je i kënaqur me pamjen tënde? □ □

A mendon se ke aftësi të lavdërueshme? □ □

A je në gjendje t’i bësh ballë presionit të bashkëmoshatarëve? □ □

A i pranon kritikat me vend? □ □

A reagon siç duhet ndaj vërejtjeve pa vend që bëjnë të tjerët për ty? □ □

A mendon se të tjerët të duan? □ □

A kujdesesh për shëndetin? □ □

A kënaqesh kur të tjerët kanë sukses? □ □

Në përgjithësi, a mendon se je i suksesshëm? □ □

Nëse iu përgjigje jo disa prej pyetjeve të mësipërme, ndoshta nuk ke shumë besim te vetja dhe kjo të pengon të shohësh pikat e tua të forta. Ky kapitull do të të ndihmojë t’i zbulosh ato.

 SHUMË të rinj luftojnë me pasiguritë që kanë për pamjen e aftësitë, si edhe për vlerën e tyre në krahasim me moshatarët. A je edhe ti një prej tyre? Nëse po, nuk je i vetmi që ndihesh kështu.

«Të metat më bëjnë të ndihem përtokë. Zakonisht jam kritikia më e keqe e vetes.»​—Leticia.

«Eh, sado e bukur ose i bukur të jesh, prapëseprapë sheh gjithmonë të tjerë që janë më të bukur se ti.»​—Helena.

«Ndihem shumë në siklet kur jam me të tjerët. Kam frikë mos dukem një hiç.»​—Rakela.

Nëse pohimet e mësipërme janë të vërteta edhe për ty, mos u dëshpëro. Ka zgjidhje. Shqyrto tri gjëra që do të të ndihmojnë të kesh më shumë besim te vetja e ta shohësh veten nga një këndvështrim më pozitiv.

Bëj për të tjerët

Shkrimi kyç. «Ka më shumë lumturi të japësh, se të marrësh.»​—Veprat 20:35.

Ç’do të thotë? Kur ndihmon të tjerët, ndihmon veten. Në ç’kuptim? Një proverb biblik thotë: «Bujaria do të shpërblehet. Kush jep një gotë ujë, do të marrë një gotë ujë në këmbim.» (Proverbat 11:25, Contemporary English Version) Pa dyshim që ndihesh më mirë me veten kur ndihmon të tjerët. *

«Mendoj se ç’mund të bëj për të tjerët dhe përpiqem të ndihmoj ndonjë që është në nevojë në kongregacion. Ndihem më mirë kur u tregoj dashuri dhe vëmendje të tjerëve.»​—Briana.

«Shërbimi i krishterë është  shpërblyes, pasi të bën të mos mendosh për veten, por për të tjerët.»​—Joni.

Mbaj parasysh: Mos i ndihmo të tjerët vetëm me synimin për të marrë diçka në këmbim. (Mateu 6:2-4) Të japësh me motivin e gabuar nuk të çon gjëkundi. Zakonisht të tjerët e dallojnë se po shtiresh.​—1 Selanikasve 2:5, 6.

Çfarë të bësh? Mendo për dikë që ke ndihmuar në të kaluarën. Kush ishte dhe çfarë bëre për të?

․․․․․

Si u ndjeve më pas?

․․․․․

Mendo për dikë tjetër që mund të ndihmosh dhe shkruaj si ta bësh këtë.

․․․․․

Gjej shokë të mirë

Shkrimi kyç. «Shoku i vërtetë të do në çdo kohë, dhe të bëhet vëlla në ditë të vështira.»​—Proverbat 17:17.

Ç’do të thotë? Një shok i mirë është mbështetje e jashtëzakonshme në kohë të vështira. (1 Samuelit 18:1; 19:2) Vetëm mendimi se dikush interesohet  për ty mund të të ngrejë moralin. (1 Korintasve 16:17, 18) Prandaj, shoqërohu me ata që ndikojnë për mirë te ti.

«Shokët e vërtetë nuk do të të lënë në baltë.»​—Donaldi.

«Ndonjëherë ajo që të ndihmon më shumë është dijenia se dikush interesohet vërtet për ty. Kjo të bën të ndihesh njeri me vlerë.»​—Edra.

Mbaj parasysh: Përpiqu që me shokët të jesh vetvetja, jo të shtiresh vetëm sa për t’u pëlqyer atyre. (Proverbat 13:20; 18:24; 1 Korintasve 15:33) Nëse bën veprime të pamenda thjesht për t’u bërë përshtypje të tjerëve, do të ndihesh i poshtëruar e i marrë nëpër këmbë.​—Romakëve 6:21.

Çfarë të bësh? Poshtë shkruaj emrin e një shoku që të ndihmon në mënyrën e duhur të kesh më shumë besim te vetja.

․․․․․

Pse të mos planifikosh të kalosh pak kohë me të?—Shënim: Nuk ka pse të jetë i grup-moshës sate.

Mos u dorëzo kur gabon

Shkrimi kyç. «Të gjithë kanë mëkatuar dhe nuk e kanë arritur lavdinë e Perëndisë.»​—Romakëve 3:23.

Ç’do të thotë? Me pak fjalë: je i papërsosur. Kjo do të thotë se do të ketë momente kur do të thuash ose do të bësh diçka të gabuar. (Romakëve 7:21-23; Jakovi 3:2) Gabimet nuk mund t’i shmangësh, por ama mund të kontrollosh mënyrën si reagon kur gabon. Bibla thotë: «I drejti mund të bjerë edhe shtatë herë dhe ka për t’u ngritur.»​—Proverbat 24:16.

 «Ndonjëherë mungesa e vetëvlerësimit vjen kur krahasojmë dobësitë tona me pikat e forta të të tjerëve.»​—Kevini.

«Të gjithë kanë cilësi të mira dhe të meta. Duhet të jemi krenarë për cilësitë e mira dhe të punojmë me të metat tona.»​—Lorena.

Mbaj parasysh: Mos e përdor papërsosmërinë si justifikim për ta bërë rrugë mëkatin. (Galatasve 5:13) Nëse qëllimisht përfshihesh në keqbërje, nuk do të kesh miratimin e personit më të rëndësishëm, Perëndisë Jehova.​—Hebrenjve 10:26, 27.

Çfarë të bësh? Poshtë shkruaj çfarë dëshiron të përmirësosh te vetja.

․․․․․

Shkruaj datën e sotme përbri cilësisë që shkrove. Bëj kërkime në botimet tona që të kuptosh si të përmirësosh dhe shiko sa ke ndryshuar në fund të një muaji.

 Vlera jote e vërtetë

Bibla thotë: «Perëndia është më i madh se zemra jonë.» (1 Gjonit 3:20) Kjo do të thotë se ai shikon te ti vlera që ti nuk i sheh te vetja. Por a e ndryshojnë këtë fakt të metat e tua? Përfytyro sikur ke një kartëmonedhë me vlerë 5000 lekë që është grisur pak. A do ta hidhje ose do ta shihje si të pavlerë vetëm se është pak e grisur? Patjetër që jo! Ka ende të njëjtën vlerë, me ose pa atë grisje.

Njësoj është edhe me vlerën që ke në sytë e Perëndisë. Të metat e tua nuk e pengojnë Perëndinë të shohë vlerat e tua. Ai vëren dhe vlerëson te ti përpjekjet që bën për t’i pëlqyer, pavarësisht se sa të papërfillshme të duken ty. Vërtet, Bibla jep sigurinë se «Perëndia nuk është i padrejtë, që të harrojë veprën tuaj dhe dashurinë që treguat për emrin e tij».​—Hebrenjve 6:10.

NË KAPITULLIN TJETËR:

A të pushton ndonjëherë trishtimi i thellë? Nëse po, çfarë mund të bësh?

[Shënimi]

SHKRIMI KYÇ

«Secili të tregojë me prova se si është vepra e vet, dhe atëherë do të ketë shkak të ngazëllohet vetëm për veten e jo të krahasohet me një tjetër.»​—Galatasve 6:4.

KËSHILLË

Mos i thuaj vetes gjëra të tilla, si «Jam kot fare» dhe «Nuk bëj asgjë si duhet». Ekzagjerime të tilla vetëm sa të shkurajojnë. Prandaj, përveç të metave, prano edhe pikat e tua të forta.

A E DIJE . . . ?

Pikëpamja që ke për veten, ndikon te mënyra si të konsiderojnë e madje si të trajtojnë të tjerët.

HAPAT QË DUA TË BËJ . . .

Kur moshatarët më shajnë para të tjerëve, do të ․․․․․

Kur të vërej se po përqendrohem vetëm te dobësitë e mia, do të ․․․․․

Pyetje që dua t’u bëj prindërve: ․․․․․

ÇFARË MENDON?

● Pse të rinjtë në mënyrë të veçantë priren të mos kenë besim te vetja?

● Pse është e rëndësishme të kesh respekt për veten në masën e duhur?

[Diçitura në faqen 88]

«Dikush mund të jetë shumë simpatik dhe prapë t’i duket vetja i shëmtuar. Nga ana tjetër, dikush mund të mos jetë dhe aq i bukur, por i duket vetja yll bote. Është e gjitha çështje qëndrimi.»​—Elisa

[Figura në faqen 90]

Kartëmonedha nuk e humbet vlerën ngaqë është pak e grisur. Po ashtu, vlera jote në sytë e Perëndisë nuk bie për shkak të papërsosmërisë tënde